2020 წლის სახელმწიფო ბიუჯეტის პირველი კვარტალი შესრულდა, თუმცა ამ კუთხით პრობლემები იქნება მეორე კვარტალში - ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ „ტვ პირველის“ ეთერში განაცხადა.
„2020 წლის სახელმწიფო ბიუჯეტის პირველი კვარტლის შემოსულობების ოდენობამ 3 736,5 მილიონი ლარი შეადგინა, რაც კვარტლის გეგმაზე (3 465,3 მილიონი ლარი) 271,2 მილიონი ლარით მეტია. შესრულდა გადასახადების ნაწილიც. დაგეგმილი იყო 2 512,3 მილიონი ლარი, მიღებულმა შემოსავლებმა შეადგინა 2 673 მილიონი ლარი და გადაჭარბებაა 160,2 მილიონი ლარით. რაც შეეხება ხარჯებს:- 235 მილიონი ლარით მეტი დაიხარჯა სახელმწიფო ბიუჯეტიდან და ეს გასაგებია, ვინაიდან საგანგებო მდგომარეობა მთავრობას აძლევს საშუალებას ეს ხარჯები გასწიოს“, - აღნიშნა ირაკლი კოვზანაძემ.
მისი თქმით, სახელმწიფო ბიუჯეტის შესრულების კუთხით უკვე დაწყებულია პრობლემები და ეს ჩანს აპრილში და რეალურად პრობლემა უფრო გამწვავდება მაისში.
„როგორც საგადასახადო შემოსავლების ასევე საერთო შემოსავლების ნაწილში, გაიზრდება ბიუჯეტის დეფიციტი, რომელიც 2020 წლის სახელმწიფო ბიუჯეტში დაგეგმილია 2.5% მშპ-სთან მიმართებაში, რაც წლის განმავლობაში გაიზრდება“, - განაცხადა ირაკლი კოვზანაძემ.
მისივე თქმით, ქვეყნის ეკონომიკა შევა რეცესიაში. ყველა ამ ფაქტორის გათვალისწინებით, როგორც ირაკლი კოვზანაძემ აღნიშნა, სახელმწიფო ბიუჯეტის პროექტში ცვლილებების პაკეტს პარლამენტში მაისში ელოდებიან.
imedinews,.ge