საქართველოს პარლამენტის თავმჯდომარეე შალვა პაპუაშვილი აცხადებს, რომ გამოსცემს ბრძანებას, რომელიც პარლამენტში ჟურნალისტების ქცევის წესებს განსაზღვრავს. ბრძანების საფუძველზე საპარლამენტო აკრედიტაციები ჟურნალისტებისთვის კვლავ გაიცემა, რაც 2020 წლის მოწვევის პარლამენტში შეჩერებული იყო.

როგორც პაპუაშვილმა  განმარტა აკრედიტაციის წესი სხვადასხვა ქვეყნების პარლამენტების საუკეთესო გამოცდილების ანალიზის საფუძველზე დაიწერა და ორ ძირითად პრინციპს - მოქალაქეებისთვის მნიშვნელოვანი საკითხების გაშუქებას და საკანონმდებლო ორგანში სამუშაო გარემოს  უზრუნველყოფას დაეფუძნება.

პარლამენტის  თავმჯდომარე აცხადებს, რომ საპარლამენტო ჟურნალისტებს აკრედიტაციის ფარგლებში პარლამენტში შესვლა დაუბრკოლებლად შეეძლებათ. ხოლო იმ ცალკეული მედიების წარმომადგენლებს, რომლებიც შესაძლოა არ იყვნენ  აკრედიტებულნი ( მაგალითად უცხოური მედია) მათ სპეციალური აკრედიტაცია ექნებათ, რომელიც ერთ დღის განმავლობაში სპეციალურად სიუჟეტის, მასალის მოსამზადებლად იმოქმედებს.

დადგენილი რაოდენობები: - დიდ მედიებს, მაუწყებლებს, რომელთაც ეროვნული მაუწყებლობა აქვთ, შვიდი გადამღები ჯგუფის აკრედიტირების შესაძლებლობა ექნებათ. სხვა ტელევიზიებს - სამი გადამღები ჯგუფის. ჯგუფში შედის, როგორც ჟურნალისტი, ასევე ოპერატორი და ტექნიკური პერსონალი. გაზეთებისთვის და ჟურნალებისთვის - ორი ჟურნალისტი, რადიო - ორი, ონლაინ გამოცემა - ოთხი.

„რაც შეეხება პარლამენტში აკრედიტებული ჟურნალისტური საქმიანობის ქცევის წესებს ესენია: ხელი არ შეუშალოს პარლამენტში მიმდინარე ღონისძიებების მსვლელობას; წინასწარი ნებართვის გარეშე არ გადაიღოს პარლამენტის წევრის ან აპარატის თანამშრომლის სამუშაო ოთახი; პარლამენტის წევრის, აპარატის თანამშრომლის ან პარლამენტში სტუმრად მყოფი პირის მიერ ინტერვიუს ჩაწერაზე უარის თქმის შემთხვევაში, ინტერვიუს შეწყვიტოს; პარლამენტის წევრის, აპარატის თანამშრომლის ან პარლამენტში სტუმრად მყოფი პირის თანხმობის გარეშე არ გადაიღოს მისი დოკუმენტები, ტელეფონის ან სხვა ელექტრონული მოწყობილობის ეკრანი ისე, რომ მასზე გამოსახული ინფორმაციის აღქმა შესაძლებელი იყოს; არ დაუშვას მისი მხრიდან პარლამენტში მყოფი პირისადმი უხამსი, სექსისტური, დისკრიმინაციული მიმართვა ან მოქმედება; დაემორჩილოს სახელმწიფო დაცვის სამსახურის და მანდატურის მითითებებს; სააკრედიტაციო მასალა ატაროს გამოსაჩენ ადგილას და არ გადასცეს სხვა პირს“, - აღნიშნა შალვა პაპუაშვილმა. 

პაპუაშვილის ინფორმაციით, აღნიშნულ რეჟიმზე გადასვა 1-ელი მარტიდან მოხდება.