„ეს არის მისი (ივანიშვილის) ერთადერთი შანსი, რომ დაბრუნდეს, აიღოს პასუხისმგებლობა და ვითარება დაასტაბილუროს. რას იზამს, არ ვიცი, თვითონ გადაწყვიტოს, - ასე აფასებს „რეზონანსთან ანალიტიკოსი გია ხუხაშვილი საკადრო ცვლილებებზე ბოლო დღეებში გავრცელებულ ხმებს.
ბოლო პერიოდში აქტიურად მიდის საუბარი მოსალოდნელ საკადრო და სტრუქტურულ ცვლილებებზე, რაც პრემიერ-მინისტრმა, გიორგი გახარიამ მისი განცხადებით გარკვეულწილად დაადასტურა კიდევაც. მან ჟურნალისტებს ურჩია „ფინალურ სერიას დაელოდონ. პრემიერ-მინისტრის თანამდებობაზე კი შესაძლოა კვლავ ბიძინა ივანიშვილი ვიხილოთ. ამასთან, იუსტიციის მინისტრი თანამდებობიდან წასვლას აანონსებს. თეა წულიკიანმა 21 იანვარს პარლამენტის ადამიანის უფლებათა დაცვის კომიტეტის სხდომაზე თქვა, რომ სულ რამდენიმე თვე დარჩა მისი და მისივე გუნდის იუსტიციის სამინისტროში ყოფნისა.
„რეზონანსი: უნდა აღინიშნოს ისიც, რომ განათლების, მეცნიერების, კულტურისა და სპორტის სამინისტროდან კულტურის მიმართულების გამოყოფა იგეგმება. როგორ ფიქრობთ, რამდენად მართებულია ეს ნაბიჯი?
გია ხუხაშვილი: საერთოდ „სახლობანას თამაში აუტანელია, როდესაც რაღაც პერსონალური, პოლიტიკური კონიუქტურის გამო, რაღაცას შლიან და აწყობენ. ბავშვები თამაშობენ ასე კუბიკებით. ხელისუფლებაში სამინისტროს სახით ასეთი რგოლის არსებობა ჩემთვის არ არის მისაღები. კულტურა შემოქმედების, თავისუფლების სფეროა. შესაძლოა იყოს კულტურის სააგენტო, თუ პოპულარიზაციაზე და სახელმწიფო პოლიტიკის განსაზღვრაზეა საუბარი, მაგრამ ამ სფეროს მინისტრის რანგი არ სჭირდება. კულტურის მოღვაწეები თვითონ მიხედავენ თავის თავს.
თუ ხელისუფლებას რაიმე სოციალური ვალდებულებები უნდა აიღოს, სავსებით საკმაირისია ამისათვის დამოუკიდებელი სააგენტოს დონე, არა რომელიმე სამინისტროს დაქვემდებარებაში, რომ იერარქია კიდევ უფრო გაიზარდოს, არამედ დამოუკიდებელი რგოლი შეიძლება არსებობდეს. სამინისტრო კულტურისთვის ტრაგი-კომიკურად ჟღერს.
თვითონ გააერთიანეს, შემდეგ დაშალეს. მერე კიდევ ვიღაც ახალი მოვა, ახალ სიგიჟეს დააბრეხვებს, ისევ გააერთიანებენ. თამაშია ყველაფერი. როგორ შეიძლება ამით ქულები დაიწერო.
„რ: პრემიერ-მინისტრის პოსტზე ბიძინა ივანიშვილის შესაძლოა დაბრუნებაზე რა აზრის ხართ?
გ.ხ: ეს არის მისი (ივანიშვილის) ერთადერთი შანსი, რომ დაბრუნდეს, აიღოს პასუხისმგებლობა და ვითარება დაასტაბილუროს. რას იზამს, არ ვიცი, თვითონ გადაწყვიტოს.
„რ: და, წინასაარჩევნოდ ეს „ქართულ ოცნებას რას მოუტანს?
გ.ხ: შედეგის მომცემი იქნება თუ არა, არ ვიცი, მაგრამ თეორიულ შანს მიიღებს როგორც ქვეყანა, ასევე ივანიშვილიც, რაღაც შანსი მიეცემა, რომ ეს ქარიშხალი გადაიტანოს
„რ: პარლამენტის შენობის წინ სარეაბილიტაციო სამუშაოები დაიწყეს. ეს იმის ფონზე, როდესაც ოპოზიციამ პარლამენტის საგაზაფხულო სესიის დაწყებასთან ერთად, პარლამენტის შენობის პიკეტების განახლება დააანონსა. როგორ ფიქრობთ, სარეაბილიტაციო სამუშაოების წამოწყება უკავშირდება თუ არა მოსალოდნელ საპროტესტო აქციებს?
გ.ხ: როგორც ყოველთვის ეს ნაბიჯიც ხელისუფლების მხრიდან არის მაზოხიზმის გამოვლინება, როდესაც პოლიტიკურად „ჭკვიანურ, „ტაქტიკურ ქმედებას წამოიწყებენ და სინამდვილეში ბუმერანგივით უკან უბრუნდებათ.
სარეაბილიტაციო სამუშაოები ოპოზიციას გაუდვილებს მოედნის შევსების ამოცანას. თუ ადრე იძულებული იყვნენ ტროტუარზე მდგარიყვნენ, რადგან მოედანს ვერ ავსებდნენ, ახლა ძალიან მარტივად, პირველივე აქციაზე გზა გადაიკეტება და ამით მათი აქციების მნიშვნელობაც გაიზრდება. ეს არის სისულელე, ვითომ „ჭკვიანების მოფიქრებული, სინამდვილეში აბსოლუტურად მცდარი ნაბიჯია.
გაზეთი „რეზონანსი“