საქართველოში ივნისიდან საუდის არაბეთის დაბალბიუჯეტიანი ავიაკომპანია Flyadeal იწყებს ოპერირებას. ფრენები თბილისისას და ბათუმის აეროპორტებში არაბეთის სამი ქალაქიდან: ჯედადადან, რიადიდან და დამამიდან კვირაში 15-ჯერ განხორციელდება. ამის შესახებ ინფორმაციას საქართველოს აეროპორტების გაერთიანება ავრცელებს.

Flyadeal-მა პირველი კომერციული ფრენა 2017 წლის 23 სექტემბერს სამეფოს ეროვნულ დღეს შეასრულა და არასრულ 5 წელიწადში, რომელსაც პანდემიაც დაემთხვა თან 12 მლნ მგზავრს მოემსახურა. კომპანია Airbus A320-ის მოდელის 15 ხომალდს ფლობს. მის კონკურენტულ უპირატესობად დაბალი ტარიფები ითვლება.

2022 წლის პირველ კვარტალში თბილისის, ქუთაისისა და ბათუმის აეროპორტებში მგზავრთნაკადმა 700 000-ს მიაღწია, რაც გასული წლის ანალოგიური პერიოდის მაჩვენებელს 565%-ით აღემატება, მაგრამ 2019 წლის პირველ კვარტალთან შედარებით ჯერ კიდევ 31%-ით ნაკლებია.

თბილისის აეროპორტში მგზავრთნაკადი პანდემიამდელ პერიოდს 37%-ით ჩამორჩება, ქუთაისის აეროპორტში 23%-ით, ბათუმის აეროპორტი გამონაკლისია და 32%-ით აჭარბებს.

ავიაკომპანიებიდან 1-ლი ადგილი 90 258 გადაყვანილი მგზავრით Turkish Airlines-მა დაიბრუნა, რომელსაც უნგრული Wizz Air 89 442 მგზავრით უმნიშვნელოდ ჩამორჩება. სამეულს 70 470 მგზავრით თურქული Pegasus ასრულებს. ქართული Georgian Airways კი 22 569 მგზავრით მე-8 ადგილზეა და მისი წილი მხოლოდ 3%-ს შეადგენს.