კომპანია Kohi.ge ქობულეთთან ახლოს  თანამედროვე კომპიუტერიზებულ ქარხანას ააშენებს, ამის შესახებ „კომერსანტს“ kohi.ge -ს დამფუძნებელმა ირაკლი ლომიძემ განუცხადა. მისი განცხადებით, ქობულეთში მდებარე  ქარხანა სახლების გამოშვებას მაისის დასაწყისიდან შეძლებს.

„ქობულეთთან ახლოს ვაშენებთ ახალ, დიდ, თანამედროვე კომპიუტერიზებულ და ავტომატიზირებულ ქარხანას რობოტებით, რომელშიც 4,5 მილიონ ევროს ვდებთ. ქობულეთთან  ახლოს  მოსავლელ  გზათკეცილზე  2  ჰექტარი მიწა შევიძინეთ, მოვასწორეთ და უკვე ვიწყებთ შენობის აწყობას,  დანადგარებს გერმანული კომპანია wienman homage-სგან ვყიდულობთ.

კონტრაქტის მიხედვით ავტომატიზირებული მასალა,  გერმანიიდან თებერვლის თვეში  ჩამოგვივა, რომლის მონტაჟს თვითონ  wienman homage უზრუნველყოფს, ასევე ჩამოვლენ სპეციალისტები, რომლებიც გადაამზადებენ ჩვენ მუშებს და ოპერატორებს და დანადგარებზე მუშაობას ასწავლიან. დაფინანსება  „აწარმოე  საქართველოსგან“  მივიღეთ. ქობულეთის ქარხანა პირველ სახლს მაისიდან გამოუშვებს და ერთ დღეში 150 კვადრატული მეტრი ფართობის სახლის აშენებას შევძლებთ“, - განმარტავს ირაკლი ლომიძე.

ირაკლი ლომიძეს განცხადებით, kohi.ge საქართველოს ბაზარზე  ერთადერთი ქართული კომპანიაა, რომელიც სახლებს ამზადებს.

„საქართველოში  ძალიან მოთხოვნადი აღმოჩნდა  ესეთი  ტიპის  სახლები და თან  კონკურენცია  თითქმის  არ მქონდა. ბოლო წელს  გამოჩნდა ესტონური და ფინური კომპანიების წარმომადგენლები, თუმცა ჩვენი კომპანია  მხოლოდ ქართულია.მასალების რაღაც ნაწილი გერმანიიდან,  თურქეთიდან, ნაწილი ფინეთიდან,  რუსეთიდან ჩამოგვაქვს ნედლეული და ვამუშავებთ“, - აცხადებს ირაკლი ლომიძე.

სახლებზე მოთხოვნა ძირითადად საკურორტო ადგილებიდან და მაღალმთიანი რეგიონებიდან, სვანეთიდან, მაღალმთიანი აჭარიდან და ყაზბეგიდან არის. კორონავირუსამდე ძირითადი მოთხოვნა ტურისტული კომპანიებისგან იყო, თუმცა ახლა შემდეგ კერძო პირებიც გააქტიურდნენ.

„კორონამდე ძირითადი მომხმარებელი ტურისტული სექტორი, პატარა კომპანიები იყვნენ  ვისაც  კერძო  სასტუმრო აქვს  და  1-2  ნომრის  დამატება  სჭირდება რომ ეზოში ჩააყენონ. ახლა  ცოტა  შეიცვლა  ჩვენი კლიენტები და კერძო მომხმარებლის რაოდენობამ  იმატა, სახლებს ძირითადად აგარაკებისთვის გვიკვეთავენ“, - ამბობს ირაკლი ლომიძე.

კორონავირუსის პანდემიის გამო kohi.ge-ს თბილისის და ბათუმის საამქროების ორი თვით დაკეტვა მოუწია და საკმაოდ დიდი პროექტები, რომლებიც აჭარაში და წყალტუბოში უნდა  განეხორციელებინათ მომავალი წლისთვის გადადეს, თუმცა ევროპიდან დიდი გამოხმაურება მიიღეს.

Kohi.ge -ის სახლები ექსპორტზე  ძირითადად გერმანიაში,  საბერძნეთში,  ისლანდიაში და  იტალიაში გადის.

„კორონამ  რა თქმა უნდა გაგვაჩერა, ორი თვით საამქრო დავკეტეთ, გადავწიეთ პროექტების დასრულების ვადები, ბევრი საკმაოდ დიდი პროექტი გვქონდა დაწყებული, რაც აჭარაში ქედაში და წყალტუბოში უნდა გაგვეკეთებინა, მაგრამ ამ  დროს  მოხდა გერმანიასთან კომუნიკაცია. დიდი გამოხმაურება იყო  საზღვარგარეთიდან. ექსპორტზე  ძალიან დიდი  მოთხოვნაა  ეს 4,5 მილიონ ევროიანი ქარხანა შენდება  იმიტომ, რომ პროდუქცია ექსპორტზე გავიტანოთ. თორე ისეთ წარმადობა აქვს,  რომ სქართველოს  და ამიერკავკასიის  ბაზარი ამ რაოდენობის პროდუქციას ვერ  მოერევა,  არ  არის  ასეთი მოთხოვნა“, - განმარტავს ირაკლი ლომიძე.

kohi.ge - ში სახლის ერთი კვადრატული მეტრის ფასი 200$-დან იწყება და პროექტის სირთულის მიხედვით იზრდება.

თაკო კვაჭანტირაძე