სენატისა და კონგრესის მხარდაჭერის შემდეგ, 9 მაისს, უკრაინის დასახმარებლად ლენ-ლიზის კანონს ხელი აშშ-ის 46-ე პრეზიდენტმა ჯო ბაიდენმაც მოაწერა. 81 წლის წინ პირველმა ლენდ-ლიზმა მძიმე მდგომარეობაში მყოფ საბჭოთა კავშირს სულის მოთქმის საშუალება მისცა. ახლა იგივე კანონი უკვე მოსკოვის წინააღმდეგაა მიმართული. სამხედრო-ანალიტიკურ ჟურნალ „არსენალის“ მთავარი რედაქტორ ირაკლი ალადაშვილის შეფასებით, კიევმა თეორიულად ბირთვულის გარდა, შეიძლება სხვა ყველა სახის შეიარაღება მიიღოს.
მიიღე ინფორმაცია უფრო სწრაფად „კომერსანტის“ Telegram-ზე.
როგორც ირაკლი ალადაშვილმა „კომერსანტთან“ საუბრისას განმარტა. ახალი კანონი შტატებს სამხედრო დახმარების ზრდის საშუალებას აძლევს, თუმცა არსებობს ტექნიკური პრობლემებიც რაც ტექნიკის ათვისებასთანაა დაკავშირებული. ტანკსაწინააღმდეგო ჯაველინის, ჰაერსაწინააღმდეგო სტინგერის ან თუნდაც ბუქსირებადი M777 ჰაუბიცის მართვის შესწავლა ბევრად უფრო იოლია ვიდრე აბრამსის ტიპის ტანკის, ყველაზე რთული კი მაინც, განსხვავებული სისტემის გამო საბჭოთა МиГ-ებიდან ამერიკულ F16-ებზე გადასვლა იქნება, რის გამოც აშშ მოკავშირე სახელმწიფოებიდან რუსული წარმოების ავიაციის შესყიდვას ან გადაცვლას ცდილობს.
გადასაცემი შეიარაღების სრული ჩამონათვალი ჯერ ცნობილი არ არის. ირაკლი ალადაშვილის შეფასებით Abrams-ის ტიპის ტანკებისა და ქვეითთა საბრძოლო მანქანების Bradley-ების გადაცემა ამ ეტაპზე ნაკლებად სავარაუდოა, თუმცა თუ ომი გაგრძელდა, რისი ალბათობაც მაღალია შეიძლება ეს ვარიანტიც იქნას განხილული, ახლა კი საუბარი 200 ერთეულ M113 ჯავშანტრანსპორტიორის გადაცემაზე მიდის.
ბირთვულის გარდა, კიდევ ერთი საერთაშორისო შეზღუდვა სარაკეტო შეიარაღების კუთხით არსებობს, ოღონდ ამ შემთხვევაში სრული აკრძალვის ნაცვლად 300 კმ-ის რადიუსის ლიმიტი მოქმედებს, ანუ ვაშინგტონს კიევისთვის სარაკეტო შეიარაღების გადაცემაც შეეძლება, მაგრამ მისი მოქმედების რადიუსი 300 კმ-ით იქნება შემოსაზღვრული.
კრემლი დღეს პირველი ლენდ-ლიზის მნიშვნელობის დაკნინებას ცდილობს. სინამდვილეში დახმარების მოცულობა $11.3 მლრდ-ს შეადგენდა, რაც დღევანდელი კურსით $220 მლრდ-ს უტოლდება. რა დახმარება მიიღო მაშინ საბჭოთა კავშირმა ამერიკისგან:
1) 13 000 ტანკი;
2) 14 000 თვითმფრინავი;
3) 400 000 ჯიპი და სატვირთო;
4) 8 000 ტრაქტორი;
5) 35 000 მოტოციკლი;
6) 1981 ლოკომოტივი;
7) 11 200 სარკინიგზო ვაგონი;
8) 620 000 ტონა რელსი;
9) 522 მლნ მსხვილკალიბრიანი ვაზნა;
10) 603 მლნ შაშხანის ვაზნა;
11) 3 მლნ ჭურვი წვრილკალიბრიანი ქვემეხებისთვის;
12) 18 მლნ ჭურვი მსხვილკალიბრიანი ქვემეხებისთვის;
13) 107 000 ტონა ბამბა;
14) 1.5 მლნ საბანი;
15) 2.7 მლნ ტონა ნავთობპროდუქტი;
16) 15 მლნ წყვილი სამხედრო ჩექმა;
17) 4.5 მლნ ტონა საკვები;
18) სხვადასხვა მოცულობის: ეთილის სპირტი, ანტიფრიზი, კობალტი, ნიკელი, ვოლფრამი, თუთია, ცეზიუმი, კადმიუმი, ბერილიუმი... ასევე მედიკამენტები და სხვა სამედიცინო აღჭურვილობა.
კიდევ ერთი დეტალი. პერიოდულად მოსკოვი იმისაც აცხადებს, რომ რომ დასავლეთმა გერმანიასთან ომი მხოლოდ მაშინ დაიწყო რაც საბჭოთა კავშირის გამარჯვებაში დარწმუნდა. სინამდვილეში ლენდ-ლიზის პროგრამა საბჭოთა კავშირზე თავდასხმამდე 3 თვით ადრე 1941 წლის 11 მარტს ამოქმედდა და მაშინ როცა მოსკოვი მოლოტოვ-რიბენტროპის პაქტით მიღებულ ტერიტორიებზე საოკუპაციო რეჟიმს ამტკიცებდა, ბრიტანეთი გერმანიასთან სისხლისმღვრელ ომში იყო ჩაბმული.
რა შედეგი ექნება ახალ ლენ-ლიზს დრო აჩვენებს. კრემლის გეგმა ლენდ-ლიზამდეც ჩავარდა. მან არათუ კიევი 2.5 თვეში აზოვსტალიც კი ვერ აიღო. უკრაინამ მტრის შეკავება შეძლო. დეოკუპაციას სხვა ტიპის შეიარაღება სჭირდება, ლენდ-ლიზი ამ მიზნის მისაღწევად შესაძლოა საუკეთესო საშუალება აღმოჩნდეს.