„გვქონდა საშუალება,
რომ მოვმზადებულიყავით ამ მძიმე პერიოდისთვის. პირველი დამნაშავე აქ ჯანდაცვის სამინისტროა, ის უნდა ყოფილიყო მზად, - ამის შესახებ კომერსანტს საქართველოს დისტრიბუტორთა ბიზნესასოციაციის თავმჯდომარე ივა ჭყონია ესაუბრა.
შეღავათები, კომუნიკაციის ნაკლებობა, კადრების შენარჩუნებაში ხელშეწყობა - რას სთხოვს ბიზნესი სახელმწიფოს და როგორ შეძლებს ეპიდსიტუაციასთან გამკლავებას კერძო სექტორი? „კომერსანტი“ ბიზნეს სექტორის წარმომადგენლების პოზიციით დაინტერესდა კითხვაზე - რომელია ის პირველი და აუცილებელი 3 ნაბიჯი, რაც ახლა მთავრობამ უნდა გადადგას მეორე ტალღის უმძიმესი ფინანსური შედეგების თავიდან ასარიდებლად?
ივცა ჭყონიას თქმით, ამ სექტორისთვის მძიმე პერიოდის შემსუბუქების მთავარი გზებია ხელფასებზე ნულოვანი დაბეგვრა, რეგულაციების შეთანხმება ბიზნესთან და იმპორტიორი კომპანიებისთვის დღგს გაუქმება იმპორტისას.
„პირველი - 750 ლარამდე ხელფასებზე იყო ნულოვანი დაბეგვრა, 1500 ლარზე იყო 50%-იანი შეღავათი, პირველ რიგში ეს მაინც უნდა გაკეთდეს.
მეორე - იმპორტიორი კომპანიებისთვის დღგ-ს დაბეგვრა არ უნდა მოხდეს იმპორტისას და უნდა მოხდეს რეალიზაციის მიხედვით. ეს არის ერთ-ერთი ყველაზე მნიშვნელოვანი საკითხი, ჩვენი მხრიდან რაც შეგვიძლია დავაყენოთ.
მესამე - ნებისმიერი რეგულაცია,რაც უნდა შემოვიდეს უნდა იქნას შეთანხმებული სექტორალურ ბიზნესასოციაციებთან. თუნდაც DCFTA -ს რეგულაციებთან მორგება იგივეა, ადამიანი რეანიმაციაში იყოს და ქორწილს, ახალ წელს ან დაბადების დღეს გეგმავდეს. დამატებით რეგულაციას კი ვერ მოვეგებით, როცა ბიზნესები გადარჩენაზე ვმუშაობთ.
როგორც მსოფლიო ორგანიზაციამ გვირჩია, უნდა ვისწავლოთ კოვიდთან ერთად თანაცხოვრება. ზაფხულის პერიოდი რომ გამოგვეყენებინა, მომზადებული შევხვდებოდით ამ რთულ პერიოდს, რა რთულ პერიოდშიც ახლა ამოვყავით თავი, ჩვენ დავაგვიანეთ,“ - განმარტავს დისტრიბუტორთა ასოციაციის თავმჯდომარე.
ივა ჭყონიასგან განსხვავებით, „ნატახტარის“ კორპორატიულ საქმეთა დირექტორის ნიკოლოზ ხუნძაკიშვილის თქმით, კონკრეტული შეღავათები მხოლოდ დროებითია და არაეფექტური, დღეს კი ბიზნესს შორსმიმავალი ნაბიჯები სჭირდება.
„ფუნდამენტური საკითხები გვაქვს მოსაგვარებელი, ასე მარტივად არ არის. ახლა გადარჩენაა ნომერ პირველი პრიორიტეტი და შემდეგ განვითარება/აღდგენა. თუმცა ერთჯერადმა აქციებმა არ მგონია, რომ რამე შედეგი გამოიღოს. მოკლევადიან პერსპექტივაში შეიძლება შეღავათებმა რაღაც მოაგვაროს, მაგრამ ეს არ არის ფუნდამენტური საკითხი.
დავიწყოთ იმით,რომ აუცილებელია ზოგადად რეგულატურული გარემოს გამარტივება, ყველა იმ რეგულაციებზე უარის თქმა,რომელიც ფინანსურ ხარჯებს იწვევს. ან ამ ყველაფრის რაღაც დროით გადავადება. იქნებ ერთ წლიანი მორატორიუმი გამოვაცხადოთ ნებისმიერ ცვლილებაზე,რომელიც პირდაპირ ხარჯთან ასოცირდება ბიზნესის მხრიდან.
პრაქტიკულად, ეკონომიკის 6% დაიკარგა, ამის უკან დგას კიდევ ბევრი ადამიანი,სამუშაო ადგილი, ოჯახების სოციალური მდგომარეობა.
მეორე და აუცილებელია, საინვესტიციო კლიმატის მიმართ სხვა მიდგომა,რომელიც პოლიტიკურ, ეკონომიკურ,სოციალურ საკითხებს მოიცავს. პოლიტიკური სტაბილურობა ძალიან მნიშვნელოვანია, იმისთვის რომ ინვესტორი საქართველოში შემოვიდეს, სანდო სასამართლოსთან ერთად. როგორი წარმოდგენა ექნებათ პოტენციურ ინვესტორებს, მეტწილად განსაზღვრავს მათ გადაწყვეტილებას, ჩადონ თუ არა ფული საქართველოში. ეს იმას ნიშნავს რომ მეტი კომუნიკაციაა საჭირო, როგორც ბიზნესთან, ისე პოტენციურ ინვესტორებთან.
ნებისმიერი ნაბიჯი, მათ შორის სტიმულირების პაკეტი, გადავადების თუ დახმარების, არის მოკლევადიანი. რეალურად, მთლიანად არის შესაცვლელი ბევრი საკითხი, მმაართველობის სისტემით დაწყებული, სასამართლოთი დამთავრებული. ამას სჭირდება აზროვნების, მენტალობის ცვლილება, რაც ძალიან მიხარია რომ ახალგაზრდა თაობას მოაქვს და რა თქმა უნდა, ამას სჭირდება პოლიტიკური ნება,“- განმარტავს ნიკოლოზ ხუნძაკიშვილი.
მარიამ მორგოშია