ჩიზბურგერი, ჰამბურგერი, როლი, ნაგეტსი, ტოსტი - ის რაც გიყვართ გაძვირდა. „მაკდონალდსმა“ მენიუზე ფასი დაახლოებით 10 პროცენტით გაზარდა. კომპანიაში აცხადებენ, რომ მსოფლიოში შექმნილმა ეკონომიკურმა კრიზისმა და ლარის კურსის დევალვაციამ გავლენა იქონია ყველა სფეროზე, მათ შორის „მაკდონალდსის“ ბიზნეს საქმიანობაზე. მედიაჰოლდინგის კითხვაზე ფასი რა პროდუქტზე გაიზარდა რესტორნაში გვპასუხობენ:
„მაკდონალდსს გააჩნია თავისი საფასო პოლიტიკა, რომლითაც ვცდილობთ მაქსიმალურად მოვერგოთ არსებულ ეკონომიკურ გარემოს და რომლის მიხედვითაც, მაგალითად, ბიგ მაკზე ფასი არ გაზრდილა“, - აცხადებენ რესტორანში.
როგორც „მაკდონალდსში“ განმარტავენ ლარის კიდევ უფრო გაუფასურების პირობებში, კომპანია კვლავ გადახედავს თავის საფასო პოლიტიკას და ეცდება, მომხმარებელს დისკომფორტი არ შეუქმნას და ფასები შეინარჩუნოს.
„ყველაზე მნიშვნელოვანი ჩვენთვის ჩვენი მომხმარებელია. გვსურს, მუდმივად შევთავაზოთ მათ უმაღლესი ხარისხის პროდუქცია, რომელიც მეტწილად იმპორტზეა დამოკიდებული. ამიტომ, ბუნებრივია, ლარის კურსის ცვლილება ახდენს გავლენას ჩვენს ბიზნეს საქმიანობაზე“, - განმარტავენ „მაკდონალდსში“.
აღსანიშნავია, რომ ბოლო ერთ თვეში „მაკდონალდსმა“ დამატებით კიდევ ორი რესტორანი გახსნა. კომპანიაში „კომერსანტს“ განუცხადეს, რომ მაკდონალდსის ახალი რესტორნები სრულად ამართლებენ იმ მოლოდონებს, რომლებიც მენეჯმენტმა დაისახა.
„ქვეყანაში პანდემიით გამოწვეული კრიზისის მიუხედავად, ჩვენ ვაგრძელებთ აქტიურ საქმიანობას და აღსანიშნავია, რომ ეს ორი ობიექტიც სწორედ ამ პერიოდში გავხსენით. ახალი რესტორნების გახსნით ჩვენ მოვახერხეთ 150 ახალი სამუშაო ადგილის შექმნა. განვახორციელეთ სოლიდური ინვესტიციები.
Covid19-ის პირობებში, როდესაც მსოფლიოში გლობალური კრიზისია და ჩვენთანაც ბევრმა ბიზნეს ოპერატორმა შეაჩერა მუშაობა, ეკონომიკის გაძლიერება ჩვენი ქვეყნისთვის სასიცოცხლო მნიშვნელობას წარმოადგენს; ამიტომ მოხარულები ვართ, რომ საშუალება გვაქვს, ჩვენი წვლილი შევიტანოთ მის განვითარებაში.
მაკდონალდსი იყო ერთ-ერთი იმ ობიექტთაგანი, რომელიც ყველაზე მწვავე პერიოდშიც კი არ გაჩერებულა და რეგულაციების სრული დაცვით სთავაზობდა თავის მომხმარებელს საყვარელ პროდუქტსა და გამოცდილებას“, - განაცხადეს „მაკდონალდსში“.
ბაჩო ადამია