საქართველოს ფინანსთა მინისტრი ლაშა ხუციშვილი პარლამენტში მინისტრის საათზე დეპუტატებს დაეთაბნხმა, რომ კაპიტალის ბაზარი განუვითარებელია და მხოლოდ ერთეული ტრანზაქციები ხორციელდება. მისივე თქმით, „მოწმენდილ მინდორზე კაპიტალის ბაზარი არ ვითარდება“.
„ჩვენ შემოვიღეთ კაპიტალის ბაზრის დაბეგვრის ძალიან ლიბერალური რეჟიმი. პრაქტიკულად, ყველა მიმართულებით ჩვენ გავანულეთ განაკვეთები. დავხვეწეთ საკანონმდებლო გარემო და მივუახლოვეთ საუკეთესო საერთაშორისო სტანდარტებს. საპენსიო რეფორმით შევქმენით საკმაოდ მნიშვნელოვანი საინვესტიციო ბაზა. კაპიტალის ბაზრისათვის კრიტიკულია ბენჩმარკ ფასიანი ქაღალდების ბაზრის განვითარება. ჩვენი თანმიმდევრული ნაბიჯებით, საკმაოდ დიდ წარმატებას მივაღწიეთ – მთავრობის ფასიან ქაღალდებში ხშირად უცხოელი ინვესტორები დომინირებენ, რაც ასევე ქმნის ინვესტორთა ბაზას კორპორატიული ფასიანი ქაღალდებისათვის”, – აღნიშნა ფინანსთა მინისტრმა.
მისივე თქმით, ბოლო პერიოდში ინვესტიციების ზრდის მაღალი პერსპექტივები გამოიკვეთა, თუმცა, ლაშა ხუციშვილი მთავარ გამოწვევად ემიტენტების მცირე რაოდენობას ასახელებს.
“ჩვენ სხვადასხვა მექანიზმით უნდა წავახალისოთ ადგილობრივი კორპორაციები უფრო აქტიურად გამოვიდნენ კაპიტალის ბაზარზე. განსაკუთრებით დიდი მნიშვნელობა აქვს სახელმწიფო საწარმოებს და მათი კაპიტალის ბაზარზე გამოსვლის შესაძლებლობის ზრდას. ამ არგუმენტითაც უმნიშვნელოვანესია სახელმწიფო საწარმოების რეფორმა”, – განაცხადა ლაშა ხუციშვილმა.
საპენსიო სააგენტოს უფროსი საინვესტიციო ოფიცრის გოგა მელიქიძე, არსებული გადმოსახედიდან, სახელმწიფო კომპანიების პოტენციალს ვერ ხედავს, მათ შორის ვერც საქართველოს რკინიგზაში, რომლის 10 წლიანი $500 მლნ-იანი ბონდების (2012 -ში ემიტირებული) ვადამდე რეფინანსირება ახალი, 7 წლიანით საფინალო ეტაპზეა (ლონდონის ბიჟაზე). შუამავალმა საინვესტიციო ბანკებმა (TBC კაპიტალი; G&T) ინვესტორები 91% -ზე ($457 მლნ) უკვე დაითანხმეს. $107.5-ზე ემიტენტ კომპანიასთან ინვესტორებმა სატენდერო ინსტრუქციები უკვე შეათანხმეს, $500 მლნ-მდე უნდა შეივსოს ტენდერის დახურვისთვის, 23 ივნისისთვის, თუმცა რკინიზგა ტრანზაქციის 17 ივნისამდე დახურვას ვარაუდობს. ტენდერის ხარჯმა კი 15 მლნ-ს არ უნდა გადააჭარბოს.