იმპორტიორი კომპანიები თურქეთსა და საქართველოს შორის საბაჟოსთან მიმართებით მიღებულ ახალ შეთანხმებას ბიუროკრატიული პროცედურების შემსუბუქებისთვის და ბიზნესგარემოსთვის იდეალურ ნაბიჯად აფასებენ.

საქართველოსა და თურქეთის ერთობლივი საბაჟო კომიტეტის მე-3 შეხვედრაზე, რომელიც ბათუმში 7 ივლისს გაიმართა, ხელი მოეწერა „გამარტივებული საბაჟო დერეფნის შესახებ შეთანხმებას“. ამიერიდან ქართველი და თურქი მებაჟეები ინფორმაციას ელექტრონულად გაცვლიან, რაც ტვირთის გატარებას საზღვარზე ერთი კვირიდან ერთ საათამდე შეამცირებს.

როგორც საქართველოს დისტრიბუტორთა ასოციაციის ხელმძღვანელი ივა ჭყონია „კომერსანტთან“ განმარტავს, ბოლო პერიოდში საბაჟოზე პრობლემები ბიზნესისთვის ნამდვილი გამოწვევა იყო, ხოლო ისეთ სტრატეგიულ პარტნიორთან ურთიერთობის გამარტივება, როგორიც თურქეთია, ბიზნესგარემოს დადებითად წაადგება.

„იდეალური სიახლეა, ამაზე კარგი არ არსებობს ჯერჯერობით არაფერი. ძალიან ბევრი შეფერხებები გვაქვს ბოლო პერიოდში საბაჟოებზე და ბევრ პრობლემებს ვაწყდებით, ამიტომ რაც უფრო გამარტივდება ბიზესებისთვის პროცესი, მით უფრო კარგია. განსაკუთრებით ისეთ სავაჭრო პარტნიორთან, როგორიცაა თურქეთი, რომელიც ერთერთი მოწინავეა და  დღევანდელი მდგომარეობით საიმპორტო ბაზრის პირველ სამეულში შედის. მნიშვნელოვანია გაიოლდეს ყველანაირი ურთიერთობა, განსაკუთრებით, რაც სპირტის იმპორტს ან ექსპორტს ეხება. ეს ყველა ტვირთზე უნდა იყოს გავრცელებული, განსაკუთრებით საკვებ პროდუქტზე, რომელიც არის მალფუჭებადი“, - ამბობს ივა ჭყონია.

აისისი ჯორჯიას დირექტორი რამაზ ლოდია „კომერსანტთან“  საუბრობს თურქეთის საზღვარზე შემოწმების პროცედურებთან დაკავშირებულ გაჭიანურებებზე, რის გამოც ხშირად ტვირთის სხვა მარშუტის არჩევას ამჯობინებენ.

„კარგია თუ გაადვილდა პროცესები თურქეთის საბაჟოზე, გადამზიდავი კომპანიებისთვის ეს ყველაფერი ბევრად უფრო ადვილი გახდება. შეფერხება ყოფილა აქამდე, მაგალითად ბულგარეთიდან თუ მოდის მანქანა, თურქეთი ძნელად ატარებს ამ მანქანებს. ძალიან კარგია თუ მსგავსი შეთანხმება მიიღეს ორივე მხარისთვის. თუმცა ტვირთს, რომელსაც შემოწმება სჭირდებოდა, ალბათ ისევ შეამოწმებენ. არ მგონია, რომ თურქეთმა არ შეამოწმოს ალკოჰოლი, შოკოლადი (რაც მე მეხება), საკონდიტრო ინგრედინეტები, თუ არ მოჰყვა საბუთი, რა ტქმა უნდა, ვერ გატარდება. ხშირად ყოფილა შემთხვევა, რომ არ წამოვსულვარ თურქეთით და წამოვსულვარ ბორანით ბულგარეთიდან. მივესალმები, თუ ასეთ გამარტივებაზეა საუბარი, მითუმეტეს თუ ეს სერტიფიკატები წინასწარ გაიცვლება“, - აღნიშნავს ბიზნესმენი.

ახალი შეთანხმების მიხედვით, საბაჟო დერეფანში ინფორმაციის ოპერატიული გაცვლა მოხდება ელექტრონული სისტემების მეშვეობით, სადაც მოხვდება წონის შესახებ ინფორმაცია, ფიტოსანიტარული სერტიფიკატის შესახებ ინფორმაცია, ინვოისების წინასწარი  ურთიერთგაცვლა  ელექტრონულ ფორმატში. ახალი სისტემა უახლოეს დღეებში ამოქმედდება.