საქართველოს მთავრობის № 520-ე დადგენილების თაობაზე გასულ წელს ჯანდაცვის განვითარების საბჭოს დაქვემდებარებაში სამუშაო ჯგუფი შეიქმნა. სამედიცინო საზოგადოების აქტიურობის შედეგ, პრემიერ-მინისტრ გიორგი გახარიას დავალებით შექმნილ სამუშაო ჯგუფს ეკატერინე ტიკარაძის მიერ გატარებულ რეფორმაში არსებული ხარვეზები უნდა შეესწავლა. თუმცა, ჰოსპიტალური სექტორის წარმომადგენლები „კომერსანტთან“ საუბარში აცხადებენ, რომ 10 იანვრის შემდეგ შეხვედრა არ შემდგარა. სამედიცინო სფეროს წარმომადგენლები ჯანდაცვის სამინისტოს მიერ გადადგმულ ქმედით ნაბიჯებს ელოდებიან, წინააღმდეგ შემთხვევაში ზოგიერთ მათგანს საყოველთაო ჯანდაცვის პროგრამის დატოვება მოუწიოს.
სანამ გადაწყვეტილებას მიიღებს, პროცესებში ამერიკის და ისრაელის საელჩოების შესაძლო ჩართვას გეგმავს კლინიკა „ჰელსიკორი“. როგორც მედიაჰოლდგინგს კლინიკის დირექტორმა რუსუდან ლაგვილავამ განუცხადა, უცხოელ ინვესტორებს დადგენილი ტარიფებით მუშაობა წარმოუდგენლად მიაჩნიათ.
„ჩვენი ერთ-ერთი ძირითადი დამფუძნებელი არის ისრაელის მოქალაქე, მეორე- ამერიკის მოქალაქე , მოგვიწევს პრობლემებთან დაკავშირებით ჯერჯერობით საელჩოებს მივმართოთ, რადგან ეს არის უცხოური ინვესტიცია და აუცილებლად მოვითხოვთ პროცესებში საელჩოების ჩართვას. ამის შემდეგ გადავწყვიტავთ დავტოვებთ თუ არა საყოველთაო ჯანდაცვის პროგრამას. ინვესტორები სამედიცინო დარგის წარმომადგენლები არიან , ერთ-ერთი მათგნი არის ისრაელის წამყვანი ანგიოქირურგიული დეპარტამენტის ხელმძღვანელი და როდესაც ის გაეცნო იმ ტარიფიკაციას რომელიც სამინისტრომ წარმოადგინა, ადამიანს უბრალოდ არ სჯეროდა, რომ სამინისტრომ შეიძლება ესეთი რამე წარმოადგინოს. აბსოლუტურად დაუსაბუთებელი კალკულაცია, არაპირდაპირი ხარჯი 3 000 ლარიდან 286 ლარამდე შეამცირეს, როგორ დათვალეს და საერთოდ რა გააკეთეს არ ვიცი“, - განმარტავს რუსუდან ლაგვილავა.
შეგახსენებთ, რომ სამედიცინო დაწესებულებებისთვის ერთიანი სატარიფო სისტემა ძალაში 21 ნოემბრიდან შევიდა. რეფორმის უარყოფით შედეგებზე ჰოსპიტალური სექტორი თავიდანვე საუბრობდა და დადგენილების დროებით შეჩერებას ითხოვდნენ. თუმცა, ჯანდაცვის სამინისტრომ სამედიცინო საზოგადოების აზრი არ გაითვალისწინა. კლინიკების წარმომადგენლები ამტკიცებდნენ, რომ დადგენილებით განსაზღვრული ერთიანი ტარიფი სამედიცინო მომსახურების თვითღირებულებაზე დაბალია და შედეგად პაციენტებისთვის ხარისხიანს მომსახურების გაწევას ვეღარ შეძლებდნენ. პირველადი უარყოფითი შედეგის შემდეგ საპარლამენტო ფრაქცია „დამოუკიდებელი დეპუტატები“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პარლამენტში მისვლას ითხოვენ. დეპუტატებთან ერთად ეკატერინე ტიკარაძისთვის კითხვების დასმას ჰოსპიტალური სექტორის წარმომადგენლებიც გეგმავენ. როდის მივა ჯანდაცვის მინისტრი პარლამენტში ჯერჯერობით უცნობია.
ბაჩო ადამია