საქართველოში მოქმედი კომერციული ბანკების უმრავლესობა უცხოური ბანკის ფილიალს წარმოადგენს, თუმცა ისინი ქვეყნის ორ მსხვილ ბანკს კონკურენციას მაინც ვერ უწევენ. ბოლო პერიოდში საერთაშორისო საფინანსო ბაზარზე ქართული ბანკების ფილიალებიც გამოჩნდა, მათ შორის სიმრავლით საქართველოს ბანკის და თიბისი ბანკის შვილობილი ორგანიზაციები გამოირჩევიან, რომლებიც არაერთ ქვეყანაშია წარმოდგენილი. ამ მხრივ ლიდერი საქართველოს ბანკია, რომელსაც საზღვარგარეთ 5 შვილობილი აქვს.

საქართველოს ბანკის შვილობილები საზღვარგარეთ:

1. საქართველოს ბანკის წარმომადგენლობა უნგრეთში - 2012 წელს „საქართველოს ბანკმა“ გახსნა აქტივებისა და დაგროვილი ქონების მართვის მიმართულების წარმომადგენლობა ბუდაპეშტში, უნგრეთი. ბუდაპეშტის წარმომადგენლობაში კლიენტებს უნგრეთიდან და აღმოსავლეთ ევროპის სხვა ქვეყნებიდან შეუძლიათ მიიღონ ინფორმაცია ბანკის მიერ საქართველოში შემოთავაზებული საბანკო პროდუქტების შესახებ.
   
2. ბანკი ბელარუსში (BNB) - “Belarusky Narodny Bank”-ის 70% „საქართველოს ბანკმა“ 2008 წლის მაისში შეიძინა, ხოლო 2010 წელს მისი წილი 99.96%-მდე გაზარდა. 2010 წლის ივლისში კი BNB-ს აქციონერი გახდა “World Bank Group”-ის წევრი IFC (საერთაშორისო საფინანსო კორპორაცია), როდესაც აქციების 19.99% შეიძინა. 2017 წელს კი სს საქართველოს ბანკმა და მისმა შვილობილმა კომპანია Benderlock Investments Limited-მა შეიძინეს  BNB-Bank OJSC-ის აქციების 10% და 5% შესაბამისად და ახლა BNB ბანკის აქციების თითქმის 95%-ს ფლობენ. 
3. საქართველოს ბანკის წარმომადგენლობა ისრაელში (GFI) - GFI არის 2009 წელს დაარსებული „საქართველოს ბანკის“ დაგროვილი ქონების მართვის მიმართულების წარმომადგენლობა ისრაელში (თელ-ავივი). თელ-ავივის წარმომადგენლობაში მომხმარებლებს შეუძლიათ მიიღონ ინფორმაცია საქართველოში შეთავაზებული საბანკო პროდუქტების შესახებ. როგორიცაა, ანაბრები მაღალი საპროცენტო სარგებლით და საშუალება აქვთ გახსნან ანგარიში „საქართველოს ბანკის“ დაგროვილი ქონების მართვის სამსახურის თბილისის ოფისში.
   
   
4. საქართველოს ბანკის წარმომადენლობა გაერთიანებულ სამეფოში - 2010 წელს „საქართველოს ბანკმა“ გახსნა თავისი წარმომადგენლობა დიდ ბრიტანეთში. ლონდონის წარმომადგენლობაში კლიენტები მიიღებენ ინფორმაციას საქართველოში შემოთავაზებული საბანკო პროდუქტების შესახებ, როგორიცაა, ანაბრები მაღალი საპროცენტო სარგებლით და საშუალება ექნებათ გახსნან ანგარიში საქართველოს ბანკის აქტივებისა და დაგროვილი ქონების მართვის სამსახურის თბილისის ოფისში.
   
   
5. საქართველოს ბანკის წარმომადგენლობა თურქეთში.

2020 წლის ანგარიშგებების მიხედვით კი თიბისი ბანკი უცხოეთში ორ შვილობილ კომპანიას ფლობს:

1. თიბისი კრედიტი ბაქო - არასაბანკო საკრედიტო ორგანიზაცია, რომელიც აზერბაიჯანის ბაზარზე 1999 წლიდან ოპერირებს. კომპანიამ პირველმა აზერბაიჯანში დაიწყო მოსახლეობისთვის იპოთეკური სესხების გაცემა.
   
   
2. თიბისი ინვესტი ისრაელი - 2011 წელს თიბისი ისრაელის ბაზარზე შევიდა და თიბისი ინვესტი დააარსა. ის წარმოადგენს ისრაელში, კერძოდ რამათ განიში დარეგისტრირებულ საზოგადოებასთან ურთიერთობის და მარკეტინგის კომპანიას.
   

აღსანიშნავია, რომ პროფილური ბიზნესების გარდა, ქართული საბანკო სექტორის ლიდერი წარმომადგენლები აქტიურად ფლობენ არაპროფილურ ბიზნესებსაც, მიუხედავად იმისა, რომ ეროვნულმა ბანკმა საქართველოში მოქმედი კომერციული ბანკებისთვის არაპროფილური საქმიანობის აკრძალვის გადაწყვეტილება ჯერ კიდევ 2014 წლის აგვისტოში მიიღო. მაშინ ბანკებს არაპროფილურ აქტივებზე უარის სათქმელად ვადა 2015 წლის 31 დეკემბრამდე მიეცათ. იმ დროისთვის მხოლოდ ორი უმსხვილესი ბანკი ჯამში 71 კომპანიას ფლობდა. 2017 წლის ბოლოს კი პარლამენტმა ისევ მიიღო კანონი „კომერციული ბანკის რეგულირების შესახებ“, რითაც ბანკებს არაპროფილური აქტივების ფლობა ასევე აეკრძალათ.