„ყველაზე კარგი საინვესტიციო პერიოდი ზოგადად, კრიზისული ეტაპია ხოლმე, როცა მომავლის პერსპექტივაზე ვსაუბრობთ. თუმცა, ახლა ინვესტიციები ნაწილობრივ შევამცირეთ, ეს ყველაფერი დამოკიდებულია რესურსებზე, რომელიც თუ ხელმისაწვდომი იქნება გრძელვადიანი ინვესტიციების განსახორციელებლად, ტემპს არ დავაგდებთ. ახლა რაღაც დოზით ვფიქრობთ, რომ შევამციროთ ინვესტიციები.“ – „თელავის ღვინის მარნის“ დამფუძნებელი ზურა რამაზაშვილი „კომერსანტთან“ ღვინის სექტორში არსებულ პრობლემებზე საუბრობს, რომელიც გავრცელებული პანდემიის გამო საგანგებო მდგომარეობის დაწესებამ, შესაბამისად კი, რესტორნებისა და კაფეების დახურვამ გამოიწვია.
ბიზნესმენები COVID-19 ის გავრცელების ეტაპზე საინვესტიციო პროექტებისგან თავს იკავებენ, ზღუდავენ თანამშრომლების რაოდენობას და შემოსავლების შემცირებას სხვადასხვა რადიკალური ღონისძიებებით უმკლავდებიან. რამდენად შემცირდა გრძელვადიანი ინვესტიციების მაჩვენებელი და აქვს თუ არა ბიზნესს კრიზისის სიმძიმის შესამსუბუქებლად კონკრეტული გეგმა? როგორც ზურა რამაზაშვილი აღნიშნავს, ღვინის სექტორი სწორედ რომ ერთ-ერთია იმ ბიზნესებს შორის, რომლებზეც კორონავირუსის გავრცელება და ობიექტების დახურვა ყველაზე მეტად აისახა.
„ბიზნესის წამოწყებისთანავე პიროვნებამ რისკები თავიდანვე უნდა გათვალოს, ყველაფერში მთავრობა ვერ დაეხმარება. შევთანნხმდეთ, რომ ამ შემთხვევაში ყველამ ნაწილობრივ უნდა ვიზარალოთ, რომლის სიმძიმე ჩვენს თავზე უნდა ავიღოთ. ღვინის ბიზნესს რაც შეეხება, მოხმარება შემცირდა, რადგან საზოგადოებრივი თავშეყრის ადგილები, რესტორნები და კაფეები დაკეტილია. ამიტომ ეს კრიზისი ღვინის სექტორს მკვეთრად შეეტყო. შესაბამისად, ჩვენ ძალიან ვიზარალებთ. სიმართლე გითხრათ, ასეთი სცენარისთვის მზად არ ვიყავით. მიმდინარე პროცესების გათვალისწინებით, მივიღებთ შესაბამის გადაწყვეტილებებს, თუმცა, საქმიანობის გაჩერება გამორიცხულია. თანამშრომლების რიცხვი არ შეგვიმცირებია, თუმცა, არსებული რისკის გამო ასაკოვანი კადრები სამსახურიდან დროებით დავითხოვეთ.“ - აღნიშნა ბიზნესმენმა.
ბიზნესმენ,ღვინის კომპანია „ვაზიანის“ დამფუძნებლის ირაკლი იაშვილის შეფასებით, დაპაუზებული ინვესტიციები და სამომავლოდ მოვლენების განვითარების ბუნდოვანება ბიზნესს მნიშვნელოვნად აფერხებს და დასაქმებულების რიცხვის შემცირება გარდაუვალია.
„რა თქმა უნდა მცირდება სამუშაო ადგილები. არ ვიცი როგორ შეინარჩუნებენ ბიზნესები თანამშრომლებს. სავაჭრო ცენტრები იკეტება, მეც დავკეტე ჩემი ობიექტები. ამ ეტაპზე შემოსავალი არ არის, ინვესტიციები კი დაპაუზებულია ისევე როგორც ყველაფერი. თუ ვინმეს რამე ნაღდი ფული აქვს, ახლა უნდა შეიძინოს უძრავი ქონება ან ფასიანი ქაღალდები. ვფიქრობ, ნელნელა დამძიმდება სიტუაცია, მაგრამ დამოკიდებული ვართ იმაზე, თუ რამდენ ხანში გადაივლის ეს კრიზისი. მაგალითად, ჩინეთში პოზიტიური დინამიკაა და ქარხნების ნაწილიც ამუშავდა. მთავარია ახლა ჩვენც ის პოზიტიური წერტილი ვიპოვოთ და დადებითი ეკონომიკური ძვრები დაიწყოს.“- აღნიშნა ირაკლი იაშვილმა.
მარიამ მორგოშია