სანქციები ერთ-ერთი ინსტრუმენტია და თქვენ ნახეთ აშშ-ის საელჩოს მიერ გავრცელებულ განცხადებაში, ასევე აშშ-ის სახელმწიფო დეპარტამენტისა და სახელმწიფო მდივნის განცხადებებში, რომ ჩვენ ვართ ძალიან, ძალიან იმედგაცრუებულები, - ამ განცხადებით საქართველოში აშშ-ის ელჩმა კელი დეგნანმა უზენაესი სასამართლოს მოსამართლეობის კანდიდატების არჩევის პროცესი შეაფასა.
„საქართველოს პოლიტიკური ლიდერები, მათ შორის მმართველი პარტია, შეთანხმდნენ, რომ მოსამართლეების დანიშვნა შეჩერდებოდა ფართო, ინკლუზიური და მრავალპარტიული სასამართლო რეფორმის განხორციელებამდე, რაც ჯერ არ განხორციელებულა და სწორედ ამიტომ ვართ იმედგაცრუებულები ამ მოსამართლეების დანიშვნით. პარლამენტს შეეძლო დაეპაუზებინა ეს პროცესი“, - განაცხადა კელი დეგნანმა.
დიპლომატმა საქართველოს ხელისუფლებას მოუწოდა, სერიოზულად განიხილოს აშშ-ის მთავრობის მიერ გაკეთებული განცხადებები.
„აშშ-ის მთავრობის, მათ შორის სახელმწიფო მდივნის მიერ გავრცელებული განცხადებები, ნაჩქარევად გაკეთებული არ არის. ეს არის საქართველოს სტრატეგიული პარტნიორების მიერ გამოგზავნილი შეშფოთების გამომხატველი გზავნილები, რომელიც სერიოზულად უნდა იქნას განხილული და არ უნდა იქნას უგულვებელყოფილი, როგორც ნაჩქარევად გაკეთებული განცხადებები“, - განაცხადა დეგნანმა.
5–6 ივლისის ძალადობრივ აქციებთან დაკავშირებით კიდევ ერთი განცხადება გააკეთა აშშ–ის ელჩმა
„ძალადობა მიუღებელია. საჭიროა მკაფიო, ძლიერი გზავნილი საქართველოს ხელისუფლებისგან, რომ ამას ექნება შედეგები მათთვის, ვინც ეს ძალადობა წაახალისა და ვინც ძალადობრივად დაესხა თავს მოქალაქეებს, რომლებიც მშვიდობიანად სარგებლობენ თავიანთი კონსტიტუციური უფლებით“, - აღენიშნა დეგნანმა.
„თუკი არ იქნება მკაფიო შედეგები, მკაფიო გზავნილები იმის შესახებ, რომ ძალადობა არ იქნება შეწყნარებული, ეს კიდევ მეტი ძალადობისკენ წახალისება იქნება. იმ მოქალაქეებისთვის დაცული და უსაფრთხო გარემოს უზრუნველყოფა, რომლებიც თავიანთ კონსტიტუციურ უფლებას იყენებენ, ნებისმიერი მთავრობის ფუნდამენტური პასუხისმგებლობაა“, - განაცხადა ელჩმა.
კელი დეგნანი. 5 ივლისი
