იმუნიზაციის საბჭოს ხელმძღვანელის, ივანე ჩხაიძის განცხადებით, დამატებითი დოზით აცრა მნიშვნელოვანია იმ ადამიანებისთვის, რომელთა მეორე აცრიდანაც 6 თვე უკვე გავიდა. მისივე თქმით, ბოლოდროინდელმა წამახალისებელმა კამპანიებმა და მწვანე პასპორტების დანერგვამ ქვეყანაში აცრის ტემპი გაზარდა.

„ბუსტერ დოზის აუცილებლობა განსაკუთრებით განაპირობა კორონავირუსის დელტა ვარიანტმა. როგორც ცნობილია, ეს ვაქცინები შექმნილი იყო უხანიდან გავრცელებული, ჩინური ვირუსის საწინააღმდეგოდ და, დელტას შემთხვევაში, ვაქცინის გაკეთებიდან გარკვეული პერიოდის შემდეგ, ნებისმიერი ვაქცინის დაცვის ძალა კლებულობს. „მწვანე პასპორტების“ სისტემის ამოქმედებამ მნიშვნელოვნად გაზარდა იმ ადამიანების რაოდენობა, რომელთაც ვაქცინაცია გადაწყვიტეს. რა თქმა უნდა, წინა პერიოდთან შედარებით, დღიურად, 8 და 9 ათასი ვაქცინირებული კარგია, მაგრამ ძალიან ჩამორჩება იმ რიცხვს, რომელიც ჩვენ გვინდა იმისთვის, რომ, წლის ბოლომდე, მოზრდილი მოსახლეობის 60% იყოს ვაქცინირებული“, - აცხადებს ივანე ჩხაიძე.

ბოლო 24 საათის განმავლობაში საქართველოში კორონავირუსის საწინააღმდეგო აცრა 7 099-მა ადამიანმა გაიკეთა. სულ ქვეყანაში 2 082 020 აცრა გაკეთდა.

ამ დროისთვის საქართველოში კორონავირუსის 804 571 შემთხვევაა დადასტურებული. მათ შორის გამოჯანმრთელდა 741 470, გარდაიცვალა 11 352 პაციენტი.

ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.

საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.

imedinews.ge