9 აპრილს ინფრასტრუქტურის მშენებელთა ასოციაციის წევრი კომპანიების წარმომადგენლებს საქართველოს შრომის, ჯანმრთელობისა და სოციალური დაცვის სამინისტროს შრომის პირობების ინსპექტირების დეპარტამენტის უფროსი ბექა ფერაძე და საქართველოს ეკონომიკისა და მდგრადი განვითარების სამინისტროს ტექნიკური და სამშენებლო ზედამხედველობის სააგენტოს უფროსი დავით გიგინეიშვილი შეხვდნენ.
შეხვედრა დისტანციურად, ონლაინ რეჟიმში წარიმართა და წამოჭრილ იქნა ყველა ის საკითხი, რომელიც, ამ ეტაპზე, განსაკუთრებულად აქტუალურია სამშენებლო სექტორისთვის, საქმიანობის უფლების მოპოვების პროცესში.
წევრი კომპანიების მხრიდან გამოიკვეთა თემები, რომლებიც შეეხებოდა პროცესების ოპტიმიზაციისათვის მონიტორინგის გეგმა-გრაფიკის შედგენას, ობიექტის მუშაობის ნებართვასთან ერთად, მთავარი კონტრაქტორების ნებართვების უზრუნველყოფას და, ზოგადად, სამშენებლო კომპანიების შემოწმების პრიორიტეტიზაციის პარალელურად, სამშენებლო მასალების მიმწოდებლების შემოწმების საკითხს.
დეტალურად იქნა განხილული და დაზუსტებული სხვადასხვა ტექნიკური პროცედურები, მათ შორის, ისეთი მნიშვნელოვანი საკითხები, როგორებიცაა დასაქმებული პერსონალის ტრანსპორტირების, თერმო სკრინინგის სპეციფიკა და ობიექტიდან ნარჩენების გატანის საკითხი.
საქართველოში ახალი კორონავირუსის გავრცელების აღკვეთის მიზნით გასატარებელი ღონისძიებების დამტკიცების შესახებ საქართველოს მთავრობის 2020 წლის 23 მარტის #181 დადგენილების მიხედვით, ეკონომიკური საქმიანობის წარმოება მხოლოდ მთავრობის მიერ ნებადართული მეწარმე სუბიექტებისთვისაა დაშვებული. საქმიანობის გაგრძელების შესახებ ნებართვა გაიცემა წინასწარ შემოწმებისა და მონიტორინგის დასკვნის საფუძველზე, რომელიც სამშენებლო ობიექტებზე ტარდება იმის დასადგენად, თუ რამდენად არის ადგილებზე დაცული კორონავირუსის პრევენციისთვის აუცილებელი რეკომენდაციები. მონიტორინგის პროცესს წარმართავს შრომის პირობების ინსპექტირების დეპარტამენტი, ტექნიკური და სამშენებლო ზედამხედველობის სააგენტოსთან ერთად, ხოლო ქ. თბილისის ტერიტორიაზე - თბილისის მერიის მუნიციპალური ინსპექცია.