„პიკის საათებში“, დაახლოებთ 15 მარშრუტია, დილით და საღამოს საათებში, როდესაც შეინიშნება ავტობუსებში ადამიანების გადაჭარბებული რაოდენობა და ამასთან დაკავშირებით დაწყებულია მუშაობა, - ამის შესახებ თბილისის მერმა კახა კალაძემ ჟურნალისტებს განუცხადა.

მისი თქმით, ორშბათს გახდება ცნობილი, რა გადაწყვეტილება იქნება მიღებული ამ საკითხთან დაკავშირებით. მისივე განმარტებით, შეზღუდვების თავიდან დაწესებაზე საუბარი ამ ეტაპზე არ არის.

კახა კალაძემ აღნიშნა, რომ მნიშვნელოვანია, საზოგადოებამ გამოიჩინოს სიფრთხილე.

„როდესაც საზოგადოებრივი ტრანსპორტით გადაადგილდები, არაა სასიამოვნო პირბადით გადაადგილება, მაგრამ ეს არის აუცილებელი იმისთვის, რომ ყველა ადამიანმა, ვინც სარგებლობს საზოგადოებრივი ტრანსპორტით, დაიცვას საკუთარი ჯანმრთელობა, გაუფრთხილდეს საკუთარ თავს, შვილებს, ოჯახს წევრებს და რა თქმა უნდა, ძალიან მნიშვნელოვანია, რომ ერთმანეთს გავუფრთხილდეთ.

არავინ იფიქროს, რომ ჩვენ ვირუსი დავამარცხეთ - „აუ რა მაგრები ვართ“ და „გამარჯვებულები ვართ“. არა მეგობრებო, ჩვენ გადავლახეთ და შევძელით ის, რომ ქვეყანაში არ განვითარდა მოვლენები ისე, როგორც ევროპის სხვადასხვა განვითარებულ ქვეყანაში. ეს მოვახერხეთ, მაგრამ ეს არ ნიშნავს იმას, რომ ვირუსი დავამარცხეთ“, - განაცხადა კახა კალაძემ.

მისივე თქმით, დაგეგმილია კიდევ რამდენიმე რეაბილიტირებული პარკის გახსნა.

„დღეს მზიურის პარკის გახსნაა, მომავალში კიკვიძის პარკი ნაძალადევის რაიონში, რომელიც ასევე ძალიან მაგარი გამოვიდა, ფაქტობრივად დასრულებულია სამუშაოები და იქაც რამდენიმე დღეში გავხსნით ამ პარკს. ვაკის პარკის რეაბილიტაცია გვაქვს დაგეგმილი. გლდანში ასევე, რამდენიმე პარკის რეაბილიტაცია იგეგმება.

გაძლევთ პირობას, რომ ჩვენი დედაქალაქი ევროპაში იქნება ყველაზე მწვანე, ყველაზე ლამაზი, ყველაზე უსაფრთხო, ყველაზე მოწესრიგებული ინფრასტრუქტურული თვალსაზრისითა და გამართული საზოგადოებრივი ტრანსპორტით. დარწმუნებული ვარ ჩვენ ამას შევძლებთ, ყველა ერთად. მარტო მერი, ან მერიის თანამშრომლები ვერაფერს ვერ გახდებიან. აქ ძალიან მნიშვნელოვანია ერთად დგომა და დარწმუნებული ვარ, ძალიან დიდი სოლიდარობა იქნება ამ მიმართულებით“, - განაცხადა კახა კალაძემ.