ქარელის რაიონში სეტყვის საწინააღმდეგო ბადეების ქართული საწარმო "აგრობადე" მიმდინარე ზაფხულში იხსნება. პროექტის საინვესტიციო ღირებულება ნახევარი მილიონი დოლარია და USAID პროგრამის თანადაფინანსებით ხორციელდება.
კომპანია „აგრობადეს“ დამფუძნებელი ავთანდილ მაისურაძე „კომერსანტთან“ ამბობს, რომ მართალია, საწარმო ჯერ არ არის გახსნილი, მაგრამ პროდუქციაზე მოთხოვნა უკვე ძალიან მაღალია. მისი თქმით, კომპანიამ 100 ჰექტარი ფართობისთვის დამცავი ბადეების დამზადების შეკვეთები უკვე მიიღო.
„ამ ეტაპზე საწარმოს მშენებლობა მიმდინარეობს და დაახლოებით თვის ბოლოს დასრულდება, ერთი თვის შემდეგ კი საქონლის წარმოებას დავიწყებთ. მართალია, გახსნა რამდენჯერმე გადაიდო, თუმცა სეტყვა საწინააღმდეგო ბადეების საწარმო ზაფხულში აუცილებლად გაიხსნება.
მოთხოვნა საკმაოდ დიდია, ადრე ჩვენს კომპანიას თურქეთიდან და იტალიიდან შემოჰქონდა პროდუქცია და იმის მონტაჟს ვახდენდით, ახლა კი უკვე ადგილზე დავიწყებთ წარმოებას. იმპორტირებულ პროდუქციას ფასით გავუწევთ კონკურენციას. რადგან გერმანელი და თურქი პარტნიორები გვყავს, შესაბამისად, სპეციალისტებიც უცხოელები გვეყოლებიან და დანადგარებიც იქიდან შემოგვაქვს. ამიტომ, ხარისხი იმპორტირებულის შესაბამისი იქნება, ხოლო ფასი უფრო დაბალი. გარდა ამისა, ჩვენთან მუშახელიც უფრო იაფია და ტრანსპორტირებაც არ იქნება საჭირო.
რაც შეეხება საჭირო მასალას, ანუ ძირითადად პოლიმერს, ის თურქეთიდან, აზერბაიჯანიდან და ევროპიდან შემოგვაქვს, დანარჩენი კი, მათ შორის ძაფის წარმოება და მოქსოვა, საქართველოში მოხდება“, - აღნიშნავს ავთანდილს მაისურაძე.
მისივე თქმით, ქართველი ფერმერები საწარმოს გახსნას ელოდებიან, რადგან ბოლო წლებში ქვეყენაში ხილ-ბოსტნეულის და კენკროვნების მსხვილი ფერმების რაოდენობა გაიზარდა, ასევე მევენახეების მხრიდანაც არის მოთხოვნა. „აგრობადეს“ დამფუძნებელის ინფორმაციით, დასაწყისისთვის საქართველოს ბაზარს, პანდემიის დასრულების შემდეგ კი საერთაშორისო ბაზრებსაც აითვისებენ.
„შეკვეთები უკვე გვაქვს და მოთხოვნაც ქართველი ფერმერების მხრიდან მაღალია. სეტყვა გამძლე ბადეები გათვლილია როგორც მეხილეობისთვის, ასევე მევენახეობისთვის. გარდა ამისა, დავიწყებთ მზისგან დამცავი ბადეების წარმოებასაც, რომელიც, მაგალითად, ერთწლიან კულტურებს მზისგან დაიცავს.
უცხოეთშიც ვგეგმავთ პროდუქციის გატანას, თუმცა პანდემიის გამო ეს საკითხი სავარაუდოდ ცოტა გადაიწევს. ვფიქრობ, კონკურენციას უცხოურ პროდუქციას მარტივად გავუწევთ, აი მაგალითად რუსეთში ბადეები თურქეთიდან შედის, მაგრამ ჩვენგან უფრო იაფი იქნება იქ შეტანა, რადგან უფრო იაფი დაგვიჯდება წარმოება. ვფიქრობ, რეგიონის სხვა ქვეყნებსაც დავაინტერესებთ.
პროექტის საინვესტიცო ღირებულება 500 000 დოლარია, საიდანაც ნაწილს USAD გვაფინანსებს, ნაწილი კი აგრო სესხი გვაქვს აღებული“, - ამბობს ავთანდილ მაისურაძე.
ნინო თამაზაშვილი