ბიზნესმენი გოგი თოფაძე თბილისში, „ყაზბეგის“ ქარხნის ტერიტორიაზე სასტუმროს მშენებელობას, ხოლო რუსთავის საწარმოში მინის ქარხნის განთავსებას გეგმავს და ამისთვის ინვესტორს ეძებს.

როგორც ბიზნესმენმა „კომერსანტთან“ საუბრისას განაცხადა, მინის ქარხნისთვის და სასტუმროს მშენებლობისთვის ინვესტორს აქტიურად ეძებს, თუმცა ამ პროექტებით ძირითადად ირანელები ინტერესდებიან.

„ჩემი ახალი ბიზნეს წამოწყებით, რომელიც რუსთავის საწარმოში მინის ქარხნის განთავსებას და თბილისში სასტუმროს მშენებლობას გულისხმობს, ძირითადად დაინტერესებული  უცხოელები არიან, უფრო მეტად ირანელები, მაგრამ ირანელ ინვესტორს არცერთ ბიზნესს არ მივცემ. ყველა ირანელს საქართველოში უნდა საქმის დაწყება, განსაკუთრებით აინტერესებთ ქარხნები. ჩვენთვის უფრო პრიორიტეტია ქართველი ინვესტორები, მაგრამ ისინი ჯერ არ დაინტერესებულან“, - აცხადებს გოგი თოფაძე.

მისივე თქმით, რუსთავის ქარხნის ტერიტორიაზე მინის საწარმოს გასაკეთებლად ყველა წინაპირობაა შექმნილი და უახლოეს პერიოდში დეტალებიც გადაწყდება.

„გვსურს რუსთავის საწარმოში ტექნოლოგიის შეცვლა და გვინდა გამოვუშვათ საკონსერვო ქილები ან შუშის ბოთლები. ტერიტორია გამზადებულია, ყველა პირობაა საწარმოს მოსაწყობად შექმნილი. საქართველოში მხოლოდ ერთი მინის ქარხანაა, რომელსაც თურქები ამუშავებენ, ამიტომ ვფიქრობთ, ასეთი ქარხნის გაკეთება აუცილებელია. თუმცა უფრო მეტ დეტალზე საუბარი ამ ეტაპზე არ შემიძლია, რამდენიმე თვეში გადაწყდება კონკრეტულად რა და როგორ გაკეთდება“, - განმარტა გოგი თოფაძემ.

ბიზნესმენის თქმით, ქალაქის ცენტრალურ ადგილას, სადაც „ყაზბეგის“ ქარხანა არის განთავსებული სასტუმროს მშენებლობა იგეგმება.

„მარცხენა სანაპიროზე არსებული ნახევარ ჰექტარ ფართობზე ვფიქრობთ 12 სართულიანი სასტუმროს მშენებლობას, ეს ადგილი ამისთვის შესაფერისია. გარდა ამისა, მნიშვნელოვანია, რომ ტერიტორიაზე 60 მანქანის საპარკინგე სივრცის მოწყობაც იგეგმება. ეს ტერიტორია ქალაქის ცენტრშია და საკმაოდ მოთხოვნადი ადგილია, ამიტომ გვაქვს საუბარი ინვესტორებთანაც, თუმცა ამ ეტაპზე ვერ შევთანხმდით. ზაფხულამდე გადაწყდება რა ტიპის სასტუმროს ავაშენებთ „ყაზბეგის“ ქარხნის ტერიტორიაზე, ასევე არ გამოვრიცხავთ ბიზნეს პარტნიორებთანაც ვისაუბროთ, თუმცა არ ვჩქარობთ, ყველაფერი კარგად უნდა გავიაზროთ და ეს ორი ახალი ბიზნესი ამის შემდეგ დავიწყოთ. ბევრი ნაკვეთები გვაქვს როგორც თბილისში ასევე რაიონებში, ამიტომ ველოდებით პოლიტიკური სიტუაცია დალაგებას და შემდეგ უფრო მარტივად გადავწყვეტთ სად და რა გავაკეთოთ“, - აცახადებს გოგი თოფაძე.

ნინო თამაზაშვილი