სავაჭრო ცენტრების გახსნის ზუსტი თარიღი ჯერ ისევ უცნობია. მოლები მოლოდინის რეჟიმში არიან. როგორც „ისთ ფოინთის“ მარკეტინგის დირექტორი განმარტავს, არსებული მოთხოვნების შესასრულებლად სრულად მზად არიან, თუმცა გახსნის საშუალება მათთვის გაურკვეველი მიზეზების გამო ამ დრომდე არ ეძლევათ.
„გახსნის პირველი მოლოდინი 11 მაისს გვქონდა, როდესაც ქალაქის მასშტაბით ისეთი მაღაზიები გაიხსნა, რომელთაც ქუჩიდან დამოუკიდებელი შესასვლელი აქვთ. „ისთ ფოინთში“ მდებარე მაღაზიების უმეტესობას სწორედ რომ აქვს ასეთი დამოუკიდებელი გასასვლელი, თუმცა, მაშინ, სამწუხაროდ, ჩვენდა გაუგებარი მიზეზების გამო მივიღეთ ინსტრუქცია და დავალება, რომ არ უნდა გავხსნილიყავით. ახსნა-განმარტება არ ყოფილა და მიზეზები ჩვენთვის დღემდე გაუგებარია. ასევე ვაკვირდებით, რომ თავდაპირველად წარდგენილი ეკონომიკის გახსნის ეტაპები იცვლება. ყველა ამ გათვლით ვფიქრობდით, რომ 25 მაისს მაინც შევძლებდით გახსნას, თუმცა ისევ მივიღეთ მითითება, რომ ამის უფლება არ გვაქვს. შესაბამისი უწყებების მხრიდან ახსნა-განმარტება ასეთია, რომ ეპიდემიოლოგიურ ვითარებას აკვირდებიან და იმისთვის, რომ გახსნა უფრო მდგრადი იყოს, დროში ისევ გადადეს. ვიმედოვნებთ, რომ დაახლოებით 10 დღის განმავლობაში მაინც მოგვცემენ გახსნის ნებას“,- აღნიშნავს თეიკო ლომინაძე.
მისივე თქმით, „ისთ ფოინთი“ სრულად აკმაყოფილებს მოთხოვნებს, რომელიც ჯანდაცვის სამინისტროს მიერ შემუშავებულ სამუშაო დოკუმენტშია მოცემული.
„ბოლო სამი კვირაა სავაჭრო ცენტრებსა და ჯანდაცვის სამინისტროს შორის, ბიზნესომბუდსმენის დახმარებით ინტენსიური მუშაობა მიმდინარეობდა. შეიქმნა სამუშაო დოკუმენტი, რომელიც ჯერჯერობით დამტკიცებული არ არის. იქ ყველაფერი დეტალურადაა გაწერილი და მოცემულია, როგორ უნდა გაიხსნას სავაჭრო ცენტრები. დოკუმენტის არსებობიდან დაახლოებით 4 დღეში ჩვენ გახსნისთვის სრულ მზადყოფნაში ვიყავით. ჩვენი მხრიდან რაიმე ბარიერი არ არსებობს. იმ შემუშავებულ დოკუმენტში არაფერი ისეთი რთული არ არის. უბრალოდ დამატებითი ადამიანური და ფინანსური რესურსის მობილიზაციაა საჭირო“,- აცხადებს სავაჭრო ცენტრის მარკეტინგის დირექტორი.
„ბიზნესპარტნიორი“