„სადაზღვევო ბაზარი თავისი მოზიდული პრემიების რაოდენობით იზრდება, მაგრამ სამწუხაროდ, მოგების მაჩვენებელი, იმ კაპიტალთან მიმართებით, რაც სადაზღვევო ინდუსტრიაშია ჩადებული, მცირეა“ - ამის შესახებ, რადიო „კომერსანტის“ გადაცემაში „კომერსანტის დილა“ დაზღვევის კავშირის აღმასრულებელმა მდივანმა ლაშა ნიკოლაძემ ისაუბრა.

მისი  თქმით, სადაზღვევო ინდუსტრიაში დაახლოებით 350 მილიონი ლარის კაპიტალია, აქტივები კი 1 200 000 ლარამდეა, ამ ციფრებისთვის მოგების მაჩვენებელი საკმაოდ მცირეა.

„მოგეხსნებათ, რომ დაზღვევის ინდუსტრია შეიძლება ორ ნაწილად  დავყოთ, მისი ყველაზე დიდი ნაწილი არის ჯანმრთელობის დაზღვევა, ჯანმრთელობის დაზღვევაში დიდი მოგება არ იწერება, მოსალოდნელიც იყო, რომ პანდემიის შემდეგ კიდევ უფრო მძიმე სიტუაცია იქნებოდა, იმიტომ რომ  პანდემიამ ერთის მხრივ  შეაკავა სხვა დაავადებებზე ადამიანების მიმართვიანობა, რამაც გარკვეული დაავადებების უფრო განვითარება გამოიწვია, მიმართვები გაზარდა და ერთგვარი ბუმი დადგა, შესაბამისად, ამან ჯანმრთელობის დაზღვევის ისედაც მწირი მოგება, შეამცირა.

ყველა შედეგი, მათ შორის ავტომობილების დაზღვევა, სამწუხაროდ, ისევ 8-9% ის ფარგლებშია და თუ ჩვენ ამას კომპანიებში ჩავშლით, ვნახავთ, რომ ავტოდაზღვევის დროს კომპანიებს დიდი ზარალი აქვთ“, - აღნიშნა ლაშა ნიკოლაძემ.

ნიკოლაძის თქმით, სავალდებულო დაზღვევის ამოქმედებისთვის ინდუსტრია უკვე  მზად არის და ეს დაზღვევის  სექტორის განვითარების საშუალება იქნება, თუმცა მისი თქმით, სექტორის განვითარებისთვის მხოლოდ ეს საკმარისი არ არის.

„რაც შეეხება ჯანმრთელობის დაზღვევის ნაწილს, სხვადასხვა  ქვეყანაში აღნიშნული ვითარება სხვადასხვანაირადაა, გერმანიაში ყველა დასაქმებული იხდის  სავალდებულო  დაზღვევის გადასახადს  და კერძო  დაზღვევისთვის განპირობებული არიან  ისეთი  ადამიანები, რომელიც საშუალოზე მეტ  შემოსავალს აგენერირებს , შესაბამისად,  ქართული  ბაზრისთვის  ამ ბაზრის  შედარება  არ  შეიძლება.

არის შერეული მოდელები, სადაც  კერძო კომპანიები  ახორციელებენ სავალდებულო დაზღვევის კომპონენტებს  და ამიტომ  ჩვენ ვერავის ვერ შევედრებით,  იმიტომ რომ მჭიდრო  თანამშრომლობა  საყოველთაო  ჯანდაცვასა და კერძო` კომპანიებს  ჯერ  კიდევ  წინ  გვაქვს.

მაგალითად  უკვე  გამოცხადებული DRG , რომელიც  საყოველთაო ჯანდაცვისთვის  ერთ-ერთი პროგრესული  ინსტრუმენტი იქნება, სადაზღვევო ინდუსტრიისთვის შეიძლება ძალიან საინტერესო იყოს, იმიტომ რომ ეს იქნება ოპტიმალური მოდელი, სადაც სადაზღვევო კომპანიებმა კლინიკაში თანხა უნდა გადაიხადონ“, - აღნიშნა ლაშა ნიკოლაძემ.

ნიკოლაძემ მომატებული საფრთხის  შემცველი საქმიანობის პრემიაზეც ისაუბრა და განმარტა, რომ მომატებული საფრთხის ნაწილში პრემია საკმაოდ მცირეა.

„რა თქმა უნდა ეს დაზღვევა საინტერესოა და ინდუსტრია მიესალმება, მაგრამ ეს არ არის გლობალური. მაგალითად დასაქმებულთა  ჯანმრთელობის სავალდებულო დაზღვევა სექტორისთვის იქნებოდა  კიდევ  ერთ  ბიძგი“, — აღნიშნა ლაშა ნიკოლაძემ.

რაც შეეხება ესტონურ მოდელს ლაშა ნიკოლაძე ამბობს, რომ , მიუხედავად იმისა, რომ მოგება მცირეა და ერთი  შეხედვით, ამას  სახელმწიფოსთვის  ფისკალური  ეფექტი  ნაკლები აქვს, ესტონური მოდელი სექტორისთვის მნიშვნელოვანია.

„სადაზღვევო ინდუსტრიის ესტონურ  მოდელში ჩართვა საინვესტიციო  და  მხარდამჭერი მიმართულებით, სახელმწიფოს გრძელვადიან დამოკიდებულებას  აჩვენებს. მართალია, ამან  ერთი  წლით  გადაიწია, მაგრამ ის ფაქტი, რომ 2024 წელს მოგება  ესტონურ  მოდელს  დაექვემდებარება  ძალიან  დადებითი ნაბიჯია. სადაზღვევო ინდუსტრია  სწორედ  დაგროვების  ხარჯზე უნდა იზრდებოდეს“, - აღნიშნა ლაშა ნიკოლაძემ.

თაკო კვაჭანტირაძე