კორონავირუსის გამო კლინიკა “გული” 10 დეკემბრამდე დაიხურა. კლინიკის ინფორმაციით, დაიხურა რეანიმაცია, ინტენსიური, ემერჯენსი, დიაგნოსტიკა და მხოლოდ კარდიოქირურგია ფუნქციონირებს. ინფიცირებულია კლინიკის დირექტორიც ანზორ მელიაც.
კლინიკა გულის 25 წლიან ისტორიაში პირველად ვართ ასეთ მძიმე მდგომარეობაში.
მიუხედავად ჩვენ მიერ მკაცრი და დროული ღონისძიებების გატარებისა, როგორც სხვა კლინიკებში, ასევე ჩვენს კლინიკაშიც გავრცელდა ვირუსი.
დაიხურა რეანიმაცია, ინტენსიური, ემერჯენსი და დიაგნოსტიკა, ფუნქციონირებს მხოლოდ კარდიოქირურგია.
ჩვენი ექიმები მზად არიან პაციენტებს გაუწიონ სატელეფონო კონსულტაცია.
მადლობას გიხდით ერთგულებისა და მოთმინებისთვის. - აცხადებს ანზორ მელია კლინიკის ოფიციალურ გვერდზე.
როგორც ანზორ მელიამ „პრაიმტაიმთან“ განაცხადა ინფექციის გავრცელების წყარო პაციენტი იყო, რომელმაც მოიტყუა, რომ სიცხე არ ჰქონია.
„ჩვენ 10 დეკემბრამდე დავიხურეთ, რადგან თითქმის ყველა ექიმის კოვიდი აქვს, მეც კოვიდი მაქვს, სასწრაფო მთლიანად ინფიცირებულია. სულ 200-მდე თანამშრომელი გვყავს, ინფიცირებულია 40 ექიმი, 45 ექთანი და 30 სანიტარი. მათგან ზოგი სასტუმროში მკურნალობს, ზოგი სახლში. სახლში ვმკურნალობ მეც, იზოლაციაში ვარ, ჩემი ჯანმრთელობის მდგომარეობა სტაბილურია. ინფიცირებულია, ასევე, ჩვენი ტექნიკური პერსონალი.
ჩვენ მკაცრი ზომები მივიღეთ კოვიდის დაწყებიდან, მაგრამ ვირუსი შემოგვეპარა. ვირუსი ჩვენთან ავადმყოფმა მოიტანა, მოგვატყუა, რომ სიცხე არ ჰქონია და თურმე, ამ ავადმყოფს ოთხი დღე სიცხე ჰქონდა. როცა გაურთულდა ჯანმრთელობის მდგომარეობა, თქვა, რომ ოთხი დღეა, რაც სიცხე მაქვსო. ახლა მისი მდგომარეობა სტაბილურია, მაგრამ ჩვენ გადმოგვადო ვირუსი“, - განაცხადა მელიამ.
imedinews.ge