კახეთში საექსპორტო ხარისხის ატმის ფასი ბოლო დღეებში საგრძნობლად გაიზარდა. რეგიონი ამ ხილის ბაზარზე მთავრი მიმწოდებელია.

დღეის მდგომარეობით, რეგიონის სამაცივრე მეურნეობებში ადგილობრივი ფერმერებისგან კილოგრამ ატამს 2,2–2,5 ლარად ყიდულობენ.

შედარებისთვის, ივლისის პირველ რიცხვებში, როდესაც კახეთში ატმის რთველი აქტიურ ფაზაში შევიდა, 1 კგ ატმის შესასყიდი ფასი 1–1,4 ლარს შეადგენდა.

დღეისათვის საექსპორტო ატმის დამზადებით კახეთში 39 სამაცივრე მეურნეობაა დაკავებული, რომლებიც სრული დატვირთვით მუშაობენ.

„რეგიონის ტერიტორიაზე ამჟამად მოქმედი 39 სამაცივრე მეურნეობა ერთმანეთთან კონკურენციაში არიან. ამას ემატება მოთხოვნის ზრდა შიდა ბაზარზე. სწორედ ეს განაპირობებს ფასების დონეს. აღსანიშნავია, რომ ექსპორტიორები საზღვარგარეთ ქართული ატმის ცნობადობის ზრდაზე მიუთითებენ. ქართული ატამი გარეგნულად დიდად არ განსხვავდება სხვა ქვეყნების ნაწარმისგან, მაგრამ უცხოელი მომხმარებლები ქართულ ატამს გემოვნური თვისებების გამო ანიჭებენ უპირატესობას“, – აღნიშნა „გურჯაანიTV“–სთან ინტერვიუში სოფლის მეურნეობის სამინისტროს წარმომადგენელმა ვანო ბასილაშვილმა.

მისივე თქმით, სამაცივრე მეურნეობებს ქართული ატმის რეალიზაციის პროცესში გადამწყვეტი როლი აქვთ.

სოფლის მეურნეობის სამინისტროს მონაცემებით, 1–ლი მაისიდან 18 ივლისის ჩათვლით საქართველოდან ექსპორტზე, ჯამში, 15 069 ტონა ატამი გავიდა, რაც წინა წლის ანალოგიური მერიოდის მაჩვენებელს 67%–ით აღემატება. ფულად გამოსახულებაში ექსპორტმა $13,322 მლნ შეადგინა – 65%–ით მეტი წინა წლის

ანალოგიურ მაჩვენებელზე.

ქართული ატმის ძირითადი საექსპორტო ბაზრებია რუსეთი, სადაც 9 378 ტონა ატამი გავიდა (მთლიანი ექსპორტის 62%) და სომხეთი – 4 757 ტონა (32%).  საანგარიშო პერიოდში ატამი უკრაინაშიც გავიდა (337 ტ.), ასევე აზერბაიჯანში (269 ტ.), მოლდოვაში (116 ტ.), ბელარუსში (99ტ.), ყაზახეთში (95 ტ.) და სლოვენიაში (18 ტ.).

EastFruit