საქართველოში საჯარო სექტორი კვლავ რჩება ზოგადი განათლების მთავარ მიმწოდებლად, თუმცა კერძო სკოლებში მოსწავლეების რაოდენობა ყოველწლიურად იზრდება (2.8% CAGR 62.8 ათასამდე 2009-19 წლებში).
G&T-ის კვლევის მიხედვით, კერძო სკოლების პოპულარობის მთავარი მიზეზი მომხმარებლის აღქმით მათ მიერ შეთავაზებული განათლების უფრო მაღალი ხარისხია. საქართველოში მოსწავლეების 10.6% სწავლობს კერძო სკოლებში 2019/20 სასწავლო წლის მდგომარეობით, როცა იგივე მაჩვენებელი 2009/10 წელს იყო 7.6%. ზოგად განათლების სექტორში კერძო სექტორის წილით საქართველო მნიშვნელოვნად უსწრებს შესადარის ქვეყნებს რეგიონში (2.5%).
კერძო განათლება საქართველოში ფართოდ ხელმისაწვდომი არ არის: კერძო სკოლაში ერთი ბავშვის სწავლება ოჯახის შემოსავლის საშუალოდ 25%-ს მოითხოვს.
„ქვეყნის ეკონომიკურ განვითარებასა და შინამეურნეობების შემოსავლების ზრდასთან ერთად კერძო სკოლები უფრო ხელმისაწვდომი გახდება ქართველი მოსახლეობისთვის. ურბანიზაცია ხელს უწყობს კერძო სკოლებში ჩარიცხვის ზრდას, რადგან ქალაქებში მოსახლეობის შემოსავლები შედარებით მაღალია და გადახდისუნარიანი მოსახლეობაც უფრო მრავალრიცხოვანია. თბილისი, ბათუმი და ქუთაისი ყველაზე მიმზიდველი ბაზრებია კერძო სკოლებისთვის, შესაბამისად 18.6%, 19.8% და 11.9% კერძო ჩარიცხვების წილით, 2019 წლის მონაცემებით. ურბანიზაციის ზრდით მოსალოდნელია, რომ კერძო სკოლებზე მოთხოვნა გაიზრდება და 2024 წლისთვის მოსწავლეთა რაოდენობა 73.2 ათასს მიაღწევს (ჯამური რაოდენობის 11.5%)“, - ნათქვამია კვლევაში.