საზღვარგარეთ სეზონური დასაქმების პროგრამა გრძელდება. ლეგალური დასაქმების შესაძლებლობა ქართველებს გერმანიის შემდეგ, ბულგარეთშიც ექნებათ. ძალაშია ასევე ისრაელთან დადებული ხელშეკრულება, რომლის თანახმადაც, საქართველოს მოქალაქეები ისრაელში დასაქმებას შეძლებენ ხანგრძლივი მოვლის დაწესებულებებში დამხმარე მუშაკის პოზიციაზე. დასაქმების ხანგრძლივობა 1 წელია, რომლის ამოწურვის შემდეგ, საქართველოს მოქალაქემ ისრაელი აუცილებლად უნდა დატოვოს.

პროგრამა 2021 წლის 12 აპრილს ამოქმედდა. თუმცა დღემდე ვერ შეირჩა კანდიდატი, რომელიც ისრაელში სახელმწიფო პროგრამის ფარგლებში დასაქმდება. ჯანდაცვის სამინისტროს ინფორმაციით, ისრაელში სამუშაოდ წასვლის მიზნით სამინისტროში 125 განაცხადია შესული, მაგრამ აპლიკანტებმა მოთხოვნები ვერ დააკმაყოფილეს.

ამის მიზეზი, როგორც ექიმთა პროფკავშირების ხელმძღვანელი ირაკლი ამირანაშვილი ,,კომერსანტთან“ განმარტავს,  უკავშირდება არა  კვალიფიკაციას, არამედ კრიტიკულ მოთხოვნას, რასაც ისრაელის მხარე სამუშაოს მსურველებს უწესებს.

,,ისრაელის მიერ გამოცხადებული ვაკანსია ძირითადად ექთნის კადრს შეეხება. მსურველი მაინც და მაინც ბევრი არ არის, მაგრამ რეალურად ისრაელში გამგზავრება და  დასაქმება ვერავინ მოახერხა.  არანაირად არ ვფიქრობ, რომ კვალიფიკაციასთან დაკავშირებული პრობლემაა. თვითონ ისრაელის მხრიდან არის კრიტიკული მოთხოვნა, რასაც რასაც ისინი სამუშაოს მაძიებლებს უწესებენ. ამის გამო ქვეყანაში შესვლა პრობლემატურია. მართალია, უვიზო რეჟიმი გვაქვს ისრაელთან, მაგრამ მოგეხსენებათ, ამ ქვეყანაში შესვლა რა დიდ პრობლემას წარმოადგენს.  ანალოგიური პრობლემის წინ ცოტა ხნის წინ თვითონ აღმოვჩნდი. მე და ჩემი პაციენტი ჩასული ვიყავით ისრაელში და მთელი თვითმფრინავი გამოუშვეს უკან, მე, როგორც ექიმი, პაციენტის თანმხლები პირი, შემიშვეს. ექიმები მეტნაკლებად ვახერხებთ ისრაელში გამგზავრებას, სხვა კადრებს უფრო მეტად უჭირთ“, - ამბობს ირაკლი ამირანაშვილი ,,კომერსანტთან“.

მისივე შეფასებით, გარდა იმისა, რომ ისრაელში დასაქმება ჩვენი მოქალაქეებისთვის ფინანსურად მისაღებია, დიდი მნიშვნელობა აქვს გამოცდილებას, რასაც ისინი ერთწლიანი მუშაობის პერიოდში მიიღებენ. 

,,ქართველი მუშახელისთვის, რომელმაც დამხმარე მუშაკის ფუნქცია უნდა შეითავსოს, ისრაელში დასაქმებას დიდი მნიშვნელობა აქვს. მით უმეტეს, თუკი კლინიკებში მუშაობის შესაძლებლობა მიეცემათ. რაც არ უნდა იყოს, ფინანსურად მომგებიანი შემოთავაზებაა, გამოცდილების გაზიარების შესაძლებლობაც ექნებათ. ალბათ, რამდენიმე ადამიანს მაინც მიეცემა ამის შანსი, რაც ძალიან კარგი მაგალითია მედპერსონალისთვის, განსაკუთრებით მედდის პროფესიის მქონეთათვის, თუკი მოთხოვნილ  კრიტერიუმებს დააკმაყოფილებს. რაც არ უნდა იყოს, ეს არის შრომის კულტურის მქონე ქვეყანა, რომელთან თანამშრომლობაც მრავალმხრივ საინტერესოა საქართველოსთვის, -  ამბობს ირაკლი ამირანაშვილი.

ოფიციალური მონაცემით, რომელიც ჯანდაცვის სამინისტრომ გაავრცელა, ისრაელში დასაქმების მსურველი უნდა აკმაყოფილებდეს შემდეგ მოთხოვნებს:

განათლება: მინიმუმ საშუალო სკოლა დამთავრებული; უნდა ჰქონდეს სახელმწიფოს მიერ აღიარებული „სახლის პირობებში გასაწევი სამედიცინო დახმარება/მოვლის“ ტრენინგის გავლის დამადასტურებელი დიპლომი/სერტიფიკატი, ან ექთნის/ექთნის თანაშემწის დიპლომი;

ინგლისური და/ან რუსული ენის საკომუნიკაციო დონეზე ფლობა. უნდა იყოს საქართველოს მოქალაქე; ასაკი: 25-დან 45 წლამდე; ფიზიკურად და ფსიქიკურად ჯანმრთელი; ნასამართლეობის არმქონე; ისრაელში მუშაობის ისტორიის არმქონე; არასდროს უცხოვრია ისრაელში უნებართვოდ; არ უნდა ჰყავდეს მშობლები, მეუღლე, შვილები, რომლებიც მუშაობენ ან ცხოვრობენ ისრაელში;

გარდა ამისა, კანდიდატმა უნდა განაცხადოს თანხმობა რომ ისრაელში შესვლამდე გაიაროს COVID-19-ის ტესტი საქართველოში;

კანდიდატი თანახმა უნდა იყოს ისრაელში ჩასვლის შემდეგ COVID-19-ის და სხვა ვაქცინაციაზე, რომელიც აუცილებელია ხანგრძლივი მოვლის დაწესებულებაში სამუშაოდ ისრაელის ჯანდაცვის სამინისტროს მოქმედი რეგულაციების შესაბამისად. (აღნიშნული მოიცავს COVID-19 ვაქცინაციის 2 დოზის ჩატარებას, 3 კვირის შუალედით). 

რაც შეეხება დასაქმებას ბულგარეთში, ჯანდაცვის მინისტრის მოადგილის თამარ ბარკალაიას განცხადებით, მხარეებს შორის დოკუმენტი ხელმოწერილია და ამ ეტაპზე საოპერაციო ხელშეკრულებების შეთანხმება მიმდინარეობს, რომელსაც ხელი სავარაუდოდ დეკემბერში მოეწერება.

ამასთან,  ჯანდაცვის მინისტრის მოადგილის თქმით, გერმანიაში დასაქმების პროგრამა ხარვეზებით წარიმართა, თუმცა პროცესი იხვეწება, რათა მოქალაქეებმა სამუშაოდ წასვლა უპრობლემოდ შეძლონ.

რაც შეეხება საფრანგეთთან ხელმოწერილ შეთანხმებას, მისი თქმით, მიმდინარეობს მოლაპარაკებები, რათა ხელშეკრულება ქმედითი გახდეს.

მარი ჩიტაია