20 ივნისის სპეცოპერაციისას უამრავი სერიოზული ხარვეზი იყო- რაც შეეხება ადამიანების დაშავებას და ასე შემდეგ, ამაში მთავარი დამნაშავეა ნიკანორ მელია და „ნაციონალური მოძრაობა“, -ასე აფასებს „ქართული ოცნების“ თავმჯდომარემ ირაკლი კობახიძე პრემიერის, ირაკლი ღარიბაშვილის გუშინდელ განცხადებას 20 ივნისთან დაკავშირებით. კობახიძის თქმით, 20 ივნისის სპეცოპერაციასთან დაკავშირებით ბევრი კითხვაა.

“რაც შეეხება 20 ივნისის სპეცოპერაციას და იქ არსებულ ძალიან სერიოზულ ხარვეზებს, ამაზე არაერთი კომენტარი გვაქვს გაკეთებული. ამაზე ისაუბრა პრემიერმა ირაკლი ღარიბაშვილმაც. უამრავი ძალიან სერიოზული ხარვეზი იყო, იგივე იმასთან დაკავშირებით, თუ რატომ იდგა სპეცდანიშნულების რაზმი ჭიშკრის გარეთ, რატომ არ იყო წყლის ჭავლი გამოყენებული და ასე შემდეგ. ამ ყველაფერმა გამოიწვია შემდეგ ვითარების გართულება და ის შედეგები, რომელიც სამწუხაროდ, დადგა. ამასთან დაკავშირებით ჩვენ კითხვები გვაქვს. სპეცოპერაციის ჩატარების დროს დაშვებული იყო უამრავი ხარვეზი. რაც შეეხება ადამიანების დაშავებას და ასე შემდეგ, ამაში მთავარი დამნაშავეა ნიკანორ მელია და „ნაციონალური მოძრაობა“, რომელიც იმ დღეს ახორციელებდა შტურმს პარლამენტის შენობაზე“,-აღნიშნავს კობახიძე.

ირაკლი კობახიძეს აქვს მოლოდინი, რომ ოპოზიცია არათუ არჩევნების შემდეგ, არჩევნებამდეც შეეცდება დესტრუქციულად, აქციებით და სხადასხვა გზებით კრიზისის შექმნას. მისი თქმით, ეს ოპოზიციის ნაწილის ქცევიდან იკითხება.

„ ამის მოლოდინი არსებობს. ამას აქვს თავისი ობიექტური საფუძველი, მათ შორის, ოპოზიციის ნაწილის ქცევიდან იკითხება, რომ ალბათ, აუცილებლად გადავლენ დესტრუქციულ ნაბიჯებზე ამ არჩევნების შემდეგაც. ამაზე ჩვენი პასუხი გვექნება. არავითარი რესურსი არ აქვთ იმის, რომ თუნდაც საბოტაჟი განახორციელონ და რაიმეს მიაღწიონ ამ საბოტაჟით. სამწლიანი მშვიდი განვითარების საშუალება ექნება ჩვენს ქვეყანას ამ ადილობრივი თვითმმართველობის არჩევნების შემდეგ. ახლა მთავარია 2 ოქტომბერს სათანადოდ ჩავატაროთ ეს არჩევნები, ამის შემდეგ 3 წელი მშვიდად განვითარდება ეს ქვეყანა, რაც ეკონომიკური პროგრესის საშუალებას მოგვცემს, სოციალური მიმართულებით განვითარების საშულებასაც, ჩვენი საგარეო პოზიციების კიდევ უფრო მეტად გამყარებას“, -აღნიშნავს კობახიძე.

ოპოზიციის მიერ დესტრუქციულ ნაბიჯებს, ქუჩის აქციებს ელის პრემიერ-მინისტრი ღარიბაშვილიც.  ირაკლი ღარიბაშვილი დარწმუნებულია, რომ ოპოზიცია არჩევნების შემდეგ გავა ქუჩაიში, დაიწყებს აქციებს და  კრიზისის შექმნას შეეცდება.