კემბრიჯის უნივერსიტეტის კვლევების მიხედვით, კანაფის მცენარეს ორჯერ მეტი ნახშირორჟანგის შთანთქმა შეუძლია, ვიდრე სხვა ნებისმიერს.

კემბრიჯის უნივერსიტეტის აღმოჩენამ დიდი გამოხმაურება გამოიწვია, გაჩნდა ახალი იდეებიც. ადამიანებმა დაიწყეს კანაფის მცენარის სახლების მშენებლობაში შეტანა. მათი მიზანია, კონსტრუქციაში გამოყენებულმა მცენარემ შენობის გარე და შიდა სივრცეების ნახშირორჟანგისგან გაწმენდას შეუწყოს ხელი.

სპეციალურად შემუშავებული ტექნიკის მეშვეობით, უკვე შესაძლებელი გახდა, რომ კანაფის მცენარე გარდაიქმნას მყარ საშენ მასალად.

ინიციატორები თვლიან, რომ თუ არქიტექტურ-მშენებლობაში კანაფის ერთწლოვანი ბოჭკოვანი მცენარისგან მიღებულ საშენ მასალას აქტიურად გამოიყენებენ, შენობებს ბუნებისადმი ეკომეგობრული დატვირთვა ექნება.

აღსანიშნავია, რომ დედამიწაზე გამოყოფილი ნახშირორჟანგის 30-40 პროცენტი სწორედ შენობების აგებაზე მოხმარებული ენერგიითა და სამშენებლო მტვრით გამოწვეულ გარემოს დაბინძურებაზე მოდის.

მეცნიერების მტკიცებით, კანაფის საშენ მასალად მასობრივი გამოყენების შემთხვევაში მომავალში გარემო ბერად უფრო ჯანსაღი და ეკოლოგიურად სუფთა იქნება.

ცნობისთვის, კოლუმბიის ხელისუფლებამ სამედიცინო მიზნებისთვის განკუთვნილი კანაფის ექსპორტი დაიწყო. ქვეყნის ხელისუფლის აზრით, კოლუმბია მიიღებს უახლეს მექანიზმებს ამდარგის სამართლებრივი რეგულირებისთვის, რომლის საექსპორტო პოტენციალილათინურ ამერიკაში 6 მილიარდ დოლარად არის შეფასებული. სამედიცინო მიზნებისთვის მარიხუანას წარმოება კოლუმბიაში 2016 წლიდან არის ნებადართული, თუმცა, ამ დრომდე ადგილობრივი მწარმოებლები მცენარის მხოლოდ ექსტრაქტის ექსპორტს ახერხებდნენ. ახალი ნორმა კი მას საშუალებას მისცემს ნედლის ექსპორტირებისთვის, რომელიც გამოიყენება კოსმეტიკაში, საკვებ პროდუქციასა და ტექსტილში.

სამკურნალო დანიშნულებით კანაფისა და ყაყაჩოს მოყვანაზე აკრძალვა ჯერ კიდევ შარშან გააუქმა რუსეთმაც.  აქ კანაფი მთელი რიგი პროდუქტების საწარმოებლად აქტიურად გამოიყენება. პოპულარულია კანაფის მცენარეული ზეთი და როგორც ამბობენ,  ჯანსაღად კვებას უწყობს ხელს. მათი რეკლამირება ხდება, როგორც დიეტური პროდუქტის, რომელიც სასარგებლოა ორგანიზმისთვის.  ასევე ცნობილია, კანაფის ცომისგან დამზადებული მაკარონებიც.

რაც შეეხება ტექსტილის სფეროს, კანაფისგან დამზადებული სამოსი და ფეხსაცმელი, თეთრეული, ჩანთები და აქსესუაარები ქვეყანაში აქტიურად იყიდება. ამბობენ, რომ ასეთი ნაჭერი ნაკლებად დეფორმირდება და ხანგრძლივად გამოყენებადია.  საბჭოთა პერიოდში კანაფი ყოველწლიურად თითქმის 1 მილიონი ჰექტარზე მოჰყავდათ. 

გაეროს ნარკოტიკული საშუალებების კომისიამ სამედიცინო მარიხუანა ყველაზე საშიში ნარკოტიკების სიიდან ერთი წლის წინ ამოიღო.  53 წევრი ქვეყნიდან გადაწყვეტილებას მხარი 27-მა ქვეყანამ დაუჭირა. მხარდამჭერთა შორის არიან აშშ-მა და ევროკავშირის წევრები. ინიციატივის წინააღმდეგი იყო 25 ქვეყანა. უკრაინა კენჭისყრაში თავი შეიკავა. კომისიამ გადაწყვეტილება 2019 წლის იანვრით დათარიღებული ჯანმოს რეკომენდაციების საფუძველზე მიიღო, თუმცა, მარიხუანა დარჩა ნარკოტიკული საშუალებების ჩამონათვალში, შესაბამისად, მასზე ვრცელდება კონტროლის ყველა ზომა, რაც ნარკოტიკებზე.

შეგახსენებთ, სამი წლის წინ  საქართველოს მთავრობაც გამოვიდა ინციატივით, რომლის თანახმადაც საქართველოში ფარმაცევტული და კოსმეტიკური საშუალებებისთვის მარიხუანას ექსპორტის მიზნით მისი წარმოება უნდა დაიწყებულიყო. მომზადდა კიდეც კანონპროექტი, რომელიც პარლამენტმაც განიხილა, თუმცა საპატრიარქოსა და სამოქალაქო საზოგადოების ფართომასშტაბიანი საპროტესტო აქციების გამო ხელისუფლებამ უკან დაიხია და მთავრობამ კანონპროექტი უკან გამოითხოვა. 

ეკონომისტებისა და ფინანსისტების ნაწილი თვლის, რომ ქვეყანამ ამით ეკონომიკურად წააგო. მათი თქმით, მსოფლიოში უამრავი ქვეყანა აწარმოებს მარიხუანას საექსპორტოდ და ამით მათი ეკონომიკა შესაშურ შემოსავალსაც იღებს. სპეციალისტები მტკიცებით, საქართველოს ეკონომიკა ამით ეჭვგარეშე იხეირებდა, რადგან რეგიონში მეზობელ ქვეყნებს მკაცრი ნარკოპოლიტიკა აქვთ დეკლარირებული, რაც სხვა ეკონომიკურ სარგებლიანობასთან ერთად  ბიძგს მისცემდა ტურიზმსაც.

ცნობისთვის, ეკონომიკაში მარიხუანას მწვანე ოქროს უწოდებენ.  მისი წარმოება ფერმერებისთვის საკმაოდ მაღალშემოსავლიანია. ერთი ჰექტარი მოსავლის გაყიდვით ფერმერი 1500 ამერიკულ დოლარს იღებს, რაც ბევრად აჭარბებს სიმინდის გაყიდვიდან მიღებულ შემოსავალს. ფერმერები კანაფის ღეროს ქსოვილის ქარხანაში აბარებენ, ფოთლებს ფარმაცევტული კომპანიები ყიდულობენ, თესლს კი საკვების პროდუქტების მწარმოებელი კომპანიები იბარებენ. კანაფისგან დამზადებული ქსოვილები და ბაწრები, როგორც წესი, მაღალი ხარისხობრივი მაჩვენებლებით გამოირჩევა.

მარიხუანასგან დამზადებული პრეპარატები ძალიან ბევრი დაავადების სამკურნალოდ გამოიყენება, ეპილეფსიის, დიაბეტის, პარკინსონის, სიმსივნის. მხოლოდ მივესალმები, თუ ქართულ სამედიცინო ინდისტრიაში დაინერგება ამ პრეპარატების გამოყენება. ნარკოთრობისთვის მისი ხშირი მიღება ჯანმრთელობის სერიოზულ პრობლემებს იწვევს, ესაა ტვინის სიმსივნე და გულის ინფარქტი.  კვლევებით დასტურდება, რომ მარიხუანის მომხმარებელთა 52 %-ს აქვთ არითმია, გაძლიერებული გულისცემა და ტკივილები გულის არეში. მკვლევარების მიერ წარდგენილი დასკვნების თანახმად, ადამიანები, რომლებიც თვეში 10-ჯერ ან მეტჯერ მოიხმარენ მარიხუანას, მათთვის ინსულტის რისკი 2.5 ჯერ მეტია განსხვავებით მათგან, რომლებიც არ ეწევიან კანაფს. 

საქართველოში მარიხუანას მოხმარება დეკრიმინალიზებულია. 

ავტორი: ბელა გელაშვილი