ვაქცინაციით მსოფლიო ჩემპიონ-ქვეყანაში ყველა შეზღუდვა უკვე მოიხსნა, მაგრამ დაავადებულთა რაოდენობა ისრაელში ბოლო კვირების მანძილზე ისევ სწრაფად იზრდება
მთავრობა „დელტა-ვირუსით“ გამოწვეული დილემის გადაწყვეტის გზას და შექმნილ ვითარებაში დამნაშავეებს ეძებს.
ერთ-ერთი ულტრარადიკალური პარტიის ლიდერი მოშე გაფნი ამაში მხოლოდ ღმერთის სასჯელს ხედავს - მისი აზრით, ახალი მთავრობა დაისაჯა იმის გამო, რომ „ღვთისმოშიში პარტიები გარეთ დატოვა“.
ყოფილი პრემიერ-მინისტრი ბინიამინ ნეტანიაჰუ კი მიიჩნევს, რომ პანდემიის მიზეზი ახალი მთავრობის არაქმედითუნარიანობა გახდა. ახალი პრემიერი კი, რომელმაც ძალაუფლება 1 თვის წინ ჩაიბარა, ყველაფერს წინა ხელისუფლების შეცდომებს აბრალებს.
მთავრობის მეთაური ნაფტალი ბენეტი, რომელიც აქამდე კორონავირუსის საკითხებში ექსპერტად ხშირად გამოდიოდა, პანდემიის ახალ აფეთქებას „რბილი ძალის“ გამოყენებით ებრძვის. კერძოდ, საუბარია მეთოდებზე, რომლებიც დაინფიცირებას შეამცირებს ისე, რომ ეკონომიკა არ დაზარალდეს.
მას რადიკალური ზომების მიღება არ სურს. თავის სტრატეგიაში ის „გარკვეულ რისკზე“ და „აუცილებელ ბალანსზე“ საუბრობს. ის აქცენტს არა დაინფიცირების, არამდე სიკვდილიანობის მაჩვენებელზე აკეთებს - აქ კი საქმე შედარებით კარგადაა. 4600 ახალ დაინფიცირებულზე 45 გარდაცვლილი მოდის, ეს კი წინა პერიოდებთან შედარებით გაცილებით ნაკლებია.
ეს წარმატებული ვაქცინაციით აიხსნება - ისრაელის 9 მილიონი მოქალაქიდან 5,2 მლნ უკვე ორჯერადად აიცრა, 500 000-მა ერთჯერადი ვაქცინაცია გაიარა. ივნისიდან ქვეყანაში ბავშვების აცრა დაიწყო.
თანაც, ისრაელი მსოფლიოში ერთადერთი ქვეყანაა, სადაც მესამე დოზით აცრაც დაიწყეს - ძირითადად, ეს სუსტი იმუნიტეტის მქონე ადამიანებს ეხება.
თუმცა, ვაქცინაციასთან ერთად ისრაელში, ასევე, შეზღუდვების შემოღების საკითხიც განიხილება.
პირველი ნაბიჯი უკვე გადაიდგა - ისრაელის საზღვრების ტურისტებისთვის გახსნა 1–ელ აგვისტომდე გადაიდო - თანაც ეს ვაქცინირებულ უცხოელებს ეხება.
ამ დროისთვის საზღვრების გახსნის ვადის 1–ელ სექტემბრამდე გადატანის შესაძლებლობა განიხილება.
sueddeutsche.de