პანდემიის პერიოდი როგორც ყველა ბიზნესისთვის და მათ შორის, „Greeny”- სთვსაც რთული აღმოჩნდა, თუმცა მიუხედავად შეზღუდვებისა, გაყიდვების რაოდენობა გაიზარდა. ამის შესახებ “კომერსანტს” კომპანიის დამფუძნებელმა ეკატერინე ებანოიძემ განუცხადა.
„ძალიან დიდი გამოწვევა გვქონდა Covid - ის დროს, მაგრამ არც ერთი წუთით არ გავჩერებულვართ. სხვათა შორის, ძალიან საინტერესო პერიოდი იყო, რადგან გაყიდვებმა მოიმატა, ალბათ იმის გამო, რომ ბევრი მაღაზია არ იყო გახსნილი და ხალხი გარეთ ვერ გადიოდა, ისინი სარგებლობდნენ იმ პროდუქციით, რომელიც მიტანის სერვისს ითვალისწინებდა.
ჩვენ ვცდილობთ, რომ ჩვენი საწყობი სულ სავსე იყოს, რადგან მიწოდების ფასი საკმაოდ ძვირია და ვცდილობთ ბევრი პროდუქტი შევუკვეთოთ ერთად . Covid 19 - ის დროს გვქონდა რაღაც მარაგი, მხოლოდ ერთი თვე შეყოვნდა ნეპალიდან მოწოდება და შემდეგ ისევ განახლდა, ასე რომ ყველაფერმა საკმაოდ მშვიდად ჩაიარა მიუხედავად იმისა, რომ Covid 19 -ის დროს მიწოდების პრობლემა იყო.“ - აღნიშნავს ებანოიძე.
Greeny ბაზარზე გასული წლის დეკემბრიდან გამოჩნდა და მომხმარებლის მხრიდან დიდი ინტერესიც გამოიწვია.
კომპანია ნეპალიდან ჩამოტანილ ინდუსტრიულ კანაფზე დამზადებულ აქსესუარებს, სამაჯურებს, წელის ჩანთებს, ზურგჩანთებს და სხვა პროდუქციას სთავაზობს მყიდველს.
ებანოიძე აღნიშნავს, რომ კანაფით პროდუქტის დამზადების კულტურა ნეპალში ძალიან მიღებულია, ამიტომ პროდუქციის საქართველოში შემოტანა გადაწყვიტეს.
ჩვენი კულტურის ნაწილი ეს ნაკლებად არის. ჩვენთვის უცხოა, ამიტომ უფრო საინტერესო აღმოჩნდა. ეს ეკოლოგიურად ნამდვილად სუფთა პროდუქტია, ეკო მეგობრულია და მხოლოდ ნატურალური კანაფისგან იკერება.
თავიდან გვქონდა
მხოლოდ წელის ჩანთები და ზურგჩანთები, შემდეგ
დავამატეთ სამაჯურები, საფულეები, მხარზე გადასაკიდებელი ჩანთები. ახლახანს დავამატეთ პონჩოები, რომელიც არის კოტონის
და შალის ნარევი, რომელსაც ძალიან ფერადი გამა აქვს და
ძალიან საინტერესოა, ასევე ძალიან საინტერესოა იმ
ადამიანებისთვის, რომელსაც საკუთარი თავის გამოხატვა უყვარს და რაღაც განსაკუთრებულს ეძებს“ - აღნიშნავს ეკატერინე ებანოიძე
კომპანია „გრინს“ ამ ეტაპზე მხოლოდ შემოტანილი პროდუქცია აქვს, რადგან ჯერჯერობით მასალის შემოტანას ადგილობრივი წარმოების დასაწყებად ვერ ახერხებენ.
„ჩვენ გვყავს პარტნიორი და მასთან ერთად ვმუშაობთ, სამწუხაროდ ჯერჯერობით არ არის შესაძლებელი, რომ მასალა შემოვიტანოთ და ლოკალური წარმოება გვქონდეს, თუმცა ჩენი საბოლოო მიზანი ეგ არის.
„გრინი“ არის ქართული ბრენდი და წარმოება ნეპალში ხდება, ჯერჯერობით ესეა და სამომავლოდ არ ვიცი, ყოველ შემთხვევაში ვფიქრობთ, რომ აქაც დავიწყოთ წარმოება და თუ გამოგვივა ძალიან კარგი იქნება.“ - აღნიშნავს ეკატერინე ებანოიძე
ებანოიძის განმარტებით, პროდუქციის დიზაინზეც ნეპალში მუშაობენ, თუმცა დეტალებს ნეპალის მხარესთან ათანხმებენ და ქართველი მომხმარებლის გემოვნებას არგებენ.
„ეს არის აზიური კულტურის ნაწილი, ჩვენ უბრალოდ დეტალებს ვათანხმებთ და ჩვენ გემოვნებას ვარგებთ ისე, რომ ჩვენ მომხმარებელს მოეწონოს.
მაგალითად, ძალიან დიდი მოთხოვნა იყო შავ წელის ჩანთებზე, ჩვენ თავიდან მუქი ფერი არ გვქონდა, მხოლოდ ღია და ჭრელი ფერის პროდუქცია ჩამოგვქონდა, შავ ჩანთებზე იმდენად დიდი მოთხოვნა იყო , რომ შევუკვეთეთ და ძალიან გაამართლა არის რაღაც ლოკალური მიგნებები, რომელსაც დიზაინის კუთხით ვიყენებთ.“ - აღნიშნავს ებანოიძე.
„გრინი“ ონლაინ მაღაზიაა და მხოლოდ ონლაინ გაყიდვებზე მუშაობს, ებანოიძე აღნიშნავს, რომ რაღაც პერიოდი საკუთარი სტენდიც ჰქონდათ და ამ მიმართულების განვითარებაც სურდათ, თუმცა არსებული სიტუაციიდან გამომდინარე მთლიანად ონლაინ სივრცეზე გადაერთო.
„E-commerce-ში ჩავერთეთ და ბევრი პარტნიორიც გავიჩინეთ, მაგალითად ისეთები, როგორებიცაა wendoo, extra.ge .
ჩვენ ასევე გვქონდა სტენდიც და ამ კუთხით განვითარებასაც ვაპირებდით , თუმცა როგორც გარემო გვკარნახობს, ჩვენც იმის მიხედვით ვადაპტირდებით, ამიტომ ამის საჭიროება აღარ დადგა და მთლიანად E-commerce -ზე გადავერთეთ.
შარშან ზამთარში ჩვენ გვქონდა სტენდი, გაამართლა მაგრამ მერე ცვლილება მოხდა ბაზარზე, რაც ყველა ბიზნესზე აისახა და ახლა მომავალს უფრო ონლაინ გაყიდვებში ვხედავთ.
სეზონურად ვაპირებთ, რომ ფესტივალების და მარკეტების პარტნიორები გავხდეთ.- აღნიშნავს ებანოიძე.
კომპანია „გრინი“ ორმა ადამიანმა საკუთარი ინვესტიციით დააფუძნა, როგორც დამფუძნებელი აღნიშნავს სესხის აღება მოსალოდნელი რისკის გამო არ სურდათ.
„გრინის საქმეში ორი პარტნიორი ვართ და ჩვენი პირადი არც თუ ისე დიდი ინვესტიცია ჩავდეთ, რადგან არც შესაძლებლობა გვქონდა და დიდად სესხის აღებაც არ გვინდოდა, რადგან მომავალი საკმაოდ ბუნდოვანი იყო.
ჩვენ ნეპალში არც კი ჩავსულვართ , უბრალოდ პარტნიორი მოვიძიეთ დაველაპარაკეთ და ხელშეკრულება გავაფორმეთ. ყველაფერი რისკებთან იყო დაკავშირებული, მაგრამ იმდენად მოგვწონდა ჩვენ ეს პროდუქცია და ვიფიქრეთ რომ ჩვენნაირი ადამიანები, ვისაც შეიძლება მოეწონოს საკმაოდ ბევრია, - აღნიშნავს ებანოიძე.
თაკო კვაჭანტირაძე