კანონპროექტზე, რომელშიც დახმარების 15%-იანი შესაძლო გაყინვაა ნახსენები, თავიდან ძალიან არასწორი ინფორმაცია გავრცელდა. ეს იყო მოსახლეობის შეცდომაში შეყვანის მცდელობა, თითქოს სანქციები დაწესდა,რაც არის ტყუილი, - ამის შესახებ ტელეკომპანია „იმედის“ გადაცემაში „დღის ქრონიკა“ პარლამენტის თავმჯდომარის მოადგილემ, საპარლამენტო უმრავლესობის წევრმა, კახა კუჭავამ განაცხადა.

„საქართველოს მხარდამჭერი ჩანაწერები ამ აქტებში სწორედ „ქართული ოცნების“ მმართველობის დროს გაჩნდა. ეს ძალიან დიდი მიღწევაა და იმ სტრატეგიული ურთიერთობების აღიარება, რომელიც ჩვენს ქვეყნებს აკავშირებს. აშშ-ში კანონპროექტი ძალიან დიდ გზას გადის, ახლა ეს დოკუმენტი სენატში არის დამტკიცებული. შემდეგ ეტაპზე ეს დოკუმენტი უნდა შეჯერდეს წარმომადგენელთა პალატის მიერ მიღებულ დოკუმენტთან და ამის შემდეგ საბოლოო ვერსია გაეგზავნება ხელმოსაწერად პრეზიდენტს. მეორე კანონპროექტზე, რომელშიც 15%-იანი შესაძლო გაყინვაა ნახსენები, თავიდან ძალიან არასწორი ინფორმაცია გავრცელდა. ეს იყო მოსახლეობის შეცდომაში შეყვანის მცდელობა, თითქოს სანქციები დაწესდა,რაც არის ტყუილი. ქვეკომიტეტის დონეზე დარეგისტრირდა ცვლილებები, რომლებიც იმ სახით არც გავიდა და როგორი იქნება საბოლოო ჯამში ეს ასიგნებების შესახებ კანონპროექტი, ჯერ კიდევ უცნობია. იგივე კანონპროექტი შემდეგ სენატმა (ქვეკომიტეტი, კომიტეტი, პლენარული სესია) უნდა განიხილოს, შემდეგ ორი დოკუმენტის შეჯერება მოხდება და ის გაეგზავნება პრეზიდენტს. თუმცა უნდა აღვნიშნოთ იცის, რომ ამერიკაში საპრეზიდენტო არჩევნებია დაგეგმილი და ამ პერიოდში კანონპროექტების განხილვა ხშირად იწელება. ამიტომ იმის თქმა, რომ ხვალ ან ზეგ მიიღებენ რაღაც საშინელ კანონს, არის ტყუილი. მეტიც, კანონპროექტი ამ ფორმით რომც გავიდეს, ეს არ ნიშნავს, რომ დახმარების 15% გაიყინება. გარკვეული პერიოდის შემდეგ სახელმწიფო დეპარტამენტმა უნდა შეაფასოს, რამდენად შეასრულა საქართველომ ესა თუ ის ვალდებულება, მაგალითად, ერთ-ერთი ასეთი ვალდებულება იყო საარჩევნო რეფორმა, რომელიც უკვე გატარებულია და შეგვიძლია ვთქვათ, რომ ეს ერთი მოთხოვნა უკვე შესრულებულია“, - განაცხადა კუჭავამ.

2021 ფისკალური წლის აშშ-ის თავდაცვის ავტორიზაციის კანონპროექტი შეიცავს საქართველოს ტერიტორიული მთლიანობის, ევროატლანტიკური ინტეგრაციის, ქვეყნის თავდაცვისუნარიანობის განმტკიცების მიმართულებით ძლიერ მხარდამჭერ გზავნილებს.