2021-2022 წლებში კოოპერატივი „აგრომომავალი“, რომელიც ზესტაფონის რაიონში 25 ჰექტარზე გაშენებულ ჟოლოს პლანტაციას ფლობს, ახალი ნერგების დარგვას ეტაპობრივად გეგმავს.
საიტი EastFruit კოოპერატივის სამომავლო გეგმებზე მის თანადამაარსებელს და თავჯდომარეს ბეჟან მაჭავარიანს გაესაუბრა.
– რა გახდა ნერგების შეცვლის აუცილებლობის მიზეზი?
– პრობლემა კომპლექსურია. ჟოლოს მოყვანა ჩვენ 2017 წელს დავიწყეთ, თუმცა კენრკის იმ ნაირსახეობამ სასურველი შედეგები ვერ მოგვიტანა - პირველ რიგში უხარისხო ნერგების გამო, რომლებიც ჩვენ ქართულ სანერგე მეურნეობაში შევიძინეთ.
ამჟამად ჩვენ ვიწყებთ მათ ჩანაცვლებას პორტუგალიური და პოლონური ჟოლოთი, რომელიც
USAID-სგან საჩუქრად მივიღეთ და შედეგები ძალიან კარგი გვაქვს.
მეორე ფაქტორი, რომელმაც ცუდი მოსავალი გამოიწვია, ერთ-ერთი ქართული ლაბორატორიის მიერ გაკეთებული ნიადაგის არასწორი ანალიზი იყო. არასწორი დასკვნების გამო ჩვენს მიერ გამოყენებული მოვლის მეთოდიკა არაეფექტური იყო და ნერგები სათანადოდ არ ვითარდებოდნენ.
შემდეგ მონაცემები ინგლისში ერთ-ერთ ლაბორატორიაში გადავაგზავნეთ, და ეს პრობლემა გადაწყდა.
ამჟამად ჩვენ ნერგების შეცვლის პროცესის დასაწყისში ვართ. ჩვენთვის უფრო მომგებიანია 2-3 წელი დაველოდოთ და ჰექტრიდან 10-12 ტონა მივიღოთ, ვიდრე ყველაფერი ისე დავტოვოთ, როგორც არის და საბოლოო ჯამში 5 ტონაზე ნაკლებით დავკმაყოფილდეთ.
ბაღების განახლების შემდეგ ჩვენ განვაახლებთ GlobalG.A.P.-ის სტანდარტის მიღებაზე მუშაობას, რომელიც შევწყვიტეთ არასათანადო მოსავლის გამო.
– თქვენს მიერ შეძენილი ქართული ნერგები სერტიფიცირებული იყო ?
– დიახ, და შეცდომაშიც სწორედ ამან შეგვიყვანა. ასევე ლაბორატორია, რომელსაც ჩვენ მივმართეთ, სახელმწიფოს მიერ აღიარებულია.
თავიდანვე უნდა გადაგვეხადა მეტი და უცხოური ხარისხიანი ნერგები უნდა ჩამოგვეტანა, თუმცა, ამას ჩვენ მხოლოდ ახლა მივხვდით. ანალოგიური პრობლემები კენკრების სხვა მწარმოებლებსაც აქვთ და შესაბამისად, სახელმწიფომ ამას რაც შეიძლება სწრაფად უნდა მიხედოს, წინაამღდეგ შემთხვევაში წლების მანძილზე პრობლემები კიდევ უფრო დაგროვდება და მათი გადაჭრა უფრო რთული იქნება.
– როგორც ჩანს, ამ წელს კარგ მოსავალს არ ელოდებით?
– საქმიანობის დაწყების პერიოდში 2021 წლისთვის მოსავლის გაზრდას 30 ტონამდე ვგეგმავდით, თუმცა, ჩანაცვლების პროცესის გათვალისწინებით, რეალურად, 7-10 ტონაზე მეტს ვერ მოვკრეფთ.
– თქვენ ასევე სამაცივრე მეურნეობის შექმნას გეგმავთ. რა სტადიაზეა ეს პროექტი?
– ამ პროექტზე მუშაობა ჩვენ ჯერ კიდევ 2019 წელს დავიწყეთ, როდესაც კარგ მოსავალს ველოდებოდით.
სამაცივრე მეურნეობა 1200 კვადრატულ მეტრზე განლაგდება, და მასში რამდენიმე კომპონენტი შევა - გაცივების კამერები, შოკური გაყინვის აღჭურვილობა, და შესანახი ფართები. ამ საქმეში ჩვენ სახელმწიფო გვეხმარება - 600 000 ლარის შეღავათიანი სესხი მივიღეთ.
სამაცივრე მეურნეობის გახსნას ჯერ კიდევ 2020 წელს ვაპირებდით, თუმცა, პანდემიამ და ზემოთ ჩამოთვლილმა პრობლემებმა ხელი შეგვიშალეს.
ამ დროისთვის შენობა უკვე მზადაა, აღჭურვილობის დიდი ნაწილიც უკვე ვიყიდეთ და ამ ეტაპზე შოკური გაყინვის დანადგარების არჩევის პროცესში ვართ. სავარაუდოდ, მაცივარი უკვე აგვისტოში-სექტემბრის მიჯნაზე მზად იქნება და პირველ ეტაპზე, სანამ ჩვენ სრული სიმძლავრით ავმუშავდებით, ის სხვა ფერმერებს მოემსახურება.
ჩვენს ირგვლივ 4 რაიონში შოკური გაყინვის არც ერთი დანადგარი არ არის, ამიტომაც კლიენტები აუცილებლად გვეყოლება. სავარაუდოდ, 2-3 წელიწადში ჩვენ თავად შევიძენთ კენკრას ადგილობრივი ფერმერებისგან, მომავალში კი შესყიდვის, გაყინვის, შენახვის და რეალიზების სრული ციკლის აწყობასაც ვგეგმავთ.
წყარო: east-fruit.com