ირაკლი ღარიბაშვილის პრემიერ-მინისტრობის პერიოდიდან მოყოლებული ინფრასტრუქტურის სამინისტრო კორუფციის, ნეპოტიზმის და არაპროფესიონალიზმის სათავედ იქცა. აღნიშნულს გამომძიებელ ჟურნალისტთა გაერთიანება IFACt-ის კვლევაც ადასტურებს. მათი კვლევებიდან ირკვევა,რომ „ქართულმა ოცნებამ“ ეს სამინისტრო ყველა შესაძლო გზით დააზიანა. მათი მმართველობის პერიოდში სამინისტრო კოლოსალური თანხების არაეფექტურ ხარჯვასთან, სამოხელეო დანაშაულებთან და სავარაუდო კორუფციულ გარიგებებთან ასოცირდება.
- 2013-2018 წლებში საქართველოს 16 მუნიციპალიტეტში ინფრასტრუქტურული პროექტებზე 180 მილიონი ლარი დაიხარჯა. გამომძიებელ ჟურნალისტთა გაერთიანება IFACt-ის კვლევის მიხედვით, შესწავლილი 30 პროექტიდან 8 დასრულდა და არ მუშაობს, 16 თავიდანაა გასაკეთებელი, 6 პროექტი არ დასრულებულა. კახეთის წყალმომარაგებისთვის გამოყოფილი 29, 3 მილიონი ლარი უშედეგოდ გაიხარჯა, კახეთს წყალი არ აქვს. გურიის 3 სოფლის წყალმომარაგებაზე 4.5 მილიონი ლარი გაიხარჯა და დასრულებული არ არის. სახელმწიფოს მიერ შეუსრულებელი ვალდებულები, პროექტისთვის გამოყოფილი საბიუჯეტო სახსრების არამიზნობრივად ხარჯვა შესწავლის პროცესში გამოვლენილი მთავარი პრობლემებია.
- 2018 წელს რიკოთის გზის ორი მონაკვეთის, ხევი-უბისა და შორაპანი-არგვეთას, დაგეგმილი ბიუჯეტი 130 მლნ ლარი იყო. დაზუსტებული ბიუჯეტი 339 მილიონი ლარით განისაზღვრა, ხოლო ბიუჯეტის ხარჯმა საბოლოოდ 393 მილიონ ლარს გადააჭარბა, საიდანაც 387 მილიონი გამარჯვებული კომპანიებისთვის ავანსად გადარიცხული თანხა იყო. 2018 წლის ბიუჯეტით გათვალისწინებული თანხების უმეტესი ნაწილი საავანსო გადახდებს მოიცავდა, რომლებიც მოსამზადებელი და სამობილიზაციო სამუშაოებისათვის იყო გათვალისწინებული.
- სამინისტროს 2018 წლის ბიუჯეტი თავდაპირველად 1 მილიარდ 815 მილიონ ლარს შეადგენდა. ხაზინის ცნობით, 11 თვეში ამ თანხიდან მხოლოდ 1 მილიარდი ლარი იყო ათვისებული. შესაბამისად, დეკემბერში გასაწევი ხარჯი 811 მილიონ ლარს შეადგენდა. აუთვისებლობის მიზეზად მსხვილი ინფრასტრუქტურული პროექტების შეფერხება სახელდებოდა, დაფიქსირდა უხარისხო გზების დაგების ფაქტები.
ტენდენცია დღესაც აქტუალობას არ კარგავს და ამის ერთერთი შედეგი - განუვითარებელი ზამთრის კურორტებია.
ტაბულას ინფორმაციით, ინფრაქტრუქტურის მინისტრის მაია ცქიტიშვილის თქმით, გუდაურში წყალმომარაგება სრულად არის აღდგენილი და ყველა სასტუმროს მიეწოდება წყალი. რაც შეეხება ბაკურიანს - მინისტრის ინფორმაციით, დღეს დილიდან დაიწყო ეტაპობრივად სასტუმროების წყალმომარაგება. ცქიტიშვილი ვარაუდობს, რომ დღის განმავლობაში სრულად აღდგება ბაკურიანის წყლით მომარაგება.
რაც შეეხება პრობლემის გამომწვევ მიზეზებს, ინფრაქტრუქტურის მინისტრი ამბობს, რომ მიზეზი გარემო და უნალექო ამინდებია. ასევე აღნიშნავს, რომ პრობლემის გამომწვევ მიზეზებს შორის არის, აბონენტების მომატება.
„ობიექტური მიზეზი არის სამწუხაროდ გარემო, რომელიც გვაქვს და უნალექო ამინდი, რამაც გამოიწვია იმ წყლის მარაგების მკვეთრი შემცირება რაც არის საჭირო სრულად , მთელი ამ გაზრდილი მოთხოვნების დასაკმაყოფილებლად. მხოლოდ ბაკურიანში 2019 წლის პირობებში ჩვენ დაგვემატა 800-მდე ახალი აბონენტი, საიდანაც 200-ზე მეტი იყო იურიდიული პირი, ანუ სასტუმრო. შესაბამისად, ეს რა თქმა უნდა, არის დამატებითი მოთხოვნა, დამატებითი ზეწოლა, იმ წყალმომარაგებაზე, რომელიც ჩვენ გვაქვს. იგივე ვითარება გვაქვს გუდაურში, ამდენი იურიდიული პირი არ დაგვემატა, მაგრამ რამდენიმე ათასი მაცხოვრებელი დაემატა „რედკოს“ დასახლებას და გარდა ამისა, „რედკოსაც“ და ბევრ სხვა ბიზნესს აქვს გეგმები 2020 წლისთვისაც. შესაბამისად, საჭიროა იმ ინფრასტრუქტურის განვითარება, რომელიც ამ მზარდ მოთხოვნებს უპასუხებს, - ამბობს ცქიტიშვილი.
მინისტრის თქმითვე, ინფრაქტრუქტურის განვითარების ტემპი, სირთულისა და სპეციფიკურობის გამო, ვერ მიჰყვება ბიზნესის განვითარების ტემპს.
„სამწუხაროდ ამ განვითარების ტემპი, იქედან გამომდინარე, რომ ბევრად უფრო სპეციფიკურია და რთულია, ბევრად უფრო მეტ დაფინანსებასა და პროცედურასთან არის დაკავშირებული, ინფრასტრუქტურის განვითარების ტემპი სამწუხაროდ ვერ მიჰყვება იმ ტემპს, რომელიც ჰქონდა ბიზნესს. ეს არის ის პრობლემა, რომელიც ჩვენ გვქონდა“, - ამბობს მაია ცქიტიშვილი.
როგორც ცნობილია, კვირაზე მეტია საქართველოს მთის კურორტებზე წყალმომარაგების პრობლემაა. გუდაურისა და ბაკურიანის სასტუმროებისა და მოსახლეობის ნაწილს წყალი საერთოდ არ მიეწოდებოდა.