დაღესტნის ხელისუფლება იუწყება, რომ ბოლო დღეებში კასპიის ზღვის სანაპიროზე 2500 დაღუპული სელაპი აღმოაჩინეს. მათი დაღუპვის ზუსტი მიზეზი ჯერ დადგენილი არ არის, თუმცა რეგიონული ბუნების სამინისტრო ვარაუდობს, რომ ის ბუნებრივ ფაქტორებს უკავშირდება. ინფორმაციას BBC ავრცელებს.
„სამწუხაროდ, დაღუპული სელაპების რიცხვი მნიშვნელოვნად გაიზარდა და ამჟამად 2500-ს აღწევს. მიზეზები ლაბორატორიული კვლევების შემდეგ გახდება ცნობილი“, - ნათქვამია დაღესტნის ბუნების სამინისტროს ოფიციალურ ტელეგრამარხზე გამოქვეყნებულ განცხადებაში.
სააგენტო „ინტერფაქსი“ იტყობინება, რომ ჰიპოთეზა მათი მძიმე ლითონებით ან პესტიციდებით ინტოქსიკაციის შესახებ არ დასტურდება.
კასპიის კონსერვაციის ცენტრის დირექტორ ზაურ გაპიზოვის თქმით, ცხოველებს ძალადობრივი სიკვდილის ნიშნები არ ეტყობა და არც თევზსაჭერი ბადეების ნაშთები იქნა ნაპოვნი.
სელაპების დაღუპვის შესაძლო მიზეზების შესახებ რუსულ მედიაში რამდენიმე განსხვავებული ვარაუდი ჩნდება. ერთ-ერთი ვარაუდით, სელაპების დაღუპვის შესაძლო მიზეზი შეიძლება ხანგრძლივი ქარიშხალი იყოს.
Fontanka.Ru იუწყება, რომ კასპიის ზღვაში დიდი რაოდენობით ნავთობი და გაზია. ამიტომ, სელაპები სავარაუდოდ, წყალში ბუნებრივი აირის გაჟონვით დაიღუპნენ.
კასპიის სელაპების მთლიანი პოპულაცია 270 000-დან 300 000 ინდივიდამდე მერყეობს. კასპიის სელაპი ძირითადად თევზით იკვებება და ბუნებრივი მტერი არ ჰყავს. ის ერთადერთი ძუძუმწოვარია კასპიის ზღვაში.
მოამზადა მაკა ბიბილაშვილმა