კახაბერ ცისკარიძე საკუთარი დიზაინით ტანსაცმელს უკვე სამი წელია კერავს, თუმცა ივლისის დასაწყისში მომღერალმა ბათუმში Kakhaberi Clothing-ის ბრენდის შოურუმი გახსნა. შოურუმი ტრანსფორმირებადი სივრცეა, სადაც ეწყობა მუსიკალური ღონისძიებებიც და გაიმართება ფერწერული გამოფენებიც. კახაბერის ტანსაცმლის კოლექციაში წარმოდგენილია ორი მიმართულება, რომელიც განსხვავდება ფასითა და სტილით. ძირითადი აქცენტი გაკეთებულია მუსიკაზე , ხოლო ბრენდის  დევიზია Share my comfort-გააზიარე ჩემი კომფორტი.

„სამი წელია ტესტირებას გადის ეს სამოსი, ვაყალიბებდით რა ფორმით, ხარისხით და შემადგენლობით უნდა ყოფილიყო და ცოტა ხნის წინ პირველი შოურუმი გავხსენით ბათუმში, ჩემს მშობლიურ ქალაქში. კოლექციაში არის ორი მიმართულება -  ერთი არის თავისუფალი სტილი, რომელიც არის UNISEX-ი და იკერება ბავშვებისთვისაც. ეს მიმართულება მოიცავს შორტებს, შარვლებს, მაისურებს,  ყაბალახებს, ხოლო ფასი 50- ლარიდან 250 ლარამდე მერყეობს. მეორე მიმართულება კი არის უფრო ძვირადღირებული და ფასი 300 ლარიდან იწყება. ეს ხაზი შეკვეთით იკერება.

 უნდა აღინიშნოს, რომ უკვე ძალიან მოთხოვნადია ჩვენი მსუბუქი თავისუფალი ხაზი არა მარტო უცხოელებში, არამედ ადგილობრივებისთვისაც.  ეს არ არის მხოლოდ სამოსის შოურუმი, სივრცე არის ტრანსფორმირებადი, სადაც სხვადასხვა ხელოვანების ღონისძიებები გაიმართება. აქვე წარმოდგენილია დედა სიდონიასთან კოლაბორაციით შექმნილი აქსესუარები,“ - განმარტავს კახაბერ ცისკარიძე.  

გარდა ბრენდის წარდგენისა, მომღერალმა ოთხ ალბომზე იმუშავა. კახაბერ ციხკარიძე საქართველოში პირველი მომღერალია, რომელმაც საკუთარი ტანსაცმლის ბრენდი შექმნა.

„თბილისში ჯერჯერობით არ ვგეგმავ შოურუმის გახსნას, თუმცა არაფერია გამორიცხული. ამ ეტაპზე, მნიშვნელოვანია კოლექციამ ბათუმში გაიაროს ტესტირების რეჟიმი. როგორც ვაკვირდებით, გაყიდვების მაჩვენებელი საკმაოდ მაღალია. ფინანსურად შედეგების განხილვას უკვე თვის ბოლოს შევძლებთ. ძალიან პროდუქტიული იყო ჩემთვის პანდემიის პერიოდი და იზოლაცია. გვაქვს ვიდეორგოლი საგალობლებზე და მალე დარელიზდება მსოფლიოს მასშტაბით. ამას გარდა, კიდევ სამი ალბომია მომზადებული, ორი კი - დასრულებულია,“ - ამბობს მომღერალი და დიზაინერი.

სამოსი ქართული ელემენტებითაა გაჯერებული, თუმცა თანამედროვე ელფერით. მომღერალი აღნიშნავს, რომ ბრენდის ახალი კოლექციებით მყიდველს საკუთარ კომფორტს უზიარებს.

მარიამ მორგოშია