საქსტატის ცნობით, საშუალო ნომინალური ხელფასი 2021 წლის მეორე კვარტალში, გასული წლის ანალოგიურ პერიოდთან შედარებით, 15.5%-ით (178 ლარი) 1328 ლარამდე გაიზარდა. თუმცა, მაღალი ინფლაციის გათვალისწინებით, საშუალო ხელზე ასაღები ხელფასი ბოლო 1 წელიწადში მხოლოდ 21 ლარით გაიზარდა.
საქმიანობის სახეების მიხედვით ყველაზე მაღალი - 2355 ლარიანი საშუალო ხელფასი საფინანსო სექტორში დაფიქსირდა, ზრდამ 2020 წლის მეორე კვარტალთან შედარებით 15.4% შეადგინა. ინფორმაციისა და კომუნიკაციების სფეროში ხელფასები 12.4%-ით 2173 ლარამდე გაიზარდა. მშენებლობის სექტორში 23.7%-ით – 2006 ლარამდე.
მეორე კვარტალში ქალების საშუალო ხელფასმა 1078 ლარი შეადგინა, ხოლო კაცების – 1560 ლარი. ამის უმთავრესი მიზეზი ისაა, რომ მენეჯერულ პოზიციაზე ძირითადად კაცები ინიშნებიან. ერთი და იგივე პოზიციაზე შრომის ანაზღაურება, როგორც წესი, თანაბარია.
ბიზნესსექტორში დასაქმებულთა ხელფასმა საშუალოს მცირედით გადააჭარბა და 1390 ლარი შეადგინა.
ყველა შემთხვევაში მითითებული ხელფასი დარიცხულია, რასაც სავალდებულო წესით საპენსიო შენატანი და საშემოსავლო გადასახადი აკლდება, რის შემდეგაც ხელზე ასაღები საშუალო ხელფასი 1041 ლარამდე მცირდება.
1041 ლარიანი საშუალო ხელზე ასაღები ხელფასი არ ნიშნავს იმას, რომ ადამიანთა უმრავლესობას ხელფასი 1041 ლარის სიახლოვეს აქვთ, ეს მოდაა, რომელიც საქსტატის მიხედვით განსაზღვრული არ არის, თუმცა საშუალოზე დაბალი უნდა იყოს.
თუ ინფლაციასაც გავითვალისწინებთ, მაშინ წლიური ზრდის ტემპი მკვეთრად შემცირდება. დღევანდელი 1041 ლარი, მსყიდველუნარიანობით იგივეა, რაც გასული წლის 923 ლარი. გასული წლის მეორე კვარტალში საშუალო ხელზე ასაღები ხელფასი 902 ლარი იყო. მართალია, ნომინალური ხელფასი 139 ლარით გაიზარდა, მაგრამ ამ 139 ლარიდან 118 ლარი ინფლაციამ გადაყლაპა და რეალურმა ზრდამ 21 ლარი შეადგინა.
იმ შემთხვევაში, თუ საქსტატი 18-24 პროცენტით გაძვირებულ ელექტროენერგიას ინფლაციაში ასახავდა (ბიუჯეტიდან სუბსიდირების გამო, საკამათო მეთოდის გამოყენებით არ გაუთვალისწინებია), მაშინ აგვისტოში ინფლაცია 12.8%-ს გადააჭარბებდა და რეალური საშუალო ხელზე ასაღები ხელფასი შემცირდებოდა.
გიორგი ელიზბარაშვილი