“პირველ რიგში, გაერთიანებულმა ოპოზიციამ მიიღო სწორი გადაწყვეტილება, ჩაატაროს კვლევა და ჰკითხოს აზრი საკუთარ ამომრჩეველს. კიევში ბატონ მელიასთან და ბატონ სააკაშვილთან შეხვედრაზე, რომელსაც ვესწრებოდი, როგორც პარტნიორი პარტიის „პროგრესი და თავისუფლება“ ლიდერი, ეს საკითხიც იქნა განხილული.” - ამის შესახებ განცხადებას პარტიის “პროგრესი და თავისუფლება”ლიდერი კახა ოქრიაშვილი ავრცელებს. 

მისი თქმით კვლევის შედეგებს პარტიის არჩეული თავმჯდომარე რამდენიმე დღეში გაასაჯაროებს.

“ჩვენ განვიხილეთ სამი გზა - პარლამენტში შესვლა, არშესვლა და ე.წ. ჰიბრიდული ვარიანტი, რომელიც გულისხმობს არშესვლას, მაგრამ მუშაობას მხოლოდ ორი საკითხის, სასამართლო და საარჩევნო ადმინისტრაციის რეალური რეფორმის გარშემო.

რაც შეეხება ჩემს პირად მოსაზრებას, მე არ ვაპირებ პარლამენტში ისე შესვლას, როგორც ეს დანარჩენმა პარტიებმა გააკეთეს: არ ვაპირებ ფრაქციის შექმნას, უარს ვამბობ ყველანაირ თანამდებობასა და პარლამენტარის ხელფასზე, ვერ წარმომიდგენია მუშაობა კომიტეტებში.

შექმნილ ვითარებაში, ჩემთვის მისაღებია მესამე, ჰიბრიდული ვარიანტი, შემოდგომის 43%-იან პლებისციტამდე, მაგრამ თუ „ქართული ოცნება“ პლებისციტის შედეგებსაც ისევე გაგვიყალბებს, როგორც ეს 2020 წლის საპარლამენტო არჩევნებზე გააკეთა, მაშინ ხალხიცა და ოპოზიციაც ქუჩაში უნდა გავიდეთ!“ - აცხადებს კახა ოქრიაშვილი