მთავრობა ნენსკრა ჰესის მშენებელ კომპანიასთან წლის ბოლომდე შეთანხმებას გეგმავს. როგორც მთავრობის სხდომის დასრულების შემდეგ, ეკონომიკისა და მდგრადი განვითარების მინისტრმა აღნიშნა, შერჩეულია კორეული სახელმწიფო კომპანია K-Water, რომელთან დაკავშირებითაც, მთავრობა მზად არის მხარი დაუჭიროს, თუკი მზად იქნება, პროექტი განახორციელოს და ახალ ვადებში რეალური შედეგი დადოს.

„კიდევ ერთი შანსი მივეცით კომპანიას და წლის დასაწყისიდან დავიწყეთ მოლაპარაკებების პროცესი, პირობებიც განვაახლეთ. ეს პირობები თავიდანვე კონკურსით იყო განსაზღვრული, მაგრამ ვნახეთ, რომ სატარიფო ნაწილში სახელმწიფოს სრული უფლება ჰქონდა, უკეთესი ტარიფი მოეთხოვა. ვფიქრობ, ეს სამართლიანია, რადგან ამდენი ხანი კომპანიამ ვალდებულებები ვერ შეასრულა და საქართველოს ეკონომიკა განუხორციელებელი პროექტით დააზიანა. იმედი მაქვს, მზად იქნებიან მთავრობის მიერ შეთავაზებული პირობები მიიღონ და პროექტი განაგრძონ. როგორც იცით, პრემიერთან შედგა შეხვედრა, ასეთ დონეზე შეხვედრები არ ხდებოდა და პრობლემები ალბათ კომუნიკაციის ხარისხთანაც იყო დაკავშირებული”,- განაცხადა ლევან დავითაშვილმა.

მინისტრის განმარტებით, ხელშეკრულებაში მკაფიოდ იყოს განსაზღვრული, რომ თუ კომპანია პირობებს ვერ შეასრულებს, მაშინ მთავრობას სრული ლეგიტიმური უფლება აქვს ხელშეკრულების შეწყვეტის პროცესი დაიწყოს.

„განწყობილი ვართ,  მუშაობის გაგრძელებსა და პროექტის განხორციელებისთვის, მაგრამ მნიშვნელოვანია კომპანია მზად იყოს. წლის ბოლომდე უნდა შევთანხმდეთ, რადგან მომავალ წელს მეტი დრო აღარ გვექნება, იმიტომ რომ შემდეგ წელს პროექტი უნდა განხორციელდეს”,- აღნიშნა ეკონომიკისა და მდგრადი განვითარების მინისტრმა.

შეგახსენებთ, რომ ნენსკრას ჰიდროელექტროსადგურის პროექტის მთავარი ინვესტორი კორეის წყლის რესურსების კორპორაცია K-Water-ია. მას “ნენსკრა ჰიდროში” 91.9%-იანი წილი უჭირავს, 8.1%-იან აქციონერს კი, “საპარტნიორო ფონდი” წარმოადგენს. ბოლო მონაცემებით, ნენსკრაჰესის მშენებლობის დასრულების შესაძლო თარიღმა 2027 წლისთვის გადაინაცვლა.