„ქართულ ოცნებას“ პანიკურად ეშინია ახალი საპარლამენტო არჩევნების. ხელისუფლება დღეს ზომავს ჩვენი ხალხის მოთმინებას და ეს ცუდი იდეაა. არ ვიცი, ამას სიგრძით ზომავენ თუ სიგანით, მაგრამ ძალიან ცუდად ამთავრებს ყველა ის ხელისუფლება და ამ შემთხვევაში „ქართული ოცნება“, ვინც საკუთარი ხალხის მოთმინებას ზომავს“, — ამის შესახებ პარტიის „პროგრესი და თავისუფლება ლიდერი“ კახა ოქრიაშვილმა განაცხადა.
პარტიის „პროგრესი და თავისუფლება ლიდერი“ მოლაპარაკებების მეორე რაუნდის წინ ხალხს გარეთ გამოსვლისკენ და თავისი პოზიციის დაფიქსირებისკენ მოუწოდებს.
„ქართულ ოცნებას“ დათმობისკენ წამოიყვანს ხალხი და ხალხის რეაქცია. თუ ხალხს მოსწონს სიდუხჭირეში, უსამართლობასა და უპერსპექტივობაში ცხოვრება, ეს სხვა საკითხია, მაგრამ მე ასე არ ვფიქრობ. ხალხი უნდა გამოვიდეს გარეთ და დააფიქსიროს თავისი პოზიცია - რომ საჭიროა ახალი არჩევნები, ყოველგვარი არეულობის, რევოლუციების გარეშე, წყნარად და მშვიდად უნდა გადმოვიბაროთ ხელისუფლება, რადგან ჩვენ ვიცით, როგორ გავაორმაგოთ ეკონომიკა, 5-7 წლის განმავლობაში ორჯერ გავზარდოთ მინიმალური და საშუალო ხელფასი და შევქმნათ 10 0000-ობით ღირსეული სამუშაო ადგილი. „ქართულ ოცნებას“ უნდა ესმოდეს, რომ ხალხი ქუჩაში ოპოზიციას კი არა, ხელისუფლებას და მის უნიათობას გამოჰყავს. გაზომონ ჩვენი ხალხის მოთმინება და მალე დაინახავენ, რაც მოუვათ, ქართველი ხალხის მხრიდან!“, — ამბობს კახა ოქრიაშვილი.
კახა ოქრიაშვილი მეორე რაუნდზე წინ ნიკა მელიაზე საუბრობს და საქართველოს შესახებ სენატში გამართულ მოსმენას აჯამებს. მისი თქმით, მელიას რომც უნდოდეს გირაოს გადახდა, დღეს ეს არ შეუძლია.
„ერთადერთი შენიშვნა გამოითქვა ოპოზიციის მხარეს სენატის მოსმენაზე - მათ თქვეს, რომ ნიკა მელიას არ უნდა მოეხსნა და გადაეგდო სამაჯური. თუმცა „ქართული ოცნება“ ამბობს, რომ მელიას შეუძლია გადაიხადოს გირაო და ციხიდან გამოვიდეს. დღეს ქართული ოცნება ამ ტყუილს ავრცელებს! მელიას რომც უნდოდეს გირაოს გადახდა, დღეს ეს არ შეუძლია. პროცედურა შემდეგნაირია - პროკურატურამ უნდა მიმართოს სასამართოს შესაბამისი შუამდგომლობით, სასამართლომ იგი უნდა გაიზიაროს და მელიას მისცეს ვადა თანხის გადასახდელად, იქნება ეს 1 დღე, თუ 1 თვე, რაც ასევე არ არის გაკეთებული. აქედან გამომდინარე, „ოცნება“ ცრუობს, თითქოს ყველაფერი მელიას ხელშია, რადგან ხელისუფლების ხელშია პროკურატურა და სასამართლოც! მხოლოდ ამის მერე ექნება მელიას არჩევანის საშუალება, გამოვა თუ არა ციხიდან“, — აცხადებს ოქრიაშვილი.
®