თბილისის მერიამ ისტორიულ გალავანზე მშენებარე სასტუმროს ბოლო სართულის დემონტაჟი მოსთხოვა. დედაქალაქის მერმა განაცხადა, რომ მშენებლობა შეთანხმებული პროექტის ესკიზებს არ შეესაბამება, რის გამოც ბოლო სართულის დემონტაჟი განხორციელდება.

„ნაკაშიძის ქ. N 10-ში, ბოლო წლების განმავლობაში იდგა დანგრეული შენობა. ხაზი მინდა გავუსვა, რომ ეს არ ყოფილა ძეგლი და ამ შენობის ადგილას კონკრეტულ კომპანიას საინვესტიციო პროექტი უნდა განეხორციელებინა, რომელიც მათ საკუთრებას წარმოადგენდა. ჩვენთვის ეს პროექტი მისაღები იყო, რადგან ძველი თბილისის იერსახეს ხელს არ უშლიდა, თუმცა, მშენებლობის პროცესში განსხვავებული სურათი მივიღეთ, პროექტის ესკიზი და მშენებარე შენობა ერთამენთს არ შეესაბამებოდა. ჩვენ ამას ვერ დავუშვებდით და კომპანიას  ბოლო სართულის დემონტაჟი მოვთხოვეთ“, - განაცხადა კახა კალაძემ.

თბილისის მერის თქმით, დედაქალაქის მუნიციპალიტეტის მთავრობა ისტორიულ შენობებს და ძველ თბილისის იერსახეს განსაკუთრებულ ყურადღებას უთმობს.

„ჩვენ ისტორიულ შენობებს, ძველ თბილისს მოწიწებით ვუდგებით. ყველა დეტალს განსაკუთრებული ყურადღება ეთმობა. ეს  ორბელიანის სარეაბილიტაციო სამუშაოებში გამოიხატა. ასევე დიდი მნიშვნელობა ენიჭება გუდიაშვილის რეაბილიტაციას, რომელიც წარმატებით მიმდინარეობს და ნარჩუნდება მისი ისტორიული სახე. ამით იმის თქმა მინდა, რომ ჩვენი ხელისუფლების მთავარი მამოძრავებელია, შევინარჩუნოთ ძვირფასი შენობა-ნაგებობები, რაც ჩვენს ქალაქს გააჩნია“, - აღნიშნა კახა კალაძემ.

მედიაჰოლდინგი საკითხზე სასაუბროდ პროექტის განმახორციელებელ კომპანიას დაუკავშირდა. შპს „საქართველოს ბუტიკების სასტუმროების“ დირექტორი დიმიტრი კარხანიდი აცხადებს, რომ საკითხზე კომენტარს უახლოეს მომავალში გააკეთებენ. კომერსანტის კითხვაზე შპს „საქართველოს ბუტიკების სასტუმროები“ ეთანხმება თუ არ თბილისის მერიის გადაწყვეტილებას ამბობს, რომ ჯერ არ იცის. მისივე თქმით, საკითხზე სასაუბროდ კომპანიაში ახლა იკრიბებიან.

შპს „საქართველოს ბუტიკების სასტუმროების“ 100 პროცენტიანი წილის მფლობელი შეზღუდული პასუხისმგებლობის საზოგადოება სუპორტ ინ ჯორჯიაა, თავის მხრივ ამ კომპანიის 100 პროცენტის წილის მფლობელი კი შპს „საქართველოს ბუტიკების სასტუმროები“.

შპს საქართველოს ბუტიკების სასტუმროები 2010 წელს დარეგისტრირდა, მაშინ კომპანიის 100 პროცენტი წილის მფლობელი და ხელმძღვანელი ისრაელის მოქალაქე გაი ბარნესი იყო. სუბიექტის რეგისტრირებულ მონაცემებში ცვლილების რეგისტრაცია 2019 წელის თებერვალში განხორციელდა, რა დროსაც კომპანიის 100 პროცენტი წილის მფლობელი  შეზღუდული პასუხისმგებლობის საზოგადოება სუპორტ ინ ჯორჯია გახდა, ხოლო აპრილში კომპანიის დირექტორად კარხანიდი დაინიშნა.

შპს სუპორტ ინ ჯორჯია 2018 წელის ივნისში დარგისტრიდა, კომპანიის დირექტორი და 100 პროცენტი წილის მფლობელი რუსეთის მოქალაქე  სერგეი ვოლოდინი იყო სუბიექტის რეგისტრირებულ მონაცემებში ცვლილების რეგისტრაცია 2018 წლის ოქტომბერში განხორციელდა და კომპანიის 100 პროცენტი წილის მფლობელი  რუსეთის ფედერაციის მოქალაქე მაქსიმ მაიოროვი გახდა. ამავე წლის 30 ნოემბერს წილები კომპანიაში ისევ შეიცვალა  60 პროცენტი მაქსიმ მაიოროვს ეკუთვნოდა, 20 პროცენტი ბაჩანა ადამიას ხოლო 20 სერგეი ვოლოდინს. 2019 წლის თებერვალში კი შპს კომპანიის 100 პროცენტი წილის მფლობელი საქართველოს ბუტიკების სასტუმროები გახდა.

არიქტექტურის ვებ-გვერდზე განთავესბული ინფორმაციის მიხედვით ირკვევა, რომ  მშენებლობის ნებართვა აღნიშნულ ტერიტორიაზე 2009 წელს გაიცა, სწორედ ამ ბრძანებით მიიღო საქართველოს ბუტიკების სასტუროებმა მშენებლობის უფლება. მშენებლობის ნებართვის და მშენებლობის ვადის გაგრძელების მოთხოვნით კომპანიამ მერიას 2011 წელს მიმართა, თუმცა უშედეგოდ, ესკიზის წინასწარი შეთანხმება უშედეგო აღმოჩნდა 2016 წელსაც. თანხმობა მერიისგან კომპანიამ 2018 წელს მიიღო.

 ბაჩო ადამია