„ირანთან საჰაერო საზღვრის ჩაკეტვა აბსოლუტურად სწორი გადაწყვეტილებაა იმიტომ, რომ ქვეყანა, სადაც დაფიქსირებულია სიკვდილიანობისა და დაინფიცირების ასეთი მაღალი მაჩვენებელი, რა ტიპის ფინანსებიც არ უნდა შემოდიოდეს მისგან, უნდა ჩაიკეტოს. წინააღმდეგ შემთხვევაში, სხვა ქვეყანა ჩაკეტავს ჩვენთან საზღვარს. საზღვარი თუ ღია დარჩა და საქართველოში კორონავირუსის ალბათობა გაიზარდა, სულ რომ არ დაფიქსირდეს დაინფიცირების ფაქტი, სხვა ქვეყნები თავს შეიკავებენ ფრენებისგან. ჩვენ ვიქნებით ღია იმ ქვეყნისთვის, სადაც ყველაზე მაღალი მაჩვენებელია. ამიტომ ჯობს, ერთი ტოტი მოვჭრათ, ვიდრე მთლიანად ხე.“ - ასე აფასებს კორონავირუსის საფრთხის გამო ირანიდან საქართველოში მგზავრების საჰაერო გზით შემოყვანის შეჩერებას ისრაელისა და ევროპის ბაზარზე მომუშავე ტურისტული კომპანიის დამფუძნებელი მაია მურაჩაშვილი.
საგარეო საქმეთა სამინისტროს განცხადებით, ამ ეტაპზე ირანელი ტურისტების გადაადგილებისთვის რჩება სახმელეთო საზღვარი, თუმცა დაწესდება მკაცრი შეზღუდვები. მათივე თქმით, საჭიროების შემთხვევაში, არ გამორიცხავენ სახმელეთო გადაადგილების შეზღუდვასაც.
მაია მურაჩაშვილი აღნიშნავს, რომ ამ ეტაპზე არსებობს მოლოდინი, რომ ისრაელიდან მნიშვნელოვნად შემცირდება ტურისტების როდენობა და დაიწყება ჯავშნების გაუქმების დიდი ტალღა.
„ისრაელსაც საკმაოდ უჭირს გადაწყვეტილების მიღება წამოვიდეს თუ არა საქართველოში. თავს იკავებენ წინასწარი გადახდებისგან და ველოდებით გაუქმების გარკვეულ ტალღას. აქ სეზონი იწყება აპრილის თვიდან, ახლა კი არაპროგნოზირებადი სიტუაციაა. თუ მარტში სერიოზული საფრთხე წამოვიდა ვირუსის გავრცელების, მაშინ აპრილი გაუქმდება, რაც იმას ნიშნავს, რომ ნახევარ სეზონს ეს დაარტყამს. როგორც რუსეთიდან ფრენების აკრძალვის დროს ალტერნატიულ გზებს ვეძებთით, დაახლოებით ასეთი რამე მოხდება.
ამ ყველაფრის ეკონომიკური უკუფაქტორი ყველასთვის თავისთავად ცხადია . ყველა, ტურისტული სააგენტოებიც და სასტუმროებიც სეზონს ველოდებით, ცხადია, რაღაც მოაკლდება სექტორს.“ - ამბობს მაია მურაჩაშვილი.
„სასტუმროებისა და რესტორნების ფედერაციის დამფუძნებელი შალვა ალავერდაშვილი მიიჩნევს, რომ ირანელი ტურისტების შემოსვლის ყველაზე აქტიური პერიოდი მარტის მეორე ნახევრიდან იყო მოსალოდნელი, თუმცა, წელს ეს ყველაზე დაბალი აქტივობის თვე იქნება და ნეგატიური ეკონომიკური შედეგიც გარდაუვალია. თუმცა, მისივე თქმით, არსებული საფრთხის გათვალისწინებით მთავრობამ პრიორიტეტები სწორად გადაანაწილა.
„ძალიან ბევრი ჯავშანი გაუქმდა ირანიდან 16 მარტის შემდეგ. ეს არის ამ ქვეყნიდან ტურისტების ყველაზე დიდი ნაკადის შემოსვლის პერიოდი, რადგან მუსულმანური ახალი წელი ნავრუს ბაირამი აღინიშნება. ამ პერიოდში საკმაოდ დიდი დატვირთვა ჰქონდა ყველა სასტუმროს, წელს ალბათ დაბალიაქტივობის სეზონი გვექნება. ირანიდან ფრენების შეჩერებას ნეგატიური შედეგი ექნება, თუმცა რადგან კორონავირუსის გავრცელების საშიშროება არის, ვერანაირი ეკონომიკური სარგებლის მიღების სურვილი ვერ გადაწონის მოქალაქეების სიცოცხლეს, ვერ გადასწონის ერთი ადამიანის დაინფიცირებასაც კი. შესაბამისად, გასაგებია ეს გადაწყვეტილება.“ - აღნიშნა შალვა ალავერდაშვილმა.
შეგახსენებთ, რომ მთავრობის განმარტებით, ამჟამად კორონავირუსის გავრცელების ყველაზე მაღალი მაჩვენებელი, ჩინეთის შემდგომ, ირანის ისლამურ რესპუბლიკაშია. მათი თქმით, ირანის მთავრობა მიმართავს ყველა ზომას კორონავირუსის პრევენციისთვის და ირანიდან გამვალი მგზავრების სქრინინგსაც აწარმოებს, შექმნილი ვითარებიდან გამომდინარე, მაინც ფრენების შეზღუდვა გადაწყდა.
მარიამ მორგოშია