ივანე მაჭავარიანი აცხადებს, რომ მოსახლეობის დასახმარებლად რამდენიმე ვარიანტი განიხილება
access_time2020-03-22 16:59:58
საქართველოს ფინანსთა მინისტრის, ივანე მაჭავარიანის განცხადებით, კორონავირუსის პრევენციის მიზნით შიდა ეკონომიკური აქტივობების შეზღუდვა, ბუნებრივია, საქართველოს ეკონომიკაზე ნეგატიურად აისახება და მას სტიმულირება დასჭირდება.
მისივე თქმით, ეკონომიკის სტიმულირების რამდენიმე სცენარი არსებობს.
ამასთან, მაჭავარიანის განმარტებით, მიმდინარეობს მუშაობა სოციალური დაცვის მექანიზმის შექმნაზე.
„ამ მომენტში ხელოვნურად გვაქვს შეჩერებული, შეზღუდულად გვაქვს აქტივობები, რათა ვმართოთ ვირუსის გავრცელება. რა საკვირველია, ამის შედეგად ეკონომიკა დაზიანდება და მას დასჭირდება სტიმულირება. მთლიანად ეს პაკეტი არის გამზადებული. რამდენიმე სცენარი არსებობს, მსოფლიოშიც ყველა რამდენიმე სცენარს აკეთებს იმის მიხედვით, თუ რა ხანგრძლივობა და მასშტაბი იქნება ამ ვირუსის. შესაბამისად, არის სცენარი, როდესაც სიტყვაზე თვენახევარი-ორი თვის შემდეგ ძირითადად აღდგება შიდა ეკონომიკური აქტივობები, არის სცენარი, რომ ეს აღდგება ცოტა უფრო მგოვიანებით, სამი-ოთხი თვის შემდეგ და ასე შემდეგ. ამ პერიოდში, საუბარია პირველ რიგში სოციალური დაცვის მექანიზმებზე იმ ადამიანებისთვის, ვისაც უკიდურესად გაუჭირდება, რადგან ან სამსახური დაკარგა დროებით ან შემოსავლის წყარო შეუმცირდა. ერთი არის ამ მიმართულებით და როდესაც ვსაუბრობთ კირიზისულ ბიუჯეტზე, ჩვენ ამ ბიუჯეტზე ვმუშაობთ. დღესაც, ამ შეხვედრის შემდეგ მივდივართ და უნდა გადავაწყოთ, რაც ნიშნავს, რომ ამ ფილოსოფიით, ამ სულისკვეთებით უნდა გადაეწყოს ბიუჯეტი, რომ ეს პერიოდი, რომელიც შეიძლება გაგრძელდეს თვე-ნახევარი ან ორი თვე, რა სოციალური დაცვის მექანიზმი შეიძლება შეიქმნას“ ,- განაცხადა ივანე მაჭავარიანმა.
ივანე მაჭავარიანი აცხადებს, რომ მოსახლეობის დასახმარებლად რამდენიმე ვარიანტი განიხილება. ამის შესახებ მან პრემიერ-მინისრტთან შეხვედრის შემდეგ განაცხადა.
მაჭავარიანის თქმით, აღნიშნული ვარიანტების შესახებ მოგვიანებით გახდება ცნობილი. მისივე თქმით, არის საუბარი მაგალითად დენის ვაუჩერებზე; იქნება საუბარი ბიზნესთან საშემოსავლოს ნაწილში დათმობებზე, რათა მათ თანამშრომლებისთვის ხელფასის გადახდა განაგრძონ.
„სამწუხაროდ, ერთი ზომა ყველას არ ყოფნის, რადგან თვითდასაქმებულებთან დაკავშირებით სხვა სიტუაციაა, მსხვილს კომპანიებში ვინც არის დასაქმებული და ვისაც დიდი ხელფასი ჰქონდა, მათ დანაზოგი აქვთ და მათთან სხვანაირი მოდელი უნდა იყოს. შესაბამისად, ჩვენ ჩვენს ბიუჯეტს ამ სოციალური მიზანშეწონილობის პრობლემატიკის გათვალისწინებითაც ვაკეთებთ, მაგრამ ამავდროულად, ჩვენ ვლაპარაკობთ ეკონომიკის სტიმულირების პაკეტზე. ვიცით, გვჯერა და ასეც იქნება, რომ ეს უსასრულოდ ვერ გაგრძელდება. შემდგომში შენელებული ეკონომიკა როგორ უნდა დასტიმულირდეს და რა საშუალებებით, ამაზე ვსაუბრობთ. ვსაუბრობთ ჩვენს დონორ ორგანიზაციებთან. დღევანდელ დღეს თქვენ ისმენთ ბევრ სხვადასხვა ტიპის, სოციალური მხარდაჭერის შეთავაზებებს. ჩვენ აბსოლუტურად ყველას ვისმენთ, ვაანალიზებთ, ვთვლით.
ეს უნდა იყოს სწორად მიზნობრივი, მაქსიმალურად სწორად მოიცვას ის ჯგუფები, ვინც ყველაზე უფრო დაზარალდა ეს ერთი და მეორე, ეს შესაძლებელი უნდა იყოს ფიზიკურად. მიუხედავად იმისა, რომ ჩვენს გვერდზე დგანან ჩვენი უცხოელი პარტნიორები, სესხის მოზიდვაც შეგვიძლია და ამას ვიზამთ, ვაკეთებთ კიდეც“, – განაცხადა ფინანსთა მინისტრმა.
ეკონომიკა
