კორონავირუსის მართვაში კერძო სადაზღვევო კომპანიები დღეიდან ერთვებიან, ამის შესახებ ჯანდაცვის მინისტრმა ეკატერინე ტიკარაძემ განაცხადა.

„ჩვენი მოქალაქეები საკმაოდ მაღალ ანაზღაურებას იხდიან თავიანთ დაზღვევაში და შესაბამისად, ეს ვალდებულება ყველა სადაზღვეოს აქვს. ასევე ეს ვალდებულება აქვთ იმ ექიმებს, რომლებიც ამ პროგრამაში არიან ჩართულები“,- აღნიშნა ჯანდაცვის მინისტრმა ეკატერინე ტიკარაძემ.

აღნიშნულ საკითხზე შეხვედრა ჯანდაცვის მინისტრმა, ეკატერინე ტიკარაძემ სადაზღვევო კომპანიებთან რამდენიმე დღის წინ გამართა.

„სადაზღვევო ასოციაციის“ ხელმძღვანელი დევი ხეჩინაშვილი „კომერსანტთან“ საუბრისას აღნიშნავს, რომ კერძო სადაზღვევო კომპანიები კოვიდით ინფიცირებული მსუბუქ სიმპტომიანი პაციენტების მართვაში ჩაერთვებიან. მისი თქმით, შესაბამისი პროტოკოლი უკვე არსებობს.

„პირველ ეტაპზე სადაზღვევოები მსუბუქ სიმპტომიანი პაციენტების სახლში მართვაში ჩაებმებიან, ამის პროტოკოლი და ყველა მნიშვნელოვანი დოკუმენტი, რომლის შესაბამისადაც დაავადების მართვა მოხდება უკვე არსებობს და სამინისტროს დამტკიცებული აქვს. სადაზღვევოებმა იმ ოჯახის ექიმების რაოდენობა, რომლების ამ საქმიანობისთვის გამოთავისუფლება შეუძლიათ, განიხილეს და მათი სია სამინისტროს გადასცეს.

სამინისტრო აყენებს პროგრამას, რომლის მეშვეობითაც ადამიანი 112-ში დარეკავს და 112 მას ონლაინ კლინიკაში გადაამისამართებს. ონლაინ კლინიკა ნახავს დაზღვეულია თუ არა ეს ადამიანი რომელიმე კერძო სადაზღვევოში და შემდეგ მას კომპანიის ოჯახის ექიმს დააკავშირებს. ეს არის ის  სქემა, რომელიც ეხება მსუბუქ სიმპტომიანი ადამიანების სახლში მართვას.

ამ ეტაპზე იმ რაოდენობის ოჯახის ექიმები ჩაერთვებიან დაავადების სახლში მართვაში, რომლებიც სადაზღვევო კომპანიებს დაკონტრაქტებული ჰყავთ. რა თქმა უნდა სადაზღვევო კომპანიები ამისთვის ყველა ექიმს ვერ გამოყოფენ, რადგან ბევრი სხვა ქრონიკული დაავადებების მქონე ადამიანია დაზღვეული და მათაც სჭირდებათ ყოველდღიური მართვა“, - აცხადებს დევი ხეჩინაშვილი.

დევი ხეჩინაშვილი აღნიშნავს, რომ პირველ ეტაპზე სადაზღვევო კომპანიები Covid 19-ის მართვაში ჩართვისთვის საჭირო ხარჯებს თვითონ დაფარავენ, თუმცა თუ სიტუაცია დამძიმდა და კადრების დამატება გახდა საჭირო, შესაძლოა სახელმწიფოს მხრიდან დაფინანსების საკითხი დადგეს.

„ჯერჯერობით სადაზღვევო კომპანიები ოჯახის ექიმების ხარჯს თვითონ ფარავენ, ასევე იმ მარტივი წამლების ხარჯსაც, რომელსაც მსუბუქ სიმპტომიანი პაციენტები საჭიროებენ. ამ ეტაპზე სახელმწიფოს მხრიდან ფინანსები საჭირო არ არის, რადგან ჩვენ ეხლა იმ ეტაპზე ვართ, რომ რაც შეგვიძლია ყველაფერი უნდა გავაკეთოთ, რათა ერთმანეთს და სახელმწიფოს დავეხმაროთ, მეც და ჩემი კოლეგებიც ასე ვფიქრობთ. თუმცა, თუ სიტუაცია  გართულდა მათ შორის იმ თვალსაზრისითაც, რომ უკვე საშუალო სიმძიმის პაციენტები დარჩებიან  სახლში,  ისეთები რომლებიც დღეს ჰოსპიტალში მიდიან, ამისთვის მათი მართვის პროტოკოლი უნდა შეიქმნას და მათ მართვას ექიმების რაოდენობის გაზრდაც დასჭირდება. ვფიქრობ, რომ იქ უკვე უნდა დადგეს დაფინანსების საკითხი.

ახლა უკვე აქტიურად უნდა ვიმუშავოთ ოჯახის ექიმის და პერსონალის დამატებაზე, რადგან სიტუაციის დამძიმების შემთხვევაში ამდენი არც კვლევა, არც რენტგენი და არაფერი არ გვეყოფა. თუმცა ამ ეტაპზე, რაზეც უკვე გვქონდა საუბარი, გულისხმობს იმას, რომ სახლში იმართება მხოლოდ უსიმპტომო პაციენტები და ამ ყველაფერს თვითონ სადაზღვევოები ანაზღაურებენ“, - განმარტავს დევი ხეჩინაშვილი.