კანონპროექტს, რომელზეც სახელმწიფო მუშაობს და რომელიც კომპანიებს შესაძლებლობას მისცემს, გაკოტრების ეტაპი აიცილონ და რეაბილიტაციის ეტაპზე კომპანიის გაჯანსაღება შეძლონ, ბიზნესი აფასებს და არსებულ კანონს ინვესტიციების მოზიდვის გარანტიად მიიჩნევს. „კომერსანტი“ დაინტერესდა რამდენად მნიშვნელოვანია კერძო სექტორისთვის აღნიშნული კანონპროექტი.
კომპანია „ნატახტარის“ კორპორაციული საქმეთა დირექტორი ნიკოლოზ ხუნძაკიშვილის თქმით კანონპროექტი, რომლიც რეაბილიტაციისა და კრედიტორთა კოლექტიური დაკმაყოფილებას მოიცავს, ერთ-ერთი ხელშემწყობი ფაქტი იქნება საინვესტიციო კლიმატისთვის.“
„ჩვენთვის, საერთაშორისო რეიტინგების უკან დამწევი არის ის ამ კანონის არ არსებობა. საქართველოში ბიზნესში შესვლა მარტივია, იქედან თავის დაღწევა- რთული. გაკოტრების კანონი იმას არ ნიშნავს, რომ მაინც და მაინც გაკოტრდეს ბიზნესი, იმასაც მოიაზრებს, რომ როდესაც პირს საქმიდან გასვლა მოუნდება უმტკივნეულოდ დაასრულოს ბიზნესში მოღვაწეობა.“-ამბობს ხუნძაკიშვილი.
ნიკოლოზ ხუნძაკიშვილი გაკოტრების შესახებ კანონს, ინვესტიციების გარანტიადაც მიიჩნევს. რადგან ინვესტორისთვის, საქართველოში ბიზნესის დაწყება ადვილია, ასევე უნდა იყოს ბიზნესიდან გასვლაც და არ უნდა ექმნებოდეს პრობლემა. ხუნძაკიშვილის თქმით, ქვეყნის რეიტინგის შენარჩუნება მსგავს ფაქტორებზეა დამოკიდებული.
ბიზნესმენ ირაკლი იაშვილის თქმით, ბიზნესს გაკოტრებამდე დახმარება სჭირდება , კანონპროექტი, რომლის შემუშავებას მთავრობა აპირებს, ამის საშუალებას იძლევა.
„ბიზნესი თუ გაკოტრდა, გაკოტრდება და ეს გარდაუვალია, პროცესს თავიდან ვერ ავიცილებთ. თუმცა, გადახდისუუნარობის საკითხის დახვეწა თუ იგეგმება ეს ძალიან კარგი ინიციატივაა. გარკვეული პრობლემის დასაწყისში, ბიზნესი იგრძნობს სახელმწიფოს მხრიდან მხარდაჭერას და რეალური ღონისძიებები გატარდება, ეს ფაქტი საკმაოდ დადებითია.“-ამბობს ირაკლი იაშვილი.
შეგახსენებთ, კანონპროექტზე საუბარი, რომელიც კომპანიებს შესაძლებლობას მისცემს, გაკოტრების ეტაპი აიცილონ თავიდან, გასულ კვირას გააქტიურდა. გადახდისუუნარობის საქმის წარმოების შესახებ კანონპროექტის სამუშაო ვერსია მთავრობამ დაამტკიცა და ის საკანონმდებლო ორგანოს გადაეგზავნება.
კანონის მიხედვით, აღსრულების ეროვნული ბიურო აღარ ისარგებლებს ექსკლუზიური უფლებით გადახდისუნარიანობის საქმის წარმოების პროცესში.
პროექტი, რომელიც კერძო სექტორის, საერთაშორისო ორგანიზაციების ექსპერტების ჩართულობითა და საუკეთესო პრაქტიკის გათვალისწინებით შემუშავდა ფინანსური სირთულეების მქონე ბიზნესისთვის პრობლემების გადაჭრის შესაძლებლობის გაჩენას ეხება. კანონი ბიზნესს მისცემს საშუალებას, ფინანსური კრიზისის საწყის ეტაპზევე გამოიყენოს რეაბილიტაციისათვის საჭირო მექანიზმები, გაკოტრების პროცედურის ნაცვლად.
„დარწმუნებული ვარ, რომ ეს იქნება საერთაშორისო დონეზე ერთ-ერთი ყველაზე წარმატებული კანონპროექტი და დიდ სარგებელს მოუტანს ქართულ ეკონომიკას. ჩვენ წლების განმავლობაში ვგრძნობდით, როგორ უჭირდა კომპანიებს, რომლებიც ხვდებოდნენ რთულ ფინანსურ მდგომარეობაში. ეს კანონი მათ შესაძლებლობას მისცემს აირიდონ გაკოტრების ეტაპი და რეაბილიტაციის ეტაპზე შეძლონ კომპანიების გაჯანსაღება, რაც, რა თქმა უნდა, ჩვენთვის პირველ რიგში სამუშაო ადგილების შენარჩუნებასა და ჩვენი მოქალაქეებისთვის სიკეთეს ნიშნავს,- აღნიშნა გასულ კვირას მთავრობის მეთაურმა.
ნათია ლომიძე
ირაკლი იაშვილი
