ბათუმში კავკასიის უნივერსიტეტის კამპუსის და სკოლის მშენებლობა დაიწყო, ორივე მათგანი თანამედროვე ინფრასტრუქტურით, ბიბლიოთეკით, ლაბორატორიებით, სპორტული მოედნითა და  საცურაო აუზით იქნება აღჭურვილი. კავკასიის უნივერსიტეტის ბათუმის საგანმანათლებლო სივრცეში სტუდენტების საერთო საცხოვრებლის აშენებაც იგეგმება, რომელიც დაახლოებით 1500 საერთაშორისო და ადგილობრივ სტუდენტზე და 800 -მდე საშუალო სკოლის მოსწავლეზე იქნება გათვლილი. ინვესტიციის ღირებულება 20 მილიონი ლარია.

         არქიტექტურული სტუდია ქომ ჰაივი . ©. 2020

დამატებითი დეტალების გასაკვევად „კომერსანტი“ კავკასიის უნივერსიტეტის დამფუძნებელს და პრეზიდენტს კახა შენგელიას დაუკავშირდა. ირკვევა, რომ შენგენელია ახალ უნივერსიტეტში მიმართულებებს ამატებს. ბათუმის კამპუსში სტუდენტები საზღვაო საქმეს და კულინარიას შეისწავლიან.

„ბათუმის კამპუსი გამორჩეული იქნება ინფრასტრუქტურითა და თანამედროვე ტექნოლოგიებით, ასევე დაემატება ახალი მიმართულებები, ესენია საზღვაო საქმე და კულინარიის აკადემია. კამპუსი როგორც ადგილობრივ ასევე ბევრ საერთაშორისო სტუდენტზე იქნება გათვლილი. ბათუმის საგანმანათლებლო სივრცის ინვესტიცია 20 მილიონ ლარს შეადგენს.“ -  აღნიშნავს კახა შენგელია.

კავკასიის უნივერსიტეტი ბათუმში საგანმანათლებლო პროგრამებს 2010 წლიდან სამართლის, ტურიზმის და ეკონომიკის მიმართულებით ახორციელებს. ბათუმის საგანმანათლებლო სივრცის მშენებლობა 2019 წელს აჭარის მთავრობის  ხელშეწყობით დაიგეგმა. როგორც კახა შენგელიამ „კომერსანტთან“ საუბრისას აღნიშნა,  კავკასიის უნივერსიტეტის ბათუმის საგანმანათლებლო სივრცის მშენებლობა 2022 წლის ბოლომდე დასრულდება და 2023 წლის სექტემბერში მოსწავლეების და სტუდენტების პირველი ნაკადის მიღებას შეძლებს.

კავკასიის უნივესიტეტის დამუძნებელმა ჩვენთან  სამომავლო გეგმებზეც ისაუბრა და აღნიშნა, რომ კავკასიის უნივერსიტეტი განვითარებას განაგრძობს და სამომავლოდ საგანმანათლებლო სივრცის დამატებას გურჯაანშიც გეგმავს.

კავკასიის უნივერსიტეტის ბათუმის კამპუსის პროექტზე საპროექტო სტუდია „ქომ გაივ“ -მა იმუშავა, პროექტის არქიტექტურა და დიზაინი კავკასიის უნივერსიტეტის კურსდამთავრებულს მარიტა ჭანჭალეიშვილს ეკუთვნის. კამპუსის მშენებლობას სამშენებლო კომპანია „დომსონი“ განახორციელებს, რომლის დამფუძნებელი ასევე კავკასიის უნივერსიტეტის კურსდამთავრებული ლევან ვადაქარიაა.

თაკო კვაჭანტირაძე