ატომური ენერგიის საერთაშორისო სააგენტოს ცნობით, ირანში გამდიდრებული ურანის რაოდენობა საერთაშორისო ხელშეკრულებით დაშვებულ რაოდენობას უკვე ათჯერ აჭარბებს. ამის შესახებ BBC წერს.
გამოცემის ინფორმაციით, ქვეყანაში გამდიდრებული ურანის რაოდენობა უკვე 2 105 კილოგრამს შეადგენს. მონაცემები სააგენტომ მას შემდეგ მოიპოვა, რაც თეირანმა მათ ერთ-ერთი ბირთვული ობიექტის დათვალიერების უფლება მისცა. მეორე ობიექტზე მუშაობას სააგენტოს თანამშრომლები მოგვიანებით დაიწყებენ.
ირანში ამტკიცებენ, რომ მათი ბირთვული პროგრამა მშვიდობიან მიზნებს ემსახურება. გასულ წელს, ირანი 2015 წელს გაფორმებული საერთაშორისო ბირთვული შეთანხმებიდან ეტაპობრივი გასვლა დაიწყო. შედეგად, ქვეყანაში ურანის გამდიდრებაზე დაწესებული შეზღუდვები მოიხსნა, აშშ-მა კი თეირანს კვლავ სანქციები დაუწესა.
ირანმა და ექვსმა შუამავალმა ქვეყანამ 2015 წლის 14 ივლისს ისტორიულ შეთანხმებას მიაღწიეს, რომლის საფუძველზეც ირანს აშშ-ის, ევროკავშირის და გაეროს უშიშროების საბჭოს მიერ დაწესებული ეკონომიკური და ფინანსური სანქციები მოეხსნებოდა. ეს გეგმა 2016 წლის 16 იანვრიდან ამოქმედდა. თუმცა ვაშინგტონი ირანის ბირთვული შეთანხმებიდან გავიდა და ირანს სანქციები დაუწესა, რომელთა ახალი პაკეტიც 1 ნოემბერს ამოქმედდა.
Imedinews