კანადამ Siemens Energy-ის განახლებული გაზის ტურბინა საჰაერო გზით გერმანიაში გაგზვნა. ინფორმაციას „კომერსანტი“ ინფორმირებულ წყაროებზე დაყრდნობით ავრცელებს. შემდეგ ტურბინა, რომელიც გაზსადენ Nord Stream-ით გაზის მისაწოდებლად გამოიყენება, ჰელსინკიდან ბორნითა და სახმელეთო ტრანსპორტით რუსეთში გადაიგზავნება.
რუსეთში მოწყობილბა დაახლოებით 24 ივლისს ჩავა. ის „პორტოვაიას“ საკომპრესორო სადგურზე გამოიყენება, რომელიც ფინეთის საზღვრიდან, დაახლოებით, 20 კილომეტრში, ლენინგრადის ოლქის სოფელ ტორფიანოვკას მახლობლად მდებარეობს. ექსპლუატაციაში გაშვებას სამიდან ოთხი დღე დასჭირდება. აგრეგატი Nord Stream-ში გაზის ჩასატუმბად აგვისტოს დასაწყისში უნდა იყოს მზად.
ჯერჯერობით უცნობია თუ რამდენად გაიზრდება ნაკადი Nord Stream-ის გავლით გარემონტებული ტურბინის მიღების შემდეგ. 16 ივნისს „გაზპრომმა“ Nord Stream მილსადენით მიწოდების დონე ნომინალური სიმძლავრიდან 40%-მდე შეამცირა, რაც დღეში 67 მილიონ კუბურ მეტრს შეადგენს. მოტივად კანადის მხრიდან „პორტოვაიას“ გაზის ტურბინების შეკეთება-მიწოდების პრობლემები დასახელდა.
მანამდე კანადის ხელისუფლებამ „გაზპრომის“ წინააღმდეგ სანქციები დააწესა და რუსეთში მოწყობილობის დაბრუნება აკრძალა. თუმცა გერმანიის ხელისუფლებასთან მოლაპარაკების შემდეგ, კანადა „გაზპრომის“ ტურბინის ქვეყნიდან გატანაზე დათანხმდა. ამასთან, მთავრობამ 2024 წლის 31 დეკემბრამდე „გაზპრომის“ კიდევ ხუთი ტურბინის შეკეთებისა და ტრანსპორტირების ლიცენზიის გაცემაზე მზადყოფმა გამოთქვა.
უკრაინის მთავრობა მოუწოდებდა კანადას, სასანქციე პირობა არ დაერღვია და ტურბინა არ დაებრუნებინა, არამედ, ის უკრანული მხარისთვის გადაეცა, რასაც ოფიციალური კიევი „გაზპრომს“ მხოლოდ ომის დასრულების შემდეგ დაუბრუნებდა. უკრაინის პრეზიდენტმა, ვოლოდიმირ ზელენსკიმ კანადის პრემიერ-მინისტრ ჯასტინ ტრუდოს განუცხადა, რომ უკრაინელებისთვის არასდროს იქნება მისაღები კანადის გადაწყვეტილება ტურბინის დაბრუნებასთან დაკავშირებით. პრეზიდენტის თქმით, ტურბინის გერმანიისთვის გადაცემა სანქციების დარღვევაა.
„ეს საკითხი მხოლოდ ტურბინას არ ეხება. ეს არის სანქციების დაცვის საკითხი. თუ ახლა ერთი დაირღვევა, სხვების დარღვევა დროის საკითხია“, - აცხადებს ზელენსკი.
11 ივლისიდან 21 ივლისის ჩათვლით Nord Stream-ის გეგმიური რემონტის გამო გაზსადენი მთლიანად გაჩერებულია. Nord Stream რუსეთიდან გერმანიამდე ბალტიის ზღვის ფსკერზე გადის და 2011 წლიდან ფუნქციონირებს.
bpn,ge