საკოორდინაციო საბჭომ საცურაო აუზებისა და სპორტული დარბაზების გახსნის გადაწყვეტილება მიიღო. ოთხ თვიანი პაუზის შემდეგ ბიზნესი ახლა შრომის ინსპექციის შემოწმებას ელოდება. ჯანდაცვის სამინისტროს სარეგისტრაციო პორტალზე უკვე დარეგისტრირდა „World Class Georgia“. სპორტული დარბაზის მარკეტინგის დირექტორი ნინი ხუროძე აცხადებს, რომ მას შემდეგ რაც „World Class“ შრომის პირობების ინსპექტირების დეპარტამენტისგან დადებით პასუხს მიიღებს ფიტნეს ცენტრს მეორე დღესვე გახსნიან. ამ ეტაპზე ხუროძისთვის უცნობია როდის სახელმწიფო სტრუქტურა როდის შეამოწმებს სპორტული დარბაზს. „World Class“ მარკეტინგის დირექტორი „კომერსანტთან“კორონავირუსის გავრცელების პრევენციის მიზნით მთავრობის მიერ დაწესებულ შეზღუდვებზე საუბრობს.
„რეგულაციები რომელიც ჯანდაცვის სამინისტომ დაგვიწესა შესრულებადია, თუმცა ხარჯი იზრდება, წარმოიდგინეთ სადეზინფექციო სამუშაოები საათში ერთხელ უნდა ჩატარდეს. ყოველდღიურად უნდა ვესაუბროთ ჩვენი კლუბის წევრებს, დიდი პასუხისმგებლობა უნდა გამოიჩინონ და დადგენილი წესები უნდა დაიცვან. იგივე დისტანცირება, სადეზინფექციო ხსნარების გამოყენება და ა.შ. რა თქმა უნდა ამ ყველაფერს კონტროლს გავუწევთ და მექანიზმებიც შევიმუშავეთ, მაგრამ მომხმარებელზეც ძალიან ბევრია დამოკიდებული. მთავრობის გადაწყვეტილებით 6 კვ.მ-ზე მოხდება თითო ადამიანის დაშვება, იქედან გამომდინარე, რომ ჩვენი დარბაზი რაოდენობრივად არ არის გათვლილი ბევრ ადამიანზე გადაწყვეტილება ნორმალურია. აღსანიშნავია, რომ ჩვენთან ვენტილაციის კუთხით არანაირი პრობლემა არაა, დამონტაჟებულია ერთ-ერთი საუკეთესო სავენტილაციო სისტემა, რომელიც ყოველ 7 წუთში ერთხელ უზრუნველყოფს ჰაერის ცირკულაციას“, - აცხადებს ნინი ხუროძე.
„World Class“- ში საფასო პოლიტიკის გადახედვას ჯერჯერობით არ აპირებენ. ნინი ხუროძე აცხადებს, რომ ახლა სატესტო რეჟიმში არიან, რა დროსაც დააკვირდებიან თუ რა დატვირთვა ექნება ფიტნეს ცენტრს, აღსანიშნავია, რომ მოლოდინი პოზიტიური აქვთ. თუმცა, პოზიტიური მოლოდინისგან გასხვავებით ძალიან მძიმეა ის რეალობა, რომელშიც პანდემიის გამო ბიზნესი აღმოჩნდა, ზარალს რომელიც კომპანიას მიადგა ამ დრომდე ითვლიან.
„ზარალის ოდენობის დასახელება ამ ეტაპზე შეუძლებელია, რადგან ძალიან ბევრი მიმდინარე დავალიანება გვაქვს, ახლა მომწოდებლებთან მიმდინარეობს მოლაპარაკებები, რომ ეს დავალიანებები მოგვიხსნან. იქედან გამომდინარე, რომ ბევრი კომპანიის ოფიციალური წარმომადგენელი ვართ, ბევრი დამატებით ხარჯი გვაქვს და უცხოურ ვალუტაში ვიხდით ამ თანხას. პარალელურად ფილარმონიასთან მიმდინარეობს მოლაპარაკება იჯარასთან დაკავშირებით. ახლა მხოლოდ იმის თქმა შეგვიძლია, რომ ხარჯი ძალიან დიდია“, - განმარტავს ნინი ხუროძე.
თითქმის ოთხ თვიანი პაუზის შემდეგ „World Class“ კლუბის წევრებს სიახლეებით ხვდება. ნინი ხუროძე აცხადებს, რომ სიახლეები ჯგუფურ ვარჯიშებს შეეხება, თუმცა იქედან გამომდინარე, რომ გადაწყვეტილება დამუშავების ეტაპზე ჯერჯერობით კონკრეტულ დეტალებზე ვერ საუბრობს. „World Class“ მარკეტინგის დირექტორი აცხადებს, რომ შესაძლებელია, ფიტნეს ცენტრმა საწევროები დაამატოს, რასაც მისი თქმით მომხმარებელი ყოველთვის ითხოვდა.
ბაჩო ადამია