სესხის გამცემი სუბიექტებისთვის, კომერციული ბანკებისა და მიკროსაფინანსო ორგანიზაციებისთვის მიმდინარე წლის პირველი თებერვლიდან ახალი რეგულაციები ამოქმედდება. კერძოდ, მიკროსაფინანსოებს და სესხის გამცემ სუბიექტებს პირველი თებერვლიდან აეკრძალებათ გაცემული სესხის უზრუნველსაყოფად მიღებული ქონების, მის მიერ აღებული ნებისმიერი სახის ვალდებულების უზრუნველყოფის საგნად გამოყენება. კომერციულ ბანკებს კი აეკრძალებათ, რომ მიკროსაფინანსო ორგანიზაციის, სესხის გამცემი სუბიექტისა და არასაბანკო სადეპოზიტო დაწესებულება – საკრედიტო კავშირისთვის გაცემული სესხის უზრუნველყოფის საგნად გამოიყენოს ქონება, რომელიც ამ მიკროსაფინანსო ორგანიზაციის, სესხის გამცემი სუბიექტისა და საკრედიტო კავშირის მიერ მიღებულია გაცემული სესხის უზრუნველსაყოფად.

საბანკო ექსპერტი დავით კიკვიძე მიიჩნევს, რომ ეს რეგულაცია სწორი გადაწყვეტილებაა, რადგან მომხმარებელი უფრო დაცული იქნება, თუმცა ფინანსურ ინსტიტუტებს გაურთულდებათ სესხებთან ხელმისაწვდომობა.

„ეს რეგულაცია საფინანსო ინსტიტუტებისთვის სწორი გადაწყვეტილებაა, იქედან გამომდინარე, რომ საკუთარი კლიენტის უძრავი ქონების ხელმეორედ გადაგირავება პრობლემებს ქმნიდა, ამიტომ სებ-მა მიიღო ეს გადაწყვეტილება. რეგულაციის ამოქმედების შემდეგ,  მომხმარებელი უფრო დაცული იქნება, თუმცა, მეორე მხრივ ფინანსურ ინსტიტუტებს გაურთულდებათ სესხებთან ხელმისაწვდომობა. მათ მოუწევთ ალტერნატიული უზრუნველყოფის მოძიება იმისათვის, რომ ბანკში წარადგინონ და სესხებთან ხელმისაწვდომობა შეძლონ. მთლიანობაში, რომ ავიღოთ რეგულაცია კარგია. თუმცა, ეს ფაქტი ალბათ გამოიწვევს მცირე ზომით მიკროსაფინანსოების ბაზრიდან გასვლას, რადგან ისინი ბანკში ვეღარ წარადგენენ კლიენტიდან მიღებულ უზრუნველყოფილ ქონებას და გაუჭირდებათ ალტერნატივის მოძიება. შესაბამისად, კომერციულ ბანკებსაც შესაძლოა საკრედიტო პორტფელი შეუმცირდეთ,“ - განმარტავს დავით კიკვიძე.

„საზოგადოება და ბანკების“ დამფუძნებელი გიორგი კეპულაძე მიიჩნევს, რომ რეგულაცია ხშირ შემთხვევში უარყოფითად მოქმედებს ბიზნესზე, განსაკუთრებით მაშინ როდესაც ეს საფინანსო სექტორს ეხება.

„ეს იმ რეგულაციების ნაწილია, რომელიც შარშან დაიწყო და შეზღუდა მიკროსაფინანსოების ბაზარი, მათი რაოდენობა კი მკვეთრად შემცირდა. ახლაც მოსალოდნელია მათი რაოდენობის შემცირება. რაც შეეხება კომერციულ ბანკებს, მათ ალბათ  საკრედიტო პორტფელი შეუმცირდებათ, რადგან სხვა საფინანსო ინსტიტუტები ვეღარ მოახდენენ უზრუნველყოფის სახით კლიენტის ქონების ბანკში ჩადებას და სესხის აღებას. ყველა ახალი რეგულაცია ხშირ შემთხვევში უარყოფითად მოქმედებს ბიზნესზე, შესაძლოა იყო გარკვეული პრობლემები, მაგრამ მკაცრი რეგულაციებით საფინანსო სექტორს დიდ დარტყმას ვაყენებთ. ისე არ უნდა მოგვივიდეს, რომ ამდენი რეგულაციის პირობებში მნიშვნელოვნად დავასუსტოთ საფინანსო სექტორი რომელიც ჩვენი ეკონომიკის ლოკომოტივია“, - განაცხადა გიორგი კეპულაძემ.

აღნიშნული რეგულაცია ორგანიზაციებისთვის 2019 წლის პირველი ივლისიდან უნდა ამოქმედებულიყო, თუმცა, ეროვნული ბანკის პრეზიდენტის გადაწყვეტილებით, რამდენიმე თვით გადავადდა.

ნინო თამაზაშვილი