სექტემბრის ბოლოს ქართული პრენდი ,,კირკე“ საქმიანობას საკუთარ სახელოსნოში გააგრძელებს. ჰიგიენისა და თავის მოვლის საშუალებების მწარმოებელმა მცირე საწარმომ ამისთვის სააგენტო ,,აწარმოე საქართველოში“ 20 000-ლარიანი გრანტი მოიპოვა. საწარმოს დამფუძნებელია ნანა თავხელიძე, რომელიც 4 წელია, ამ ბიზნესში აქტიურად არის ჩართული.
ფარმაცევტულ ბაზარზე 20-წლიანი საქმიანობის შემდეგ მან წარმატებით შეძლო მიღებული გამოცდილება ბიზნესად ექცია და სტარტი აეღო როგორც ჰიგიენური, ასევე სამკურნალო საშუალებების წარმოებაში, რომელიც უკვე ასობით მომხმარებელს ემსახურება და ერთ-ერთი მსხვილი კომპანიის შეკვეთებსაც იღებს.
მიღებული დაფინანსება მეწარმეს წარმოების გაფართოებაში დაეხმარება, რაც გულისხმობს სამუშაო ინვენტარის განახლებასაც, ეს არის საპნის ფორმები, მრავალსიმიანი საჭრელები, კოსმეტიკის დასამზადებელი დანადგარები, ასევე საშრობი თაროები და სხვა საჭირო ინვენტარი, რათა მწარმოებლის საკუთრებაში არსებული ფართი სახელოსნოდ იქცეს.
,,ნატურალური საპნების მიმართულებით მაქვს ყოველდღიური მოხმარების, სახის, ტანის, თმის (შამპუნი-საპნები) დასაბანი მყარი და თხევადი საპნები. ვამზადებ სამკურნალო დანიშნულებით შემდეგ საპნებს: კუპრის, გოგირდის, ნახშირის საპნებს. ცოტა ძნელია, მაგრამ ვცდილობ, ადგილობრივ ნედლეული გამოვიყენო. მოვძებნე და აქტიურად ვიყენებ: ქართული წარმოების აბრეშუმის კოკონს, ასევე „ნუკრიანის ლავანდა“-ს პროდუქტებს: ლავანდის ეთერზეთს, ლავანდის, სალბის (შალფეი) და უსუპის ჰიდროლატებს. ისინი ჩემი კოსმეტიკის აუცილებელი კომპონენტებია. ასევე „ქართული ზეთისხილი“-ს ზეთს, რომელიც თითქმის ყველა საპნის შემადგენლობაშია. კოსმეტიკურ კრემებში ჯერ-ჯერობით მაქვს ვირის რძით დამზადებული 5 პროდუქტი: დღის ანტიასაკობრივი კრემი, მკვებავი კრემი, ხელის კრემი, ტანის კრემი და კრემი გაუხეშებული ქუსლებისათვის. ახლა ინვენტარის ძიების პროცესში ვარ, ძალიან მალე მომიწევს საქმიანობის გაგრძელება საკუთარ სახელოსნოში, თითქმის ბოლომდე გავედით“, - ამბობს მეწარმე.
ნანა თავხელიძის თქმით, სექტემბრის ბოლოს სახელოსნო მზად იქნება. მანამდე, 6 სექტემბერს, ,,აწარმოე საქართველოში“ ბენეფიციარს სააგენტოსთვის ანგარიშის წარდგენა მოუწევს, რისთვისაც მზადაა.
ამ ეტაპზე ,,კირკეს ბრენდის ქვეშ არსებული პროდუქციის ექსპორტზე გატანა არ ხდება, თუმცა კომპანიას ყავს აქტიური დამკვეთი ვირის რძის საპნების 10 მდე სახეობისა, რომლებიც საპნის რეალიზებას უცხოეთში ახდენენ. ადგილობრივ ბაზარზე პროდუქციის რეალიზაცია ძირითადად ონლაინ გაყიდვებით ხორციელდება. ამასთან, სამეწარმეო მარკეტებში თითქმის ყველგან აქტიურად არის წარმოდგენილი.
როგორც მცირე მეწარმე ამბობს, აქამდე თვეში 2000 ლარამდე პროდუქციის გაყიდვას ახერხებდა და სახელოსნოს ფუნქციონირების შემდეგ შეძლებს, რომ ეს მაჩვენებელი წლის ბოლომდე, მინიმუმ, გააორმაგოს.
მარი ჩიტაია