საქართველოს ეკონომიკაში უცხოეთიდან ფულად გადმორიცხვებს მნიშვნელოვანი ადგილი უჭირავს, ხშირ შემთხვევაში ის გარკვეულწილად ლარის კურსზეც ახდენს გავლენას. კორონავირუსის პანდემიის გამო კი ფულად გზავნილებს მნიშვნელოვანი შემცირება დაემუქრა. აღსანიშნავია, რომ 2019 წელს საქართველოში განხორციელებული ფულადი გზავნილების მოცულობა რეკორდულ 1,73 მილიარდ დოლარს უტოლდებოდა, ზრდა დაფიქსირდა 2020 წლის იანვარ-თებერვალშიც, გადმორიცხვების უმეტესობა რუსეთიდან, იტალიიდან, ესპანეთიდან და საბერძნეთიდან მოხდა, სადაც დღეისათვის პანდემია მნიშვნელოვნადაა გავრცელებული.

მიუხედავად იმისა, რომ მარტის თვის ოფიციალური მონაცემები ჯერ ცნობილი არ არის, საფინანსო ინსტიტუტების წარმომადგენლები საზღვარგარეთიდან ფულადი გზავნილების მნიშვნელოვან კლებაზე საუბრობენ, რაც ქართული ეკონომიკისთვის დამატებითი დარტყმა იქნება.

„ინტელექსპრესის“ ბიზნესის განვითარების მენეჯერი ლევან თავართქილაძე „კომერსანტთან“ საუბრისას აცხადებს, რომ იტალიიდან, ესპანეთიდან და საბერძნეთიდან მარტის მონაცემებით ფულადი გზავნილები საქართველოს მიმართულებით მნიშვნელოვნად შემცირებულია.

„ჩვენ, როგორც საერთაშორისო ფულადი გზავნილების სისტემა, 70-ზე მეტ ქვეყანაში ვართ წარმოდგენილები. მათ უმრავლესობაში, მსოფლიოში შექმნილი სიტუაციიდან გამომდინარე, გზავნილების კუთხით კლება შეინიშნება. გლობალური მასშტაბითაა გზავნილები შემცირებული ქვეყნებში, სადაც მკაცრი კარანტინია გამოცხადებული და სპეციალური საბუთის გარეშე სახლიდან გამოსვლა იკრძალება. ყველაზე მეტად ეს პროცესი იტალიას დაეტყო, საიდანაც მარტის თვეში, წინა წლის მარტთან შედარებით, ფულადი გზავნილები თითქმის განახევრებულია. იტალიიდან გზავნილები არა მარტო საქართველოს, არამედ სხვა ქვეყნების მიმართულებითაც შემცირდა, სადაც ჩვენი სისტემით იგზავნება თანხები, მაგალითად უკრაინის, სომხეთის, ფილიპინების და ა.შ. ასევე იკლო გზავნილებმა ესპანეთიდან და საბერძნეთიდან. ამ ორ ქვეყანაში კარანტინი მარტის ბოლოდან გამკაცრდა, ამიტომ ასეთი დიდი შემცირება არ გვაქვს. თუმცა, აპრილში მონაცემების ცვლილებას ველოდებით. ყველაფრის მიუხედავად, გვაქვს პოზიტიური ძვრები ონლაინ გადარიცხვების მიმართულებით. რაც შეეხება საქართველოდან  ფულად გზავნილებს, მცირედი კლება შეინიშნება, თუმცა,გზავნილების სერვისი ჩავანაცვლეთ ევროპაში საბანკო ანგარიშებზე ჩარიცხვის სერვისით, რასაც მომხმარებლები აქტიურად იყენებენ“, - განმარტავს ლევან თავართქილაძე.

მიკროსაფინანსო ორგანიზაცია „რიკო კრედიტის” სამეთვალყურეო საბჭოს თავმჯდომარე ლაშა ნიკოლაიშვილი ამბობს, რომ მარტში თებერვალთან შედარებით უცხოეთიდან ფულადი გზავნილების ნაკადი დაახლოებით 40%-ით არის შემცირებული, თუმცა,20-30%-ით გაიზარდა საქართველოდან საზღვარგარეთ გაგზავნილი თანხების რაოდენობა.

„მარტში წინა თვესთან შედარებით ზოგადად ფულადი გზავნილები შემცირებულია. მაგალითად, ჩვენი ქსელის „რიკო-გრამის“ მიერ განხორციელებული გზავნილები საზღვარგარეთიდან საქართველოში დაახლოებით 40%-ით არის შემცირებული ანუ თითქმის განახევრებულია. ამ ქსელის საშუალებით ხდება ძირითადად ისრაელიდან, საბერძნეთიდან, იტალიიდან, გერმანიიდან და ესპანეთიდან ფულადი გზავნილების მიღება, ეს კი ის ქვეყნებია რომლებმაც ყველაზე დიდი დარტყმა მიიღეს. თუმცა, საინტერესოა ის ფაქტი, რომ 20-30%-ით არის გაზრდილი საქართველოდან ამ ქვეყნებში ფულადი გზავნილების გაგზავნა“, - აცხადებს ლაშა ნიკოლაიშვილი.

შეგახსენებთ, რომ 2020 წლის თებერვალში ქვეყანაში შემოსული ფულადი გზავნილების ნაკადების მოცულობამ 137.3 მლნ აშშ დოლარი (391.6 მლნ ლარი) შეადგინა, რაც 9.5%-ით (11.9 მლნ აშშ დოლარით) მეტია 2019 წლის თებერვლის ანალოგიურ მაჩვენებელზე.

ნინო თამაზაშვილი